|
La Catte et lé Cahouain s'en allîtent en mé Dans un bieau baté vèrt coumme un chour. I' patchîtent du myi, et eune bille dé chîn louis À seule fîn d'payi lus dêbours. Lé Cahouain chantit ès êtailes au ciel En jouant sa pétite chifournie: “Oh ma chiéthe Minette! Oh Minette ma belle! Tu'es la pus belle catte du monde entchi, Entchi, Entchi, Tu'es la pus belle catte du monde entchi. La Catte dit au Cahouain: “Man tchoeu, chante-tu bein! Véthe-dgia, tu'es un ouaîsé charmant! Mathions-nous bétôt! J'avons landrinné trop! Mais où'est qu'est not' bague d'engagement?” I' crouaîsîtent l'ochéan en un jour et un an, Et d'sembèrtchîtent au bord d'eune forêt, Né v'là souos les bouais, i' vîtent eune bête à saie Tchi portait eune melle au mûsé, Mûsé, Mûsé, Tchi portait eune melle au mûsé. “Moussieu, veurs-tu bein nos vendre pouor un ch'lîn Ta melle?” S'fit Mess Couochon: “Mais oui.” I' l'acatîtent d'un co, et l'Révérend Picot Les mathyit lé lend'main siez li. I' mangîtent des pais et des beurrées dé g'lée Qu'i' gouôtaient auve eune tchuthieuse tchulyi; Et pis bras d'ssus bras d'ssous par eune belle leune d'avoût I' dansîtent ava les côtis, Côtis, Côtis, I' dansîtent ava les côtis.
Edward Lear
Vèrsion Jèrriaise par Geraint Jennings |
Viyiz étout: