L'aut'jour lé Ph'lip Desclios et mé j'nos rencountrîmes dans l'bureau d'poste ouesqué j'taimes touas les deux à payi not' licence dé télévisioun - car, li et mé, j'soummes assez hounnetes et j'tâchouns dé suivre la louai même si j'n'y criyouns pas.
'Tu 'tais à m'racounter y'a tchique temps', i's'fit, 'chein qu'il t'arrivit au Japoun quand la dgèrre fut dêcliarée et, j'crai bein viyant qué l'mais d'décembre ch'tait l'chinquantiême annivérsaithe du c'menchement dé chutte dgèrre-là, y'en a ieu hardi d'fait dreinement dans les gazettes, la télévisioun et l'radio. Y'a eune chose surtout surtout tchi m'a frappé, et j'voulais té d'mander tchiqu''t'en pense'.
'Y'a des gens qui trouvent', il countinuit, 'qué l's Améritchains eûtent grand tort dé lâchi la boumbe atomique sus les Japounnais, qu'ou tuit je n'sai pas coumbein d' d'millièrs dé pérsounnes qui n'pouvaient pas sé d'fendre, parmi ieux des milles dé femmes et d's êfants, et qué ch'en 'tait pas en acte éd dgèrre mais eun massacre. Tchiqu'tu dis d'cheunna?
'Eh bein, vai-tu', j'lis rêpounni, 'Cheuntait pas eune boumbe, mais deux, qu'les Améritchains lâchitent sus l'Japoun: la preumièthe sus Hiroshima et, tchiques jours après, eune autre sus l'port dé Nagasaki. Je n'sis pas certain qu'la deuxième 'tait nécéssaithe, mais quant à la preumièthe, ch'tait la miyeuthe chose qué fut faite durant toute la dgèrre, pas seulement pour les Améritchains et lus alliés mais pour les Japounnais étout. Et j'm'en vais t'dithe pourtchi'.
'Dgia qu'dévant qu'la boumbe fut lâchie la dgèrre c'menchait à aller mal pour les Japounnais ou' 'tait bein yain d'êt' finie et ou l'éthait peu dûther acquo d's années. Nous éthait coumpté les morts, parmi les Alliés et parmi les Japounnais, pas dans les millièrs mais dans les milliouns. Il' ount caltchulé qu'les deux boumbes tuitent dans les chent chinquante mille persounnes. Ch'tait terriblye. Mais il faut s'rendre coumpte étout qu'la boumbe atomique sauvit la vie à autrément pus d'mounde qu'ou'n'tuit, car ou' pérsuadit les Japounnais dé s'rendre et d'fini la dgerre'.
'Mais,' s'fit l'Ph'lip, j'n'eûmes pas à lanchi eune boumbe atomique sus les Allemands pour les faithe sé rendre, pourtchi qu'il en fallait ieune sus les Japounnais?'
'Pac'qué', j'lis dis, 'les Allemands et les Japounnais ch'en sount pas la même sorte éd gens. Quant ès Allemands, lus histouaithe lus avait apprînt que y'avait telle chose qué d'perdre eune dgèrre, et en quarante chinq, quand il vîtent que n'y'avait autcheun moyen d'gagni i' s'ditent: Eh bein, n'en v'la assez, et i's'renditent. Mais les Japounnais n'taient pas dutout d'même. Lus histouaithe et lus réligioun lus avaient apprint que rein n' pouvait les vaincre. Et d'même, pustôt qué d'sé rendre il sé s'raient battus jusqu' à la mort. Les Alliés éthaient ieu à envahi l'Japoun même et prendre él terrain pèrque par pèrque. Ch'est ch'la qu'éthait 'tait eun vrai massacre. Mais la boumbe atomique changi tout, car les Japounnais ount bein des crianches et quand i'vitent chein qu'la boumbe avait fait i' s'ditent qué ch'tait la coléthe des dieux qu'avait chée sus l'Japoun. Et en effet, à vrai dîthe, ch'en tait pas ès Alliés qu'les Japounnais s'renditent, mais ès dieux. Ch'tait pour cheunna qu'eun coup qu'lus Empéreur dounnit l'ordre dé s'rendre pas eun seul Japounnais pensit d'résister. Car nou'n'peu pas résister la colèthe
'Mais, 'S'fit l'Ph'lip, 'est-il possible qu'au jour d'aniet y'ait des gens avec d'itelles crianches?'
'Heureusement qu'oui', j'lis dis,' car si en quarante chinque les Japounnais n'avaient pas creu qu'les dieux 'taient mârris countre ieux y'a bein pus d'milliouns d'persounnes, qu'éthaient perdu la vie. Nânnîn, mon Ph'lip, les gens qui maudissent les Améritchains pour aver lanchi la boumbe atomique countre él Japoun, i' sount ou îngnots - ou doublye-faches, et si tu me d'mandes, jé n'les coumpte pas îngnots.'
'Tu veurs dithe qu'il sount doublye-faches?', mé d'mandit l'Ph'lip.
'Mais bein seux, 'J'li dis, 'l'Amérique est lé miyieu amin qu'la Grande Brétagne ait dans tout l'mounde, mais y'a parmi nous des gens qui détestent l'Amérique. Si, méttouns, ch'avait 'té les Russes qu'avaient lanchi la boumbe sus l's Allemands ou sus les Japounnais ches mêmes gens éthaient applaudi les Russes à tue-tête. Mais, vai-tu, y'a et y'étha tréjous des gens qui n'sount heureux qué quand i' sount à dêningrer lus miyeurs amîns'.
Viyiz étout: