J'tais a lus dounné un coup d'main, l'aut' matin, a netti la machine et a met' tout en r'pathe pour le travas du sé, quand ne v'la yun des apprentis qui m'criyit qu'y'avait tchiq'un qui me d'mandait dans l'Office. Ch'tait Douard Ouitté, d'la Fosse au Lecteu, pour vaie si l'Boss pouôrait m'èspeignyi pour allé lus dounné un coupo d'main a lus bat'tie d'grain dans l'clios a Sam Pithouet, au Carfour ès Mérgots.
"Ou comprannez, Moussieu, qu'Douard dit au Boss; y'a d's'années qué j'soummes accouôtumés a avé Piteur a nos bat'ties; coumme forgeux, y nos est utile si tchiq'chose dèshouque dans l'engin."
L'Boss dit qu'a condition que je s'ais r'venu en temps pour lus aidji a imprimé, d'viers minsniét, y voulait bin; mais d'avé a vaie a n'pon m'laissi trop rôdé a l'entou d'la jougue a ielle.
L'affaithe 'tait deja en allant quand j'arrivi. Ils 'taient a battre le blié a Clem Renon, et coumme n'y'avait pon assez d'vans pour emporté s'n'èstrain a m'zuthe, nou l'tassait a côté. Ch'tait un faillyi tasseux qu'ils avaient mins d'sus, et y'avait dèja d's'appias du bord d'la cressounniethe. Ma 'job' en q'menchant fut d'souognyi les pouques a grain, et ch'tait eunne aisie 'job' car n'y'avait pon grand grain - pas pus d'huit cabots la perque, a ch'qui disaient; et oquo il 'tait pus-a-co mucre et mouëzi. Quand j'eumes fini l'blié, Douard Ouitté nos versi eunne touônée d'litcheu; d'l'ieau-d'vie a trente-siex sous l'gallon dans tchi il avait fait bouollyi du pouothét et fondre du rigolisse. D'fameuse bouésson pour les fagoteurs; mais mé, tant qu'a bethe ditet, j'aime autant un verre de bouonne paraffine.
D'viers douze heuthes, coumme tout allait rondment et qu'tout l'monde s'moustrait d'san mus, né v'la tchiq'un qui pousse un grand brai du bord d'la créssouniethe. J'couothîmes vaiue tchés qu'y'avait. Ch'tait eunne 'van' qu'avait houtchi yun d's'appias du tas d'èstrain a Clem Renon, et tout l'tas s'etait èstrueûllé. Et y'avait tchiq'un d'sous! qui criaient! Nos v'la tous, coumme des fos, a èsrachi l'èstrain ov des frouques, ov nos mains, n'y'a pon d'soin coument, pour tachi d'sauvé l'sien qu'etait d'sous d'vant qui n'fûsse èstouffé! quand ne v'la la clioche qui sounne pour dîné.
"A la soupe, garçons! s'fait Douard. Allons vite! faut s'dèspechi, l'temps m'niche!"
Et j'nos ent'dîmes, qu'en èsfet, y'avait des squalles au nor-ouès, et qui pouorrait bin tchée tchiq'chose.
"L'sien qu'est la d'sous n'enhan'na pon pour eunne heuthe" tchiq'un dit. Et j'nos en fûmes dîné.
J'dinîmes bin, oh! faut l'dithe. Y'avait eunne rouëlle de boeu, des patates, des paids-d'mai a chiv'thée, des bet'raves, sans pâslé d'un podin-d'riz dans un bachin, et eunne pliat'lée d'lait èsputhé ov du jaune chucre. Des bouq'tées d'cidre, et d'la limounade pour Tom Louothains qu'est teetôtleur eunne s'maine entre autres. J'taimes ronds et rouoges quand j'eûmes fini.
En sortant d'tabye, tchiq'un dit qu'nou pouorrait aussi bin se r'mettre a fouollyi souos l'èstrain pour chu fagotteux, mais: "Hourras! garcons: faut d'dèspechi, s'fit Douard; y'a d'la mucreu dans l'temps, et j'avons oquo douze vrégies a battre." J'nos y minmes don a tige-de-corps; tout l'monde s'dèspechait d'san mus, la machine ronfliait, et les fagotteurs n'arretaient pon. J'adounnîmes justement a en r'pathé coumme la niet vint; et coumme tout l'monde etait bin lassé, nou s'lavi deux coups a la pompe, et nou s'mint a soupé. Coumme y faisait néthe niét quand j'eûmes fini d'soupé, et qu'j'ethait 'té danj'reux d'travaillyi atouôre d'un tas ove des lanternes, y fut conv'nu que l'sien qu'etait d'sous y restethait bin oquo tchi' temps sans s'pliendre, et que Clem Rnon vaindrait d'bouonne heuthe le lend'main tchéthié s'n'èstrain et dèsterré l'sien qu'etait d'sous.
J'n'ai pon oui tchès qui s'est passé d'pis. Ont y trouvé l'houmme? 'tait y mort? tchès que ch'tait? et tchès qu'héthit'ta d'li? j'n'en sait rin! et ch'n'est pon d'mes affaithes.
Piteur Pain
Viyiz étout: