Les Pages Jèrriaises

Lé Brancage

 

Lé Brancage
La vîsite du brancage à St. Hélyi en 2000

 

"Brancage" - ch'est eune pathole Jèrriaises qué même les cheins tchi n'pâlent qué l'Angliais connaîssent (ouaithe qué chenna s'êcrive officiellement à la manniéthe Française: "branchage" - ch'est tréjous prononcé à la manniéthe Jèrriaise).

Mais tch'est qu'ch'est?

Deux fais par an en Êté, l's autorités Pârouaîssiales daivent faithe lé tou des c'mîns dans châque Pâraîsse pouor vaie si les gens ont bein trînmé lus banques et fôssés.

Ch'est bein înmportant pa'ce qué nos c'mîns et ruettes sont êtraites et s'i' n'y'avait pon d'brancage les rues s'saient compliétement bliotchies par les pliantes et l'hèrbe.

Duthant la s'maine d'vant la vîsite du brancage, nou vait les gens à travailli dans les rues à coper les branques, les fielles et l'hèrbe. Les vîsiteurs lus d'mandent parfais pouortchi qu'les gens font chenna, mais quand i' sont à marchi ou à pédaler l'long des c'mîns et qu'l'hèrbe a crû si longue qu'ch'est vraînment un dangi pouor les pâssants, i' réalisent l'înmportance dé faithe lé brancage deux fais en Êté.

 

Lé Brancage
La vîsite du brancage à St. Hélyi en 2000

 

Quand les branques des bouais par d'ssus les c'mîns craîssent trop bâsses, i' faut les faithe coper à seule fîn qu'les grands boulants (les beusses, les ouadgîns, les vainnes) piêssent cirtchuler sans problièmes.

Quand l's autorités font lus touônnée d'la Pâraîsse pouor vaie si les gens ont fait lus brancage, il' ont eune m'suthe pouor m'suther la hauteu des branques pouor vaie si ch'est tout en bouan ordre.

 

Lé Brancage
La vîsite du brancage à St. Hélyi en 2000

 

I' faut m'suther la rue étout pouor vaie si la bouanne largeu a 'té présèrvée.

Nou-s'înspecte les muthâles et vait s'i' y'a autcheun problième sus les rues.

Lé Connêtâbl'ye, l's officièrs, lé Contrôleux, les membres d'la Conmité des C'mîns et d's empliyés d'la Pâraîsse lus assiévent dans des minibeusses pouor faithe la touônnée. Quand nou vait un problième ou tchiquechose qu'nou crait d'ver êt' înspecté ou m'suthé, nou d'vale, nou m'suthe, nou distchutte et nou prend eune dêcision.

Lé brancage, ch'est eune partie d'l'héthitage dé Jèrri et eune bouanne tradition. Mais ch'n'est pon p't-êt' l'avis des cheins tchi r'chèvent eune amende pouor l'brancage pas fait!

 

Lé Brancage
La vîsite du brancage à St. Hélyi en 2000

 

 

Viyiz étout:

 

Les Pages Jèrriaises