Trenton, Michigan,
U.S.A.
Lé 6 d'mai, 1972.
Moussieu l'Rédacteu,
L's anciens m'ttaient lus sou dans eune vielle cauche sus l'haut d'la couochette dans lus chambre. Nou pouôrrait craithe tch'il' éthaient 'té en milyeu seûtheté dans eune banque, mais i' criyaient autrément et n'pathaissaient pon aver d'confianche dans les banques, p't êt' auve bouanne raison quand nou pense ès banqueroutes du temps passé.
Pour un cèrtain temps dans l'dgiex-neuviéme siécl'ye y'avait eune huiptantaine dé pèrsonnes associées tch'avaient l'toupé d's'appeler bantchièrs, et il' 'taient ordgillieurs d'aver lus billes en papi par les c'mîns. Ch'tait chutte racachie d'billes-là, sans aver assez d'or ou d'argent pour les souôt'nîn et garanti lus valeu en cas dé d'mande, tchi fît la majorité d'ches souôdisant bantchièrs-là lus trouver souos l'fou, à la pèrte des gens tchi lus avaient confié lus sou. En fîn d'compte, v'la tchi fit les banques Angliaiches v'nîn en Jèrri lus êtablyi.
I' ieut deux grand' faillites dé banques, ieune en 1873, et l'autre en 1886. La preunmièthe fut la Mercantile Union Bank de tchi Matthew de Carteret et Compangnie 'taient les propriêtaithes. Lé chef dé l'administrâtion (“chairman” en Angliais) fut condamné à chînq ans d'prison. La banque avait un déficit dé chent septante-siex mille louis, dé tchi trente-siex mille louis 'taient deues à la Jersey Joint Stock Bank, et v'la tch'aîdgit à mett' chette-là souos l'fou étout.
La faillite dé 1886 fut un d'sastre pour un tas d'Jèrriais. Ch'tait la Jersey Banking Company, dé tchi Nicolle, dé Ste. Croix et Compangnie 'taient propriétaithes. Lé déficit, en chiffres ronds, 'tait estînmé êt' dans l's envithons dé trais chent chînquante mille louis (d'après lé r'cit dans la “récapitulâtion” d'janvyi, 1886, dans l'almonas d' “La Nouvelle Chronique”). La drôle dé chose dans chu cas-là 'tait qu' Moussieu Ph'lippe Gosset 'tait l'trésôryi d'la banque en mème temps tch'il 'tait Trésôryi d's Êtats, et v'la tchi donnait l'împression au monde qué L's Êtats 'taient la garantie et l'souôtchein d'la banque.
Actuellement, i' faut dithe tch'i' y'avait des raisons pour la faillite. La banque avait souôt'nu les Robîns dans lus entréprînses dé la pêque à Tèrreneuve, et la pêque avait souffèrt hardi par l'arrivée sus la scène des navithes à vapeur. Des épidémies d'choléra dans cèrtains pays avaient empêchi nouos navithes d'aller vendre la mouothue là, et d's êtés d'plyies avaient empêchi la mouothue dé stchi dans l'temps voulu, et les Robîns ieux-mèmes avaient failli.
Ch'fut eune vraie tragédie pour lé Sieur Gosset. L'affaithe quémenchit lé 11 janvyi, 1886, dans L's Êtats, quand Moussieu l'Bailli fit part à la séance tch'i' v'nait d'èrchéver eune lettre du Trésôryi Gosset lî annoncant qué, faute dé fonds, i' n'pouvait pon payi les coupons sus la dette publyique. Un Conmité fut nommé pour exanminner les raîsons pour ch't “êtrange communicâtion-là” et pour prendre les m'suthes nécessaithes pour maint'nîn l'crédit d'l'Île întacte. Chu jour-là, la faillite dé le grand' maîson d'conmèrce C. Robîn et Compangnie fut annoncée, et l'préchain jour la cheinne dé la banque dé Mêssieux Abraham dé Gruchy et Fis, tchi d'vait eune somme considéthabl'ye ès Împots d'l'Île.
Ches banqueroutes fûdrent lé sujet des dêbats dé toute la séance des Êtats du 14 janvri, et l'Avocat-Général Turner, l'Greffyi, et l'Avocat Baudains fûdrent nommés Mandataires dé la Chambre. Ch'tait l'préchain jour, lé 15 janvyi, qu'Moussieu Gosset fut arrêté. L's êvènements s'passîdrent vite. Lé lendemain, 16 janvyi, la Cour Rouoyale prononcit des d'sastres sus les beins des deux Trésôrièrs publyiques, Mêssieux Gosset d's Êtats et Nicolle des Împots, et les banqueroutes otchupîdrent acouo toute la séance des Êtats l'dgiex-huit du mais. Lé 21, Moussieu Gosset fut présenté d'vant la P'tite Cour.
Lé 6 d'févri, des d'sastres fûdrent prononcés par la Cour Rouoyale sus les beins dé chînq des actionnaithes dé la banque en faillite, Mêssieux dé Ste. Croix, Cliément, lé Gallais et Lé Bro. Deux jours pus tard, les Juges du Heaume et Nicolle rêsignîdrent du Banc d'Justice. I' fûdrent am'nés d'vant l'Tribunal de preunmyi d'mar. Dans l'entrétemps, Moussieu Gosset 'té présenté pardévant la Cour Rouoyale et avait pliaidgi non-coupabl'ye et avait 'té env'yé d'vant L's Assises Crînminnelles. I' fut trouvé coupabl'ye, et lé 8 dé mai, 1886, i' fut condamné à chînq ans d'prison ès travaux forchis et fut env'yé les faithe en Angliétèrre lé 28 dé mai.
Les ex-Juges du Heaume et Nicolle eûdrent miyeu chance. I' fûdrent dêcliathès non-coupabl'yes ès Assises du preunmyi d'septembre. Jé n'sai pon si l'Sieur Gosset ervînt en Jèrri à la fîn d'ses chînq ans d'prison.
Les faillites am'nîdrent la fîn des banques Jèrriaises et fûdrent l'occâsion d'l'êtablyissement des banques Angliaîches tchi sont acouo auve nous au jour d'aniet. Mais i' m'sembl'ye qué l's anciens avaient tchique justificâtion pour lus idées qu'eune vielle cauche en d'ssus d'la couochette 'tait pus seûthetabl'ye qué les banques dé lus temps!
George d'La Forge.
Viyiz étout: