Nicolas V. gardait des poules. -
"En vla de qui extr'ordinaire!"
Diront ofut-ch' certaines gens,
Qui aiment à bailli' de leux goules,
Et au lieu d'écouter et s'taire,
A interrompre à touos moments.

I' possedait ettout une femme, -
"Qui grand miraclle!" - "Ah! s'ou pouvez,
Restez don' tranquill's pour un p'tit!"
- Nou n'l'airait pas prinse pour une dame,
Mais oulle avait bou'nn' mine assez, -
Et i' nl'y manquait pas d'esprit. -

Une niet ès environs de Noué,
Quand Nickless et sa femme au liet,
Y ronfliaient coumm' des benheureurs! -
Nou n'viyait pas la main d'vant sai, -
Le vent buelait, - ch'était une niet,
Coumm' faite exprès pour les voleurs. -

I'n manquirent pon de v'nin, pardi!
Quand Nickless voulut le lend'main,
Soigni' ses poul's coumm' de couôtume,
I' d'meurit là coumm' èbézoui!
Tout était hors! - net coumm' la main!
Nou n'en viyait pas même une pliume.

Nickless, - j'vos pâle du temps passai, -
En portit pliainte, - mais ren n'fut fait! -
I' ly fallut subir la perte. -
Ach't'eu nou n'verrait pas d'itai,
Que j'avons une Police de niet,
Qui est diversement alerte! -

Il y-avait ben un mais ou pus,
Que sa volaille eut disparu, -
Quand Nickless en rentrant siez-ly,
Justement coumme il ouvrit l'hus, -
S'avisit d'un individu,
Qui ramontait le qu'min publi'. -

I' n'avait ren d'ètrange à l'vaie,
Sinon qui portait sus san bras,
Couvert d'un drap, un grand panyi,-
I' s'arrêtit, quand i' fut près,
Et dit, en saluant Nicolas,
"Voul'ous des poul's à bouon marchi? "

"Nennin," s'fit Nick, pis s'ravisit, -
Sa femme ayant 'té indispose,
Ches drainsjours, et ne mangeant pon, -
I' pensit qu'i' l'y frait pliaisi',
Si l'y - accatait quiqu' petite chose,
Pour faire un gouttin de bouoillon. -

"Viyons" - dit-i' - "qu'est qu'ous avez." -
L' aut' mit sa main dans san panyi, -
En déhalit une poule et dit, -
"En vl'a une bell', s'ous en voulez,
"Là - ch'est à prendre ou à laissi', -
"Je vos la baill' pour un vingt-six."

La poul' de fait n'était pas laie, -
San pliumage piqu'lotté de blianc, -
Nick crut fair, là, un bouon barguin!
Happ' tout-d'un-coup la poul' - la paie -
(Tout chla fut fait dans un instant) -
Et rentr' se cryant ben malin! -

I' s'en va à sa femm' tout drait
Tenant la poul' drière san dos,
Et crie, "Bettey, ma fill', dévine,
"Qui biau présent j'ai yeu pour tai!
Là, tâte, - oulle a d'la chai' sus l's os!"
Montrant la poule, - "A-t-all' bouonn' mine! "

La femm' souorit et dit "mercie," -
Pis prend la poul' par les guérets,
La pés; - la r'gard' de haut en bas,
"Est-i possible! - oui, ma vrai vie!" -
(Ou r'garde ocquo la poule une fais) -
"Ta propre poul', man Nicolas! "

LAELIUS.
Décembre 12, 1868.