Les Pages Jèrriaises

Problème No. 5

A M. l'Editeu de la Nouvelle Chronique.

Moussieu, - En liésant votr' gazette un Samdi au sé, j'fus bein surprins de liethe que Pepée était a m'exposé d'la sorte pour un p'tit deux sou qué j'manthi à gagny le Samdi d'Noué. Vos ravissous qué j'enne tais pon en vendant des pommes chu jour-là, j'tais pus en peine des jannes filles que des pommes à Pepée. Mais y n'yen est pon rein de m'faithe honte, j'men vais vos dithe chein qui fit à Memmée en quiyant ses pommes. Eh bein, Moussieu, il en restait deux pangnés, et pour piéthe au Bouonhomme je fûmes obyigis de nos mettre à conté les pommes dans chaque pagni, pour vais dans tchi pangni qui yen avait le pus. Et crethious bein Moussieu, que j'ûmes de l'embarras à l'faithe porté le pus pésant. Y l'éthait voulu en hallé 37 de d'dans san pangni et les mettre dans l'pangni à Memmée pour qu'oul en éthait yeu autant comme li, mais j'ly criyi bétôt: "Halt là"! Bouonhomme! ch'n'est pas oquouo de même d'ja, et tu devthais avait honte, t'ues pus fort que memmée et tu t'en vas en prendre 37 des siennes et pis t'en éthas une fais autant comme yi. Y n'tai pon trop content, mais entre la bouonnefemme et mé j'mènagimes à l'faithe prendre les 37 du pangni à memmée; le sé y s'pyiengni d'ma dans les reins et j'fûmes obyigis de l'y donné de l'Ombroquaisthiun pour sé frotté atout, tréjous, y n'y r'pathaisai pon le lendemain et j'crai bein que ch'tai pour me faithe ma qu'u m'envyi à vendre ses pommes le Samdi d'Noué dans la rue d'd'riethe.

Je pense de vos d'mandé Moussieu si ou éthiés thythuns de vos écoliers qui pouorais dithe combein dé pommes qui y'avait dans chaque pangni, après l'échange, en vos r'merciant à l'avanche.

Votr' tout dévoué,
Laïesse,
Portinfé, St. Ou.,
Janvi 20 1897.

 

Viyiz étout:

 

Les Pages Jèrriaises