Les Pages Jèrriaises

La Fille Malade

Vos vlà, vaisine, à vos prom'ner,
Ch'est miracle' qué d'vos rencontrer!
Non n'vos trouv' jamais par les rues,
Comme est qu'i s'fait qu' non n'vos vait pus?
- Ah! chest qu' dépis qué ma Nancy
Est si pouôr'ment, j' n'ai peu sorti:
Quand ou m'aidait c'htait bain ocquo,
Mais à ch't'eu, tout mé cheait sus l'co!
Mon dou'! mon doue! ah! la! la! la!
Et qu'est donc qu'ou mé contez-là!

Et qu'est qu'oulle a, chut' fill? - Hélas!
Pour dire lé vrai jé né l'sais pas.
Les docteurs ne peuv'nt l'expliqui,
I'li ont donné un tas dé qui,
Et boutillie sus boutillie,
Pourtant oun' n'en chang' pon un' mie!
Mais pustôt ou n'fait qu'empiéri,
Qué j'en ai un divers souci.
Oh. ché n' s'ra rain! bah! bah! bah! bah!
Les jeun's fill's ne meur'nt pas comm' chla!

Ou savez combain oul'tait guaie,
Ou d'visait tant, qu'la dernié fais
Qu'ou vintes, et qu'ou la vîtes siez nous,
Ou dites en riant, vos en rapp'l' -ous'?
"Chet'l'-là, bain seu' n'a pas l' filet!"
Chu coup ou n'diriez pus ditait;
Tout l'long du temps, ou n'ouvre pon
La bouoch', qué pour dire oui ou non!
- Ah! qu'est qu'ou dites! - Oh la! la! la!
I faut qu'oulle ait changi pour chla!

Aut'fais ch'tait un' bouonn gross' hardelle,
Fraîch' comme un' rose et aussi belle!
Ach't'eu ch' n'est pus qu'un' pouôr' pâl' fache,
Faillie, et maigre comme un' hache.
Ma fé, ch'est pitié qué d'la vais!
Jé n'sais pon qui miracle chest!
Nou dirait qu'ou n'a pus d'idée!
Jé crai qu'oulle est enchorchelée!
- Ah! qui dommage. Ah. lai! lai! lai!
Et qu'érait jamais creu d'itai!

L'aut' dinmanche', criyant la distraire,
J'li donni LA PATRIE à lière.
Ou fit la min' dé r'garder d'sus,
Et resti d'même demi'eure ou pus,
J' pensais qu'oulle y prenait pliaisi;
Quand j'eus occasion d'appréchi;
Or qu'est qu' j'avisi, - lé créri-ous?
Chutt' Gazette était chen-d'sus d'sous.
- Hola! hola! grand doue d'la vie!
Chutt' fill' qu'était si révillie!

Souvent s'ou crait qué j'n'y sis pas
Ou quitt' tout d'uu coup son travâ',
Et s'met l'visage contre la table,
Et plieur' comme unne pouôr' minsérable.
Ou fait des Oh! - ou fait des Ah! -
Dé grands soupirs longs comm' man bras!
Et, touân' les yiers en haut quiqu' fais,
Dé vrai, qué chla fait pène a vais. -
Dé vrai, dé vrai! oh! la! la! la!
Penser qu'oulle est dans ch't état là!

Ou dans d'aut' temps, oulle ira p'têtre,
Sé mâter d'but dévant la f'nêtre,
R'gardant la mé, pour pus d'un' heure.
Et pis ch'est récommanche et plieure.
Ov ch'la ou n'fait pour dire, espèce
De chose, - mais enfin jé la laisse,
Car s'ou travaill' ch'est pière acquo,
Oulle est bain seu dé faire quiqu' dro!
Est-i pôssible! et la! la! la!
Qui drôle de maladie qué chla!

Au sé, dès qu'i né fait pus jeu
Ou va splétchi tout près du feu,
Et là, accliouquie dans un coin,
San menton app'yé sus sa main,
Ou reste ofut-che tout l'long du sé,
A r'garder les tisons bruler,
Sans pâler, ou sans bouogi pus,
Qué si ou'll' t'ait un imâ' nue.
- Ah qu'il état! - man père bénin!
Qué tout chenna m'fait du chagrin!

Et dépis quand est all de même?
- Ch'tait d'viers lé c'mmenchment du carême,
Que John san couôsin s'en alli;
Ou dit qu'oull verrait s'emberqui,
Et oulle y fut, bain malgré' mé. -
Jé n'sais pon si oull y print fraid;
Tréjous ou s'plaignit le lend'main,
Et d'pis chu jeu, ou n'a té bain!
Ah! ah! ah! ah! oh! oh! oh! oh!
Ch' n'est pon des laits d'poule qui li faut.

- Ach't'eu, jé crai mé qué jé d'vine,
La maladie qui tant la mine, -
Et si ou voulais prendr' m'n avis
Jé pense qu'ou s'ra bétôt guérie! -
- Ah! s'ou l'savais, vit' dites-le-mé,
Car j'vos asseur' si nou trouvait
A me la r'mettre' comme oull' 'tait d'vant,
J'e bâdrais bain pus d' deux chents francs!
-Oh! consol' ous. Ah! la! la! la!
Man r'mède né couot pas tant comm chla!

- Et qu' est-che qué ch'est? - Ecoutez-mé;
Quand John s'ra r'venu dé la mé
Qu'i li accate un' bell' bague en or,
(I'l' f'ra, ch'est un' bouon sorte d'corps!)
Pis qu'un biau matin à l'Eglise,
Bras d'sus bras d'ssous, i la condise,
Et là, i n'a qu'à l'y couler,
Dévant l'Ministr' chut bague au daigt!
- Hô! ho! ho! ho! - Hah! ha! ha! ha!
Ou verraie qu' chla la r'guérira.

 

Laelius

 

Viyiz étout:

 

Les Pages Jèrriaises