J'sis trop janne, mé, pouor aver des mémouaithes des vièrs sou - les ch'lîns et tout chenna. Mes touos preunmièrs acats fûtent faits auve chein qu'nou-s'app'lait à chu temps-là des “nouvieaux pénîns”.
Mais temps pâssé y'avait d's êtchus, des liards, des gros, des dginnées, d's êt'lîns, des dénièrs, des nobl'yes, des rieaux et des souvérains en or. Dans les touos vièrs temps, nou faîthait sèrvi les livres tournouais - d'l'ancien cours Français. Et né v'chîn pouortchi qu'j'avons not' mot Jèrriais “un louis” - les pièches Françaises avaient la fache du Rouai sus tch'avait tréjous nom Louis!
Mais au dgiêx-neuvième siècl'ye l's Êtats d'Jèrri c'menchîtent à produithe des cappeurs Jèrriais. Et pus tard, auprès la Preunmié Dgèrre Mondiale, les pièches Françaises n'avaient pus cours mais des boutitchièrs en Jèrri continnuaient à atchilyi les francs jusqu'à lus dispathition.
Mais d'pis lé preunmyi d'Janvyi 2002 y'a un nouvieau cours en Ûrope - l'ûro qu'douze pays ont adopté pouor rempliaichi lus billes et pièches à ieux - les francs Français, Belges et Luxembourgeouais, les marks Allemands et Fînlandais, les dgildèrs Hollandais, les ch'lîns Autrichiens, l's êtchus Portûndgais, les pesetas Espangnos, les livres Italiennes, les louis Irlandais, les drachmes Grècques.
Dans châque ûro y'a chent chents, coumme dé raîson, et châque pays a produit ses pièches auve des portraits partitchulièrs pouor ieux mais les billes ont les mêmes portraits d'ponts et dé f'nêt's pouor touos les pays. Y'a des pièches d'un chent, deux chents, chîn chents, dgiêx chents, vîngt chents et chînquante chents, un ûro et deux ûros. La pus p'tite bille est d'chîntch' ûros et la pus grande est d'chîn chents ûros - d'vièrs trais chents louis. Né v'là tchiquechose pouor lé vièr pid d'cauche!
J'éthons don un tas d'vîsiteurs à vouler changi lus ûros ichîn en Jèrri - et même les faithe sèrvi dans nos boutiques si les boutitchièrs veulent les atchilyi.
Et né v'là les francs, les drachmes et les pesetas et touos l's aut's dispathus coumme les liards, les deux-ch'lîns et les douze-sou. Adgi!
Viyiz étout: