Dé mes jannes jours, lé Lundi d'la Pentecôte 'tait tréjous un jour spécial auve banques, boutiques et êcoles freunmées. V'là tchi donnait eune împortance ès célébrâtions dé l'annivèrsaithe d'la naîssance dé l'églyise dé Jésû-Christ.
Après lé jour dé l'Ascension, les discipl'yes privés d'la compangnie d'lus Maître, avaient pâssé l'temps enfreunmés driéthe des portes bârrées car il' avaient peux d'lus advèrsaithes et i' mantchaient tout l'couothage tchi lus fallait pour accomplyi la tâche qué lus Seigneur lus avait donné. Mais lé pouver extraordinnaithe du Saint Esprit lus avait 'té promîns et quand vînt la Pentecôte i' dêcouvrîtent la réalité d'sa promêsse. Tout changit subitement. Peux, crainte, hésitâtion dispathûtent et fûtent rempliaichies par couothage, confianche et dêtèrminnâtion. Êffrités d'abord, mais après à l'ouvèrt i' ' taient d'but dans l'marchi à prêchi l'Êvangile, prêts à aîdgi ès pauvres, ès malades et à touos les malheutheux.
Lé Saint Esprit tchi s'montrit en forme dé feu et d'vent comme dêmonstrâtion dé san ênèrgie et san pouver i' y'a deux mille ans est l'même Saint Esprit tch'est acti dans la vie dé tous les discipl'yes dé Jésû-Christ en 2005. Ch'est li tchi nos êtchipe pour accomplyi sa tâche dans notre généthâtion. Pour ses dons, qué j'célébrons la Pentecôte.
Brian Vibert
Viyiz étout: