Dépis la grande réunion d'fermiers au Oddfellows' Hall Lundi passé en huit quand i' y eut une espèce de conférence entre les délégués du Gouvernement, le Comité pour la Défense de l'Ile et les agriculteurs, mes ammins campagnards n'ont presque pas pâlé d'aut'e chose à l'exception, peut être, de la Louai Militaithe.
La majorité du monde dithait peut-être que ch'est une chose bain indiscrète que d'publier une conversation, qu'était supposée d'être pus ou mains “private” et qui t'nue par deux messieux qui n'se doutaient djéthe qu'i' y avait un êcouteux ès portes dans la personne de Caouain.
Mais tch'est qu'ou voulez? Si ch't ouaîsé-là n'êcoutait pas ès portes quand l'occasion s'présente, iou qu'ou criyez qu'i' ramas'sait d'la copie toutes les s'maines?
Ch'tait deux fermiers que j'appel'lons pour le moment “Nick” et “Tom.”
Tom dit à Nick: “Tu n'tais pas au grand “meeting” l'aut'e sé.”
“Nan dja! J'n'en savais pas un mot sinon quand j'en vi l'rapport dans la gâzette le lendemain et pis quand-même, j'étions à plianter chu jour-là et j'étais trop lâssé quand vint l'sé pour m'en aller couorre en ville.”
“Eh bain, man vieux, tu mantchi un “treat,” tu pâles d'orateurs, mais ch'est qu'i' en avait! Et pis de touos les calibres, mais ch'qu'y avait d'bon i' n'entamidrent pas, comme i' y en a qui font tchiquefais, des choses tout-à-fait au d'sus d'not'e portée, i' pâlithent de patates, et raique des patates, toute la séthèe. Quand ch'est d'même nou s'sent que nous est oquo siez-sé, au mains. Quand vint un temps i'y en avait treis ou quatre début au même instant, et ch'tait au sien qui prendrait la pathole. Ma fé, sinon que l'président c'menchi à aver la mîne impatient, je crai que j'y séthions oquo.”
“Mais,” s'fit Nick, “racontes-nous chonna don. Comment que l'affaithe s'emmanchi?”
“Eh bain, le souos-Comité pour la Défense de l'Ile était sus la strade, et i' y avait ettou deux Officiers en uniforme qu'avaient 'té enviés par le Gouvernement angliais pour nouos dithe qu'ils aithaient besoin de 23,000 tonniaux d'patates dans l's envithons d'la St.-Jean. Le prix, souaidisant, es'sait huit louis, chinq chelins l'tonné de cliai, sus la cauchie. Moussieu Perrée nouos dit, li, que dans s'n opinion che s'sait une magnifique affaithe et que si ch'tait à li toutes les patates de Jêrri i' s'sait prêt à les vendre à chu prix-là.” “Sans doute! et mé ettou. Seulement à djaix chelins d'profit la vrégie, v'là qui f'thait dêjà une belle petite somme! Mais l'fermi qu'en a vingt vrégies, li, v'là qui n'li f'thait que djaix louis pour s'n année d'travas tout d'même!”
“Vaithe, ch'est bain vrai chenna, quand nou caltchule la chose de même.”
“Eh bain, est-che qu'i n'y en eut pas autchuns d'entre vous qu'eurent le couothage de protester contre une patheille proposition?”
“Oh oui, le pouore George se d'battit du mus qu'i' pu, mais i' n'fut pas souôtint. Tu vai nou sentait que l'affaithe était toute arrangie de d'vant, et oquothe au but d'tout nou n'peut pas bain opposer l'Gouvernement, sustout en temps d'dgerre. I' peuvent gaffer toutes nos patates s'i' veulent, et à lus prix.”
“Ah bain en v'là ettou! Tu n'dis pas rain té, j'pense bain!”
“Oh nan dja, je n'vaut rain à pâler en public mé, je sis trop nerveux!"
"Sans doute, tâs d'mollusques qu'ous êtes, suffit qu'ches messieux-là étaient en uniforme, ch'tait assez! Ous étiez prêts à l'ver les bras en haut et, commes les Boches crier, “Kamerad, Kamerad!” Mais arrêtez un mio, la gazette n'a fait auchune mention qu'un arrangement fut fait, et je n'vai pas, mé, que j'nos sommes liés d'auchune maniéthe. Il est vrai qu'ou donnîtes “Three Cheers” et qu'ou chantîtes “God Save the King” mais ou pouvez chanter par ouest que je m'en vais baîlli mes patates pour djaix louis la vrégie d'mains qu'i' n'me couôtent!
Ch'qui y a d'bouan mes terres sont un mio heuthives et je t'garantis que mes patates volelont longtemps d'vant la St.-Jean!”
Mais là d'sus Tom raîponni: “Tu crai don tout bouannement que l'Comité d'la D'fense est né d'aujourd'hui! Tu t'en vas aver des formes à remplyi et tu verras que tu aithas à contribuer ès 23,000 tonniaux tout comme les autres.”
“Ah! j't'en fiche dja!” s'fit Nick, et i' s'mins à juther comme un perdu.
Les grosses patholes me firent peux à mé, ch'est pourtchi je réalisi qu'il 'tait grand temps d'filer, car je viyais bain qu'i' s'en allaient aver du brit, et je n'voulais pas être prins comme têmoin.
Caouain
1917
Viyiz étout: