Le temps pâssé, à chain qu' j'ai oui,
Il y avait, dans certain pays,
Un' bouonn' femm' ben ancienne
Qui s'habillait d'un' drôl' de sorte,
Car qui fît fraid ou pon, n'importe,
Eté, hivé, en tout's saisons,
Ou portait de rouog's cotillons
Au mains un' bouonn' douzaine.
Si ben qu'ov chonna sus lyi
A grand' pein' pouvait-all' marchi!
Et quand les vaisins ly disaient:
"Mais, grand-doux, est'ch qu'ou n'seriez pon
Pus à votre aise avec deux trais "
Ou répondait, du pus fier ton,
"Mé en ôter! non, non, non, non!
Que d'viendrait ma constitution!"

Ou continui donc comm' d'amors,
Ov tout chonna autour du corps,
D'aller piann' piann' san qu'min;
Mais à la fin ou fut saisie
D'une longue et sérieus' maladie.
Oulle avait ben bouon appétit,
Et mangeait d'tout espèc' de qui;
Mais l'pière était chonchin,
Que dans son corps tout entrait ben,
Mais i' n'en sortait presque ren.
Plusieurs, touchis d'sa condition,
Ly dir'nt qu'ou f'rait mus d'y r'medji
Tandis qu'il était temps, mais non,
Nouz avait biau la consillyi,
Ou répondait: "Je n'le f'rai pon!
Que d'viendrait ma constitution!"

Ch'la durit d'même ocquo quiqu'temps,
Mais enfin oulle empiéri tant,
Qu'nouz en avait horreu!
"Que ch'est un' hont'" se disait-on,
"De vais qu'ses gens n's'en troublent pon!
S'ou n'est pas capabl' de s'aidji,
Au mains, i' devraient en soigni,
Et app'ler un docteu'!"
Nouz en dit tant et si souvent,
Qu'ses amins vir'nt qu'i' s'rait prudent,
Sinon de s'occuper d'l'affaire,
Au mains d'en avé l'air un p'tit
Pour obligi le monde à s'taire. -
Mais quand la bouonn' femm' l'entendit,
Ou fit un' grand lamentation!-
"Que d'viendra ma constitution!"

Quand l's'amins s'trouvirent réunis,
I' n'furent pas tous du même avis,
Longu's fur'nt les discussions;
Les uns disaient: "Ch'est évident,
Qu'on n'se donn' pas assez d'mouv'ment,
Tout ch'qu'oulle a besoin ch'est d'marchi. -
Mais aussin est'ch qu'ou peut bouogi
Avec tant d'cotillons! -
I'faut l'yen ôter une partie,
Alors se trouvant dégagie,
Ou pouorra prendr' pus d'exercice;
Et pis en mélant, par bordée
Ov chain qu'ou mange un brin d'épice,
Ou s'ra bétot rafistolée."
Mais l's'autres s'écriaient: "Non! non, non,
Ch'la perdrait sa constitution."

"Eh ben! " reprenaient les premiers,
"Qu'ou reste enfliubée comme oulle est,
Si ch'la vos fait pliaisi!
Mais enfin il est nécessaire
D'ly fair' quiqu'chose! Que faut-i' faire?
Oulle est déjà pus morte qu'vive,
S'ou n'est pon un p'tit pus active,
Ben seu ch'est d'qué fini!
Ne pourait-on pas ly donner
Un domestiqu' pour l'assister? -
I' l'y aid'rait à couqui sas r'pas,
Et, marchant tout à côté d'lyi,
La souotiendrait, ly donn'rait l'bras,
Et l'empêch'rait de s'trébuqui!" -
Mais ch'tait tréjous la même chanson:
"Ch'la perdrait sa constitution!"

"Un domestiqu' la press'rait trop
Et ly f'rait rompre ofut-ch' le co',
Ou pouorrait pas s'en grée'!
Et pis ch'qu'il y'avait d'pièr' sus tout
I' faudrait ly bailli des sous. -
Nou prétendait qu'la maladie
De la bouonn' femm' serait guérie
S'ou jouait pus des guérets. -
Ch'tait du niolin. - La cause en 'tait
Qu'étant sus l'âge, ou trouvait fraid;
Et ben loin de ly ren ôter,
Nou f'rait mus de s'rencontrer tous
Et l'y'arrangi sans pus tarder,
Un autr' p'tit cotillon d'en dessous!
Ov un té plian nou' n'risquait pon
De ruiner sa constitution!"

Après pus d'brit que de raison,
Les chains du parti cotillon
Se trouvir'nt les pus forts.
Un bouon jour donc i' s'assemblirent,
Et, après ben d'la peine, i' firent
Un cotillon avec des buts
De chiquett's, et tout's sortes d'clus,
Et ly minr'nt ch'la sus l'corps -
Mais l'expérience n'eut pas l'succès
Que chès brav' gens en attendaient, -
La pouor' bouonn' femme' en étouffit;
Et l' fossi vint, et ov sa bèque
Fit un grand creux et l'enterrit,
Ses cotillons, et toute la pèque! -
Et v'la ch'qui fut la conclusion
De lyi et d'sa constitution!!

R.P. Marett