“Eh bein, man Ph'lip,” s'fit la Merrienne hier au sé, après avé liut la gâzétte, “je s'y pûs convaintchue qu'jamais chais jours que nos Etats n'savent pas tchèsqu'y font.”
“J'avons décidé chonna y'a dêjà longtemps, ma vieille,” j'l'y dit, “mais tchèsqu'ils ont fait chutte fais pièthe que d'couôtume?”
“Ils ont décidé d'accaté la férme à Saint-Pierre, nommée La C'mune, tch'appartenait aut' fais au célèbre Jack Martin,” ou dit.
“Mais pourtchi pas?” j'l'y d'mandit. “Si la férme est à vendre et que l's'Etats sont prêts à péyi chein qu'ou vaut?”
“Ch'est justement chonna,” ou dit, “la férme n'est pas à vendre et l'otchupant r'fûse de sorti.”
“Oh,” j'l'y dit, “si ch'est d'même, l's'Etats n'peuvent pas l'accaté. Après tout, même de nos jours, quand nous entend tant de drôles de choses, un férmyi n'peut pas être forchi de tchitté sa têrre contre sa volonté.”
“Ch'est justement là ouèsque tu t'trompe,” ou dit, “car l's'Etats s'en vont nommé un comité pour êvalué la férme, et l'otchupant étha à accepté lûs êvaluation et fichi san camp.”
“Grand doux d'la vie!” je m'fit, “chonnechin ch'est tchiquechose de nouvé. Et pourtchi que l's'Etats veulent la férme?”
“Ch'est à cause de la neuve route tchi couôrra au airport,” ou dit. “Y pathait qu'la maison pouorrait endangi les machines allant et v'nant; ch'est-à-dithe, accordant au Sénateur Krichefski, tch'y fait tréjous comme y veur, oulle est à la vaie et y faut qu'ou dispathaie. Y'en eut trais tch'y votitent contre, et yun d'yeux 'tait l'Sénateur J. J. et un autre notre Député. Je n'l'ai pas tréjous admithé, l'Mâjeur de Gruchy, mais chutte fais il avait raison. Malheutheusement, il en dit p't'être un mio trop long et la Chambre ne l'print pas sérieusement?”
“Comme de couôtume,” j'l'y dit. “Sans doute y fit mention d'l'Empire Britannique.”
“Y dit chein tchi l'y veint dans la tête,” ou dit, “et ch'est dêjà tchiquechose. Mais Ph'lip, tchèsqu'y t'a dit que yun d'chais jours le Comité d'l'Airport ne voudra pas faithe une route à travers de ta férme?”
“Damme!” j'l'y dit, “chonna che s'sait une autre chose. Si voulais m'forchi à vendre, j'laiss'sais l'tchan à banon, j'chérgethais man vier boucagni et j'lév'thais la Cliameur de Haro. Bein seux, s'y m'offraient mille louis la vrégie pour la têrre nette et un couplye d'milles pour la maison et l's offices, j'pouorrais r'considéthé, mais ils éthaient en même temps à m'trouvé une autre férme aussi bouonne comme chettechin, et péyi man louage pour tchiques années. Enfin, ch'n'est pas la peine d'en pâslé, Merrienne. Y'a-t'y aut'chose tchi t'gène?”
“Oui, Ph'lip,” ou raiponnit. “Y'a la tchéstchon d'chais patates irlandaises. Tout l'monde sait qu'y'en a des tonneaux dans l'île, et je n'sommes pas sans savé, té et mé, que notre Bram en a une quantité à plianté, mais y pathait que dans l's'Etats y'a hardi d'membres tch'y sont pour la vieille Royale, et contre autchune autre variêté. Ach'teu tchèsqu'y s'en va dév'nin de toutes chais irlandaises si l'exportâtion n'est pas pérminse? Nou n'pourra pas les donné ès couochons.”
“Y faut arrêté à vais,” j'l'y dit, “mais je crains bein que y'étha du drôle de travâs d'vant la fin. Y n'faut pas oublié que si l's'Etats n'voulaient pas pérmettre l'exportâtion, ils éthaient deu empêchi les patates d'entré dans l'île.”
“Sans doute,” ou dit, “mais quantchi qu'tu'as veu l's'Etats avec un mio d'bouonsens? Sais-tu bein, Ph'lip, j'ai une idée.”
“Ah!” je m'fit, “et tchèsqu'oulle est, chutte idée? Tchiquechose de brilliant, sans doute.”
“N'te fiche pas d'mé,” ou dit. “Sans mes idées dans l'couothant d'notre vie, j'éthons 'tait à l'hôpita y'a longtemps. J'm'en vais siez l'Bram d'main-au-matin, et j'l'y donnethais avis d'vendre chais patates irlandaises au Cyril Le Mérquand et à san couôsin John. J'ai tréjous comprint que pour engraissi des pouchins y n'ya rain comme des patates bouollies.”
J'eut à rithe, Moussieu. “Une miyeu chose tch'y pouôrrait faithe, bouonnefemme,” j'l'y dit, “che s'sait d'nos en envié un tonné, ou d'même, pour encouothagi tes poules à nos donné tchiques oeux. Je l'paiethais si les oeux v'naient, mais autrement y pouôrrait sufflyié pour ses sous. Après tout, si nou prend la peine d'avé un fils, ch'n'est qu'juste tch'y nous aide dans nos viers jours.”
“Le Bram t'a aidgi bein des fais,” ou dit, “mais je n'crais pas tch'il est si bête comme chonna. As-tu 'tait vais tan bétchet agniet?”
“Oui,” j'l'y dit, “et la preumié chose à-matin y m'sembliait que j'pouvais vais le but d'un jét tchi pérchait la têrre, mais ch't'arlevée il avait dispathu. Sans doute y n'aimait pas à s'trouvé sans compagnie.”
“Pûs probablye,” ou s'fit, “y'tait comme san maître. Y qu'menchait une djobbe, mais s'lassait d'vant pouvé la fini.”
Ph'lip
1959
Viyiz étout: