Il est donc bouon d'vos expliqui
La raison qui m'a empêchi
De vos écrir'. - Quand premier j'vis
Vos vers aimabl's, che fut l'samedi
Qu' i' furent produits dans La Patrie,
J'sortais alors d'un' maladie,
Qui, triste à dir', m'avait gardé
Pour près d' chinq s'mains' souffrant au lié,
Et en m' quittant m'avait laissi
Dans un état à faire pityi.
Etalé sus le fil du dos,
Sans forche et miné jusqu' ès os,
Rémuant à peine et gamb's et bras,
Obligi de prendr' touos mes r'pas,
Comme un éfant, à la cuilli,
Ne pouvant m'touàner ni m'aidji,
Et n'ayant pour me consoler,
Qu'un appetit à fair' tremblier,
Si dévorant que j'crai, vère-ja,
Si nou m' avait donné du ch'va',
Ou ben de la vaque enragie,
J'n'en airais pas laissi un'mie,
Ou pensez ben que che n' 'tait pon,
Quand j' 'tais dans un' tell' condition,
Que j'allais m'mettre à versifier;
J' songeais ben pus à man dîner! -
Et pis, (tant à forche d' souffri
J'avais changi et enlaidi.)
Si j'avais voulu éprouver
D'app'ler la muse à m'assister
A vos arrangi quiqu's versets,
En viyant l'ètat où-est qu'j'étais,
Couochi sans mouv'ment sus l' échine
Ov mes joues creus's, ma triste mine,
O ulle airait yeu un' si graud' peu'
Qu'ou se s'rait r'paquie j'en sis seû!

Mais à ch't'eu que les chos's vont mus,
Que Dieu merci je n' souffre pus,
Qu' à forche d' bère et de mangi,
Je m'sis ravigoté un p'tit,
J' n'ai pus d'excus' pour différer
De vos répondre, et vos r'mercier,
De la manière si fliatteuse
Et à la fais si généreuse,
Dont votre adresse fait allusion
A quiqu's chansons de ma faichon
Qui ont, signées d'un nom latin,
Paru dans les gazett's d'ichin.
J' l'ai dejà dit, je dai chenna
A vot' bonté, je l'sais; ch'est chla
Ben pus qu'la bonté de mes vers,
(Rimés trop souvent tout d'travers),
Qui fait qu' 'ous en pâlez si ben;
Mais ov tout chla i' n'en est ren,
J'admettrai franch'ment sans biaisi,
Que votre èpitr' m'a fait pliaisi.
N'y a pon d'rimeux qui n'aim' l'enchens,
Et tout pèr' chérit ses èfants,
Or entre l's autr's rimeux et mai
I' n'y a pon l'èpaisseur d'un daigt,
Et faut dir' pour n'en menti pas,
Je r'ssemble assez ès autr's papas. -
Quand donc j' apprins qu'mes chansonnettes,
Que j' craignais n'êtr' que des sornettes,
Etaient pourtant assez d'vot' goût,
J'en fus fort content je l'avoue.
Chla les r'hauchi dans m'n opinion,
Je m'dis, i' faut qu'il y ait du bon
Parmi l'mauvais, car comment craire
Qu'ils airaient, autrement, peu pliaire
A un' personn' de qui l' esprit
Est cultivé, et ben nouorri
De tout ch'que chaque fameux auteur,
Connu pour sa joyeuse humeur,
A laissi pour èguayer l' monde:
Et douée lié-mêm' d'un' vein' féconde. -
Un' tell' personn' ne s'mèprend pon,
Dans mes chansons il y a du bon!

Mais chu titre d'Anacréon
En vérité ne m' convent pon,
Oh! si j'avais le rai' talent
De l'auteur de Seul et Content,
La vive imagination
Qui créa La Nency Pinson,
Si j' possédais l'èsprit comique,
L'humeur enjouée et satirique,
La guai'té si divertissante,
Qui brill'nt dans l'portrait de Ma Tante,
Alors je pouorrais l'ver la tête,
Et r'clamer le biau nom de poète.-
Mais j'n' ai pas de tell' prétention,
Mon humble Mus' ne r'ssemble pon,
A chell's qui, plienn's d'un' verve fière,
Dédaign'nt de marchi sus la terre,
Et comm' l'alouett', dévers les cieux
Se lanchant d'un vol audacieux,
Vont, en s'él'vant de pus en pus,
Se perdre en chantant dans les nues.
Ch'est un' modeste criature,
Qui s'lasse en l'heure et n'est pon dure,
Qui rar'ment tente un hardi vol,
Par chouaix voltigeant près du sol,
Sachant que s'oulle en faisait trop
On finirait par s'casser l'co.
Là s'n amus'ment est de r'marqui
Les faits qui s'pass'nt autour de lyi,
Les moeurs et les capric's du monde,
Les ridicul's dont il abonde,
Ses follies et ses sott's faichons,
Et pis oulle en fait des chansons;
Mais sans malice ou dessein d'nière,
San grand objet est pustôt d'pliaire:
Et quand ou peut fair' rir' les gens,
Et l's aidji à passer leux temps
Quand l'démon d' l'ennyi les tormente,
Chest tout ch'qu'ou cherche, - oule est contente.

Quaiqu' j' aie trop allouogni chutt' lettre.
Je n' peux et ne veux pas omettre,
Avant d' fini, de vos r'mercier
D'être si poli que d' m'inviter
D'aller vos vais à Guernézi,
Si par hasard j'y mets le pi'.
Permettez-mai, de man côté,
D'ajouter que je s'rai charmé
S'ou visitez jamais Jéri,
De vos r'chever et de bargouaichi
Ov vous sus toutes sortes d'sujets,
Sans oublier nos viers patouais,
Au pliaisi donc, Amin Rimeux,
En attendant séyiz heureux.

LAELIUS.