Viyiz étout:
Au Portinfé,
Jeudi-au-sé.
Moussieu l'Editeu,
La Merrienne, ayant liut le long rapport des Etats dans la gâzette, Mardi-au-sé, se r'mint à lièthe pour la deuxième fais la distchussion tchi mantchit d'envié le Comité d'Agritchultuthe à lûs promné.
Quant oulle eut finit: “Trais vouaix, man Ph'lip, ch'n'est pas grand'chose. Y sembliéthait qu'ya hardi d'membres tch'y n'approuvent pas des actions de chu Comité.”
“Et tu'as r'mértchi, sans doute, ma vieille,” j'l'y dit, “que les trais membres de Saint-Louothains, la pâraisse que tu admithe tant, 'taient parmi yeux.”
“Vèthe,” ou dit, “et ch'est pour chonna que j'voudrais savé tchèsque le Comité ont fait pour méthité lûs opposition.”
“Ch'n'est pas chein tch'ils ont fait, mais chein tch'y n'ont pas fait,” j'l'y dit. Y pathait que les férmiers ont pérdu des milles louis tout simplyement parsque l'Comité n'a pas êtudié lûs intéthéts, et à ma veue, le Sieur Baal et ses collègues dév'thaient abandonné l'affaithe ach'teu, car seux et certain le jour veindra, et d'vant long, quand y s'trouv'thont dans la minorité.
“Sûs chu point-là,” j'continuit, “nou n'peut pas oublié que pour bein d's'années ch'na pas tait une bordée d'fun que d'être Président d'chu Comité. Nous en a veu arrivé, et nous en a veu sorti. Nous admit étout que les férmiers de l'Ile sont hardi à biaumé, car y n'sont jamais tous d'la même idée. Le Sénateur Krichefski, tch'y fit un raide bouon Président, sans avé jamais trait une vaque et sans pouvé dithe la difféthence entre une g'niche r'nouv'llée et une vieille vaque, fut bein content de s'dêfaithe d'la djobbe parsqu'y n'pouvait jamais s'fié que ses collègues le supportethaient, et che s'sa d'même tandis qu'y'étha du férmage en Jêrri. Montre-mé touos les férmiers de la même opinion et d'la même idée, et j'te montrethai le pûs grand mithaclye que l'monde aie jamais veu.”
La Merrienne r'mértchit que l'Sénateur John Le Merquand avait yeu hardi à dithe.
“Bien seux,” j'm'accordit, “mais avec chonna, nous n'voudrait pas dithe, avec tout l'réspect qu'nou l'y dait, tch'il est yun des miyeurs férmiers de l'île. Le Député Gaudin étout éthait voulu expédié l'Comité, mais je n's'y pas si seux tch'il éthait voulu sérvi sûs l'préchain. Quant au Sieur Baal, le Président, y fit d'san mûs pour explitchi que l'Comité avait fait tout pour le mûs, mais nou n'peut pas dithe tch'y réussit. Sinon pour les Députés d'la Ville et les membres de san Comité ch'tait une affaithe fichue.”
“Ch'est une drôle de situâtion,” ou dit. “Nous éthait creu qu'en fache du ménace du Tourisme, nos férmiers éthaient yeu pûs d'avis que d'être tréjous en brit. Par chein qu'nou vait sûs les gâzéttes, ch'n'est pas d'même en Angliétêrre.”
“Nan,” j'l'y dit, “mais en Angliétêrre le gouvernement aide ès férmiers et les garantie contre autchune pérte pour bein tch'y férment comme-y-faut. Mais ichin ch'est l'contraithe, et un pouore balloque de férmyi, tch'a mauvaise chance et tch'y n'peut pas péyi est mint à la route.”
“Ch'est vrai,” ou dit, “et pourtant quand il est tchéstchon de voté d's'immenses sommes pour le Tourisme y n'ya autchune diffitchulté! Combain qu'chu casino s'en va nos couôté, par éxemplye?”
J'l'y dit que par chein qu'nous en viyait, l's'Etats n'taient pas en faveur d'un casino, mais ou châtchit la tête.
“Tu peux craithe chein qu'tu voudras,” ou dit, “mais quand l'jour veindra pour une décision, et que l'Sénateur Krichefski êlourditha l'Assemblyiée par s'n' êloquence, tu vêrras tch'il étha sa volonté. Touos l's hoteliers sont d'avec l'y, et tu peux t'fié qu'les Députés d'la Ville, sinon p't'être le Révérend Rider, vot'tont pour.”
“Et Saint-Louothains?” j'l'y d'mandit.
“Contre, bein seux. Est-che là un tchéstchon à d'mandé. Mais après tout y n'sont qu'trais. Y dév'thai y'avé au mains djais-sept Députés à Saint-Louothains et étout à Saint-Martin, épis nou vêrrait l'île bein gouvernée.”
“Mais, ma pouôre fille,” j'l'y dit. “Dis-mé tchèsqu'y fait toutes les bêtises, si ch'n'est pas yeux. Y'en a douze et ch'est douze de trop. Va vais ès bêtes tandis que j'préparthe le soupé.”
J'l'y d'mandit, Moussieu, tchesqu'ou s'en allé nos donné, mais ou n'voulit pas m'dithe. Chein qu'ou fit ch'tait d'gaffé la cast'role.
Ph'lip
1959