à Portinfé, Saint Ou.
Vendredi au sé.
Moussieu l'Editeu,
Les fermiers et les tchultivateurs n'ont pas d'chance ch't année, les pouôres balloques, car jusqu'ichin tout ch'qu'ils ont êprouvé a touôné mal. Y'a des chents milles tomates tchi n'paiethont pas lûs frais, et quant ès flieurs, j'crais que nou peut en dithe autant. Ou m'dithez que y'a ocquo les brécolis, et ch'est vrai tchi pouôrraient sauver la situâtion, car le temps lûs a 'té favorablyes, mais ch'est ocquo une chance. A prendre yun dans l'autre, Moussieu, je n'crais pas que si j'tais jeune homme j'me mett'rais à fermer. Je d'veindrais fonctionnaithe, car nou-s-a d'bouons gages et une bouonne pension et nou n'est pas en dangi d'être mînt à la porte. Ou bein je d'veindrais Ministre, et tchique jour j'éthais une pâraisse, et je s'sais bein pour l'restant d'ma vie. Tchèsque-ous en dites, Moussieu? Si ch'tait vous, tchèsque-ou f'thez?
Les Etats ont ratifié le paiement de chinq mille louis par an pour trais des quatre êtages de Mayo House, dans Conway Street, et je m'imagine tchèsque le Tom Mayo en dithait s'i' pouvait r'vénin à la têrre.
Ch'est la saison des vêpres, Moussieu, et par ichin plûsieurs personne ont 'té attatchis par les sales bêtes. Ch'est bein drôle que la Providence ait donné tant d'pouvé à chais malheutheuses însectes. La femme de yun d'nos vaîsins a 'té blessée trais ou quatre fais à travers de ses habits dans une partie d'san corps que je n'm'en vais pas mentionner, et oulle a souffert hardi, la pouôre garce.
Pâslant d'autre chose, Moussieu, quantchi qu'nou s'en va saver combein que y'étha d'candidats pour Sénateurs à l'élection tchi n'est pas lyien à ch'teu'? Une chose tchi pathait certaine ch'est que y'étha pûs d'candidats que d'vacances, et que j'nos f'thons le pliaisi, ma bouonnefemme et mé, d'aller à la Salle Pârouaissiale pour voter. J'espèthe de vos en dithe pûs long qu'vous ou la vielle vaque à man vaisîn, tch'a donné djais-neuf vieaux, et tchi pathait prête à en donner ocquo une vingtaine.
Nou-s-est content d'vaie que l'prix du lait a hauchi un mio, mais hardi d'nos fermiers affirment ocquo que même avec le nouvieau prix le lait n'paie pas. Y'a des gens tchi disent que quand nos fermiers s'sont satisfaits la fin du monde ne s'sa pas lyien. Criy-ous qu'ch'est vrai, Moussieu?
Ph'lip
12/10/1963
Viyiz étout: