Les Pages Jèrriaises

Ronde

Nou n'entend pus la cadence
Des danseurs sus les pllanchais;
Nou n'entend pus la cadence
Des batteurs atou lus fllais.

Au llieu d'la vieille routine
Au fllais de battre sen grain
Nou se sert d'une machine
Qui ne fait que de l'estrain.

Nou ne vait pus de fouories
Comm' nou faisait dans men temps
Nou n'entend pus es sciêries
Rcorder touos les anciens chants.

Nou ne feue pus qu'es foyeres,
La grand quérue touanne tout;
Par la nouvelle mangniere
Le grain s'havoque l'avou.

Nou n'se sert pus de frouquette
Pour sercllir dans les panais,
Mais nou fait servir la houette
Pour raves, carotte, et navets.

Nou n's'assied pus à la veille
Les longues serèes d'hiver;
La journée de la serveille
Qu'est qu'a l'air de le saver?

Nou pâle de tempérance,
Nou prétend être r'ligieurs;
Nou n'chante pas pu qu'nou n'danse
Mais nou n'en est pon millieurs.

En viyant comme le monde
N'sait pus sus qui pid danser,
Nou doute si la terre est ronde
S'il est vrai qu'ou peut touanner.

P.L.
27/11/1873

 

Vèrsion modèrnîsée:

Ronde

Nou n'entend pus la cadence
des danseurs sus les plianchais;
Nou n'entend pus la cadence
des batteurs atout lus fliais.

Au lieu d'la vielle routinne
au fliais dé batt' san grain,
nou sé sèrt d'eune machinne
tchi n'fait qué dé l'êtrain.

Nou n'vait pus dé fouôthies
comme nou faîthait dans man temps
Nou n'entend pus ès sciêthies
r'corder touos l's anciens chants.

Nou n'feût pus qu'ès fouoyéthes,
la grand tchéthue touônne tout;
Par la nouvelle manniéthe
lé grain s'havoque l'avoût.

Nou n'sé sèrt pus d'froutchette
pouor sèrclyi dans les pânnais,
Mais nou fait sèrvi la houette
pouor raves, cârotte, et navets.

Nou n's'assied pus à la veil'ye,
les longues séthées d'hivé;
La journée d'la sèrvelle,
tch'est qu'a l'air d'lé saver?

Nou pâle dé tempéthance,
nou prétend êt' èrligieurs;
Nou n'chante pas pus qu'nou n'danse,
mais nou n'en est pon miyeurs.

En viyant comme lé monde
n'sait pus sus tchi pid danser,
nou doute si la tèrre est ronde
s'il est vrai qu'ou peut touônner.

 

Viyiz étout:

 

Les Pages Jèrriaises