Maît'e Dan Lêcaudey est quâsi fo
Chute feis dja, Maît'e Dan Lêcaudey est quâsi fo! Il a vint-chinq vrégies d'patates à plianter, et i' n'en a pas oquo iune en terre.
D'la plyie, d'la plyie touos les jours, qui met sa terre comme la vâse dans la cauchie à la mé basse,
Et dame, i' n'y' a pas moyen d'y touchi.L'aut'e jour, qu'i' fit un mio bé i'voulait êprouver mais sa jument y enfonçait jusqu'au genou et la terre cliuttait sus la couvertuthe de sa tchéthue justemant comme du mortchi.
Maît'e Dan ersêrri tout pardedans et est bain dêterminé de n'mettre pas une patate dans la terre devant que l'temps change et qu'la terre sait en êtat, quand i'dev'thait attendre jusqu'au c'menchement d'Avri.
San vaisin, Dâvi l'Bôtcheux est â faithe tout l'contraithe, li, i' pliante quâsi touos les jours, qu'i' faiche le temps qu'i' voudra et si y a chouaix, sa terre est oquo pus forte que la sienne à Dan Lêcaudey, et l'bouonhomme dit que ch'est folie de faithe ditèt, et qu'il ést grand temps que Dâvi ait un tchuthateur de nommé.
Mais les choses déveinnent sérieuses quand même, et comme je vos ai dit Mess Lêcaudey est de bain mauvaise humeur tout chu temps ilo. I' faîlli d'assommer un villais l'autre jour, qu'eut l'malheur de li d'mander l'êternelle tchestion que les villais d'mandent tréjous ès campagnards "Est-ous avanchi d'plianter?"
Maît'e Dan s'imagini que l'autre était à s'fichi d'li, et i'li dit rupêement, "Vos pliaît-il aver la bonté d'vos mêler d'vos affaithes? je n'vos d'mande pas comment qu'ou êtes à condithe votre commerce, mé, j'fais-ti?"
* * *
Jeudi au sé, je fus invité d'aller à un concert dans la pâraisse du bouan berger, un concert organisé par Ertu l'Feuvre de Don Road pour le bénéfice du football Club de St.-Pierre.
Le programme était délicieux et bain chouaîsi, chaque artiste s'atchittant d'sa tâtche à merveille.
Malgré l'mauvais temps qu'i' faisait le Parish hall était rempli. Les St.-Pierrais, dans l'général, apprécient un bouan concert, mais je voudrais protester contre la manièthe qu'une certaine section de jeunes gens dans les sièges de drièthe se comportent habituellement.
Duthant l'exétchution des difféthents itêmes, avec un mauvais goût et un manque de respé envers les artistes, i' s'permettent de souostenin, à haute vouaix, une conversation continuelle et faithe des rigolades imbéciles, au grand dêrangement des artistes, sans pâler des auditeurs comme i' faut qui cherchent en vain d'apprécier les êfforts des dames et messieux qui sont à faithe de lus mus pour les diverti.
I' n'y a rain d'pus péniblye pour un artiste que d'aver a donner une réprésentation souos d'patheilles circonstances, Jeudi au sé, un moussieu qu'était à jouer l'piano, vint si ennié du sabat au fond d'la salle, qu'i' fit la seule chose possiblye souos ches conditions-là. I' tchitti tout court et se r'tithi.
I' y avait pourtant plusieurs membres de la police présents et nous aithai creu qu'i' se saient dêrangis un mio pour garder l'ordre et empêchi patheil état d'choses.
Un bouan plian est d'attraper iun ou deux des pus coupablyes par la pé du co et d'les fliantchi à la porte. J'ai veu chenna s'faithe une feis ou deux, et ch'est, comme dithait l'Chef, "un remède très-efficace."
A bon entendeur, salut!
Caouain
10/3/1923
Viyiz étout: