Les fermiers de Jerri sont des ingrats.
I'n'pathaîssent pas apprécier du tout les êfforts de nous villais pour amender lus sort et lus aidgi à condithe lus bisnesse avec succès.
Ergardez tch'est qui s'arrivi l'aut'e jour.
Iun d'mes vaisins, qui d'meuthe de tchique carre dans Duhamel Street, prins la peine d'êcrithe une longue lettre qu'i' fit inséther dans l'Evening Post, erquemandant un systême admithablye pour êviter la confusion qu'existe sus l'Weighbridge touos l's ans dans la saison des patates.
I' voudrait vaie, un Weighbridge de tchique carre à West Park, et pour êviter le pesage à deux fais, erquemande que châque fermi f'thait p'ser sa vainne dévant la saison et aithait les chiffres officiels peints sus l'drièthe de sa van.
Toute personne raisonnablye dait vaie le bouan sens de chute théorie-là et comment que che s'sait à l'avantage du fermi, considéthant le temps ênorme que v'là tchi li sauvethait.
Eh bain, pas un seul d'entre ieux n'a ieu la politesse d'êcrithe une lettre dans autchune gâzette pour ermercier l'moussieu qui s'était tant dêrangi dans lus intéthêt.
Ch'est pour chenna que j'dis qu'ous êtes un tas d'ingrats. Et chein qu'i' y a d'piéthe ou voulez même crititchi et vos motchi des siens qui veulent vos faithe du bain.
L'aut'e jour le grand Charles Pileboe vint à la boutique et m'dit comme chenna, “Caouain tch'est qu'est ch't espèce d'innocent-là qu'a mins dans la “Post” que j'dévéthions peindre l'paids d'not'e vainne viède sus les panniaux pour que les marchands piaîssent le déduithe à châque feis pour nos sauver la peine de p'ser viant?”
“Ah dame,” je li raîponni, “je n'le connais pas personnellement mais je crai qu'ch'est iun d'nos villais.”
“Sans doute,” qu'i m'dit “i' faut être “villais” pour êcrithe de patheilles sottises!”
Je prins chenna comme une insulte, mé, mais je n'pus pas li raîpondre comme j'aithais voulu, car il est iun d'nos miyeurs customeurs.
“Tch'est qui vos fait penser qu'ch'est des sottises?” je li d'mandi.
“Mais parbleu! Autchun imbécile dait vaie que la chose n'est pas praticablye! Le paids viède varie avec châque cherge. Si j'en porte chinq ou siex hampeurs au c'menchement d'la saison et vingt-quatre bathis un mio pus tard, v'la tchi f'thait une difféthence de pus d'deux chents livres! Et che s'sait à la perte du marchand.
“Mais,” je hasardi, “le marchand pouorrait p'ser les “empties” dans sa store à châque occasion.”
“Jamais d'la vie! I' n'y a pas un marchand qui voudrait prendre ch't embarras-là. Et pis quand-même le systême a tan “villais” ouvrithait la porte toute large pour introduithe oquo pus d'chipot'tie qu'i' n'y a acheteu.
Extchusez Mess Pileboe, je li dis mais je n'peux pas justement suivre le fil de votre ardgument.
Ch'la n'm'êtonne pas mais je m'en vais te l'explitchi en deus-trais patholes. Tu vai Caouain, tout l'monde n'est pas justement si honnête comme té et mé.
Comme par exemplye, le Nicklesse Attrape-Sot, man vaisin; ergarde tch'est qu'i' f'thait li, si votre système était adopté. Quand il îthait p'ser sa vainne pour aver le paids officiel peint sus les panniaux, i' la présent'tait sans doute, aussi ligièthe que possiblye, i' prendrait bouan soin de laissi les “rails” à la maison.
En sortant de sus l'Bridge, i' cach'chait tout drèt siez san forgeux faithe de neus cerclyes sus les quatre reues. Quand veindrait la saison des patates, comme le mont que j'avons à d'valler est assez rapide i' faudrait, naturellement, qu'i' s'ervîsse d'un patin, qu'il emportethait avec li en ville pendu à un cro souos sa vainne. Eh bain, faisons acheteu un p'tit caltchul. Mettons les “rails” à vingt-chinq livres la pièche. V'là tchi f'thait chinquante livres. Le patin et la chaîne, vingt-livres. Ah ça, un “set” de neus cerclyes pésent à peu près deux chents trente livres, ch'est-à-dithe chent chinquante quatre livres de pus qu'les viers, chein qui f'thait un total de deux chents vingt quatre livres que les marchands acat'taient au prix couothant des patates, châque feis qu'la vainne îthait dans lus store.
Si ch'est qu'ou criyiz, té et tan “villais,” que les marchands sont assez naïfs pour lus prêter à d'patheilles possibilités, ch'est qu'ou n'les connaîssiz pas.
Nennin, man vi, la chose n'est pas praticablye.
Donnes en avis à tan vaisin, si n'peut pas êcrithe avec un mio pus d'bouan sens, qu'i' mette sa pliume de côté et qu'i' s'otchupe de san p'tit commerce, s'il en a iun, et qu'i' laisse les marchands et les fermiers lus dêpiautchi comme bouan lus semblye.
Dis-li de ma part qu'i liaise la vieille fablye de tchi que v'chin la morale.
“Châcun à son métier, et les vaches seront bien gardées.”
Caouain
1924
Viyiz étout: