Lé bouanhoum', tout âgi qu'i sait,
I-l-est occouo osi enjouèt
Qué du temps qu'i-l-avait tchinz'ans
Qu'i-l-êtibotchait les passans !

Quand j'fûme's touos aflieutchis siez li,
"Nos v'lo au grand compièt," dît-i ; -
"Heum'-ous tous la soupe - aprèchis,
"Car la v'lo tout' prêt' - tout' dréchie."

J'apréchons tous - nos v'là asis -
Châtchun s'êde èt fait coum' siez li;
 Sinon Mêt' Matchi, qui sembliait
Qu'en bégant d'z-yeux nou s'rasâsiait !

Mais v'chin chain qui f'rait rir' les cas :
Bètôt, nou-z-entend des ha-has !
Mêt' Dennié v'nait dé dêcouvri
L'embarâs du Couôsin Matchi.

I n'avait pon d'cullyi ! . . . èt d'vant
Qu'i-l-en d'mandîs' yunn', tout en riant,
Mêt' Dennié s'êcrie : "Ecoutons !
"Qui n'mang' pas sa soupe est fripon ! . . . . "

Qué fait Mêt' Matchi, man couôsin ?
- I s'mèt à vidghis un crôtin -
Qu'i trouv' tout-près dé s'n-aciette -
Et l'stique au but d'sa frouchette !

Sa soup' 'tait ava d'vant la nôtr' . . . .
- Ah ! jeanmais lé pus drôl' d'apôtr' !
I dit - en mangeant san crôtin :
"Qui n'fait pas coum' mai est cotchin !"

Pourtant ! jé n'tais pon si cotchin
Qué l'tait Mêt' Matchi - man couôsin :
Dans m'n-aciett' jé 'rmins ma cullyi,
Et, li, la sienne, i-l-avalit ! . . .

J.D.R.
St.-Héyé, chu 3 Déc. 1856.