Que nou ly pâl' d'éfants!
"Ah oui, oui!"
Ditha-t-i'
"Les aviers sont charmants!
Quand i' sont p'tiots, che n'est que piaille!
Quand i' sont grands, ch'est piéthe ocquo,
I' sont tréjous à faith' quiqu' droc:
Pour ben en dith' ch'est ren-qui-vaille!
Je n'en ai pon, -
Coumm' de raison,
Mais qui! - les chains de man vaisin
Venn'nt pilvâqui' dans man gardin!"

Est-ch' des femm's dans d'aut's temps?
"Ah là là!"
Coumme i' f'tha,
"J'aime ocquo mues l's éfants!
Ah! laissiz-les faithe à lus tête,
Et bailliz-leu robes et ribans,
Dites tréjous oui à touos lus pllans,
Sans dout' qu'i' vos f'thont ben la fête;
Mais dis nennin.
Pour un p'tit brin!
Et pis oprès vens m'dith, valet,
Qui' sorte d'grimach' nou t'a fait!"

Pâlez-li d'amitchié!
I'ritha
Et ditha:
"Ah oui-jà ch'est d'qui bé!
Eh! qu'un houmm' baill' de bouons fricots;
A pui veurt emprunter qu'i' dounne;
Qu'i' n'demand' jamais à personne,
Il aitha d's amins par mouochiaux!
Mais que san sort
Revith' de bord,
Et j'ai l'idée, si les comptait,
Qu'i' s'arrêt'tait au premier daigt!

Que nou ly pâle enfin,
Sait n'importe
Sus qui' sorte,
S'lon li tout est niolin!
Ren n'est si bé,- ren n'est si bon,
Qu'i' n'trouve à r'dith'dessus! - De vrai,
Qui li offrithait un' dram', - je crai,
Qu'i grounn'nait. - Mais n'la refus'rait pon!
Enfin fouai d'houmme,
Il est, en soumme,
Un té grounneux, qui m'est àvis,
Qu'i' grounn'nait même dans l'Paradis!

SIR R. P. MARETT.