À Portinfé, Saint Ou.
Jeudi au sé.
Moussieu l'Editeu,
Y'a plusieurs choses intérêssantes que j'voudrais mentionner à ces seit, et comme ou pouvez craithe la pûs importante est la position financièthe d'nos Etats.
J'avais prédit, pûs d'une fais, que s'i' continuaient à dépenser les sous du publyic sûs toutes sortes de projets tchi, à m'n idée étaient non pas seulement riditchules mais même dangéreux, le jour veindrait, et d'vant long, tch'i' s'trouv'thaient en embarras. A ch'teu' nou peut vaie que j'avais raison de n'pas joindre le nombre de têtes-cratchies tchi s'trouvaient parmi tant d'nos membres d's Etats. En un mot, Moussieu, et nou peut aussi bein l'admettre, nos Etats n'peuvent pas faithe à lûs responsabilités et un individu tchi s'trouvthait dans la même situation s'sait bétôt sûs la route ayant yeu touos ses êffets vendus par le Sergent de Justice.
"Mais," s'fit la Merrienne, "pourtchi un minséthablye individu et non pas l's Etats, tchi sont responsablyes pour ch't' êtat d'choses? Pourtchi que l'Sergent de Justice ne peut pas faithe arrèt sûs yeux?"
"Parsque ma vielle," j'li raiponnis, "une communauté comme la nôtre ne peut pas être dêcliather banq'route, et le Comité des Finances n'a qu'une chose à faithe, et ch'est de hauchi les taxes. Le pièthe en est qu'en Dgernézi i' n'y a pas de tchestchion d'chonna, car lûs Etats n'ont pas 'té si inmbéciles comme les nótres. Ch'n'est pas souvent que j'approuve de Dgernézi, comme tu sais, mais chutte fais i' nos ont apprint une bouonne leçon".
I' faut que j'vos diche, Moussieu, que la Merrienne n'a pas 'té trop bein d'pis dimanche au sé, quand l'vent 'tait si fort qu'ou n'pouvait pas dormi. "I' nos est dit," ou s'faisait, "que d'vant la fin y'étha des têrriblyes tempêtes, des tremblyements de têrre et d'autres affreûses calamités. Crais-tu Ph'lip que chutte niet est le qu'mench'ment?"
"Chein que j'crais, vielle inmbécile," j'li dis, "ch'est que si tu continue, j'ithai couochi pour l'restant d'la niet dans l'êtablye ès bêtes. Là, au mains, j'éthai un mio de r'pôs, et si, par chance, tu as raison, et qu'ch'est la fin du monde, j'm'en ithai confortablye." Après chonna, Moussieu, j'n'entendis pas un mot.
Le temps s'est comporté mûs chais jour, Moussieu, et les brécolis ont bein miyeu mine, mais j'si d'la même opinion d'un correspondant d'la "Post" que l'inspection tch'a 'té ordonnée est une autre instance de l'habitude chais jours de certains comités d's Etats de s'mêler dans d's affaithes tchi n'les concerne pas.
A ch'teu', Moussieu, pour les êlections. Y'en a yunne en Ville pour la vacance créée par l'êlection pour Sénateur, quand l'Bill Perchard 'tait êlu sans opposition, et y'a deux candidats sûs les rangs. J'n'avons autchun intéthêt, la Merrienne et mé, dans chein tchi s'pâsse en Ville, mais y'a étout une êlection contestée dans la fameuse pâraisse de Saint Louothains, et je n'savons pas trop bein tchi en craithe. Ichin i'faut vos dithe que j'avons grand r'gret d'entendre que l'bouonhomme John Baudains n'est pas trop raide chais jours. Il a toute notre sympathie, et j'espéthons de le r'vaie mûs d'vant long. Quant à l'êlection pour Vingtnyi, j'laissons chonna ès êlecteurs tchi dev'thaient saver tchèsque est l'miyeu candidat. Pour dithe vrai, je qu'menchons à perdre intéthêt dans la politique, mais, avec chonna, j'si bein seux qu'a un an d'ichin, quand i'faudra quatre nouvieaux Sénateurs, j'éthons l'couothage de nos trouver à la Salle Pârouaissiale pour donner nos vouaix ès candidats tchi nos pliaisent le pûs. À la Trin'té je n'peux pas vais tchèsqu'i' s'en va opposer l'Sieur Vautchi pour la djobbe de Député. S'il li veint, et j'n'en doute pas, i' faudra une êlection pour le rempliéchi, et nou pouôrrait vaie la pâraisse divisée comme dans l'temps du Ph'lip Cabot, tch'aidgit à John Godiaux de battre le Colonel Nicolle, d'la Ville à l'Evêque, tchi l'considéthait d'san bord. Le Ph'lip n'aimait pas l'Colonel, et la séthée d'vant l'êlection i' fut faithe une p'tite touônée ichin et là dans la pâraisse tchi valut une doûzaine de vouaix au mains au John Godiaux et decidit l'êlection. Ch'tait d'même qu'un Connêtablye tchi 'tait populaithe (et Ph'lip Cabot en n'tait yun) pouvait gouvèrner l's êlecteurs. Et pâslant d's êlections à la Trin'té, j'me r'souveins ocquo d'la bordée que l'Alfred Mêsservy d'vint Connêtablye par une p'tite mâjorité: ses supporteurs ayant soûlé un nombre d'êlecteurs et l's aver gardés dans un solyi pour les empêchi de s'trouver à la Salle Parouâissiale en temps pour voter. I' s'en pâssait dans les bouons vièrs temps!
Une tchestchion tch'est bein lyien d'être décidée est la tchestchion de louôgements pour les pouôres gens. Le projet d'en bâti un nombre à Elysée dans l'Mont d'la Trin'té a 'té abandonné pour lé moment, après aver 'tait approuvé par l's Etats, parsque l'Comité des Finances n'peut pas, dans les présentes cironstances, produithe les djais mille louis tchi faudrait. Quand veindra l'mais d'avri notre Chancellyi étha sans doute tchiquechose à dithe là-d'sûs, mais nous-est seux que pûs d'yun des grands projets qu'nou-s-avait envisagi comme le tunnel souos l'Fort Régent, et la ville tchi 'tait pour être bâtie sûs l'haut, restethont au royaume des taupes. Le Comité des Finances, à ch'teu, étha à emprunter des sous et i n'les trouv'thont pas à chinq du chent, nou peut s'faithe seux d'chonna. I' n'peuvent pas espéther d'être hors d'embarras pour tchiques années, et, avec chonna, ils éthont à pratitchi de fortes économies. Mais le Sénateur John Le Mèrquand dit tchi s'en va faller une demié-douzaine de neuves êcoles, et s'i' les veur i' les f'tha bâti, quand i' n'y éthait pas un sou dans l'côffre-fort. Etout i' nos faut une autre prison, un autre problème pour le Comite des Finances.
J'avais l'intention, Moussieu, de dithe deux mots au sujet d'la visite de l'ex-Archevêque de Cantorbéry, mais la Merrienne a objecté, disant que Lord Fisher éthait fait mûs d'aller en Aur'gnyi pour tachi d'mettre la paix là.
A bétôt pour une semaine.
Ph'lip
Viyiz étout: