Les Pages Jèrriaises

Les d'vis d'eune pie

"Ki-ri-ki-ki,
Ka-ra-ka-ka!"

Eh bein, jé n'sai pon trop bein tchi vouos chanter. Car, quand ch'est tch'i' y'a eune dîthette dé nouvelles - nou n'peut pon bein en înventer. Ch'est à dithe, ch'n'est pon tch'i' sait exactément împèrmîns, car j'm'en vais vouos dithe net et cliai, y'a tant d'gens par les c'mîns tchi prannent lus pliaîthi à înventer des choses et, tout d'siette, un co pathelles "nouvelles c'menchies et à banon, ch'est comme l'alleunmette au feu. Pouor dé mé, jé m'sis tréjous comptée trop respectabl'ye pouor mé mett' du rang d'ches êcliandreurs-là. Il est bouon d'faithe du flianné dé temps en temps mais, comme toutes choses, en raison. Et jé sis bein seûthe et cèrtaine qué mes lecteurs mé comprendront si j'dis qué quand j'ai tchiquefais conté des bliues ché n'tait qu'en vouaix d'badinner ou, au sérieux, j'vouos vendez si'en tout cas chein qu' j'avais acaté - là, don! J'pâlais justément à ch't heu dé dîthette dé nouvelles, mais y'a eune chose qué j'sai bouistrément bein et eune chose tchi pouôrrait êt' dgiâtreûthement pus séthieuse iun d'ches bouons jours et ch'est - lé manque dé vivres. Y'a dêjà longtemps qu' nou n'a pon tout ch'qué nou voudrait bein et, quouaiqu' jé n'mé pliaingne danme pon, jé peux vouos asseûther qué si l'affaithe continnue, et il est tout probabl'ye qué oui, j'm'en vais dév'nîn dans un agré d'santé abominnabl'ye. Dêjà mé v'là maigre comme un haû et j'ai pèrdu eune mâsse dé plieunmes, sans pâler d'ma veue tch'a cailli hardi à ches drein. Dévant longtemps j'n'éthai pus qué l'tchêrpent. Ah ça, souos pathelles circonstances, comme tchi trouver l'couothage et la bouanne heunmeu tchi sont nécessaithe à la vie? Atout les râtions qu' nou-s-a à ch't heu, dévrai, nou "va un but en allant douochement. Un p'tit péton d'beurre, un d'mié-nodgîn d'lait, du chucre pliein un dée et du sé à peine assez pouor couvri un douze-sou. Né v'là étout tch'i' m'nichent dé nouos réduithe acouo sus l'pain, et pas d'graisse point fricachi. Ah, sâpresti d'mêtchi, s'en va-t-i' don faller êcopi dans la câssetrole pouor faithe sèrvi d'graisse? Et si la viande dév'nait acouo pus êcarse qu'ou n'est, eh bein, danme, j 'nouos vai à couôrre souotre les p'tits mouossons lé long des r'liés! Ah boustre, mais, valet, l'affaithe pouôrrait véthitabliément dév'nîn critique. J'ai ouï qué à des bords dêjà nou-s-a mantchi eune racachie d'cats. Eh bein mouôn Doue, la viande dé cat n'est p't-êt' pon si mauvaise comme tout ch'la - pouor dé mé j'n'en ai janmais gouôté partitchuliéthement si ch'est qu' nou n'sait dgéthe qué ch'en est qu' nou-s-est à mangi. J'n'ai janmais peu supporter les cats, mé-même, car du moment qu' j'y pens'sais l'mains chu fichu annima-là m'saût'tait sus la fripe et dans deux fis d'coton m'craqu'thait l'héthèque du dos. Et ch'la, par exempl'ye, ch'est d'tchi qu' j'avons tréjous seu, dans la fanmil'ye des ouaîthieaux; à nous d'nouos en mêfier, boufl'ye!

Allons, où'est qu' j'étchions? Ah véthe, j'tchions à dithe comme tchi qu' nou-s-est ès p'tites râtions. Les aut's sémaines j'ai ieu eune tèrribl'ye suée d'fraid et, pouor combl'ye d'malheu, eune attaque dé rhonmatisses dans l's ortés dé d'houors et un malaise dans l'gros boudin - ah, qué j'ai souffèrt, n'y'a qu' mé tchi l'sait! Eh bein, aut'fais quand nou s'trouvait mal prîns nou filait dêliêment qu'si eune pétite boutilyie d'tchiquechose et nou s'faîthait bein confortabliément un p'tit vèrre caud, ou même deux si ch'est qu' nou 'tait d'heunmeu. Et pouor lé ma la gorge, deux p'tits d'gouts d'sitho' - v'là tchi vouos souôlageait à mèrvelle, Mais, tout ch'la au jour d'aniet nou n'lé trouve pon dans les creux d'taupes! La vie est triste assez sans aver à nouos priver - ah bah, mais tch'est qué j'sis don à vouos chanter? Jé m'pliains maûgré mé et, ai-je raison? Pas pus qu'autchun d'vous, bouonnes gens; nan-dgia, ma fé. Jé sommes tous à bord du même baté et chu grand baté, i' faut l'dithe, est acouo gentiment confortabl'ye pouor à ch't heu et n'navigue pon 'couo trop mal, tout considéthé. Lé cap'taine tch'est en chèrge et touos ses contre-maitres sont à faithe dé lus mus pouor nous et y'a toute appathence qué les choses né s'sont pon p't'êt' si mal comme nou voudrait bein vouos faithe accraithe. Nan, nan, nan, lé halé n'est pan 'couo en allant à fond, Dgieu mèrci. Mais, y'a eune chose, et ch'est Marie tchi vouos l'dis, i' faut tâchi d's'entr'aîdgi à ch't heu pus qu' janmais d'vant, à seul fin tch'i' n'y'ait pon trop d'èrproches. Lé chein tchi reste offrun au temps tchi va, et malvoulu, ch'ti-là n'est danme pon dîngne d êt' appelé un homme. Jé sommes à pâsser l'travèrs d'un temps critique, mais j'pouôrréthions êt' bein piéthes, et si j'nouos pliaingnons ch'est bein seux à tort, car i' dait y'en aver des chents mille piéthes qué nous ichin en Jèrri, et il est bouon dé l'rêaliser. Un bouôn jour les choses èrîthont mus, et j'n'en s'sons pon d'piéthe d'aver rencontré tchitch'eunes des êpreuves du moment, Faut vivre en espéthance et faithe dé san mus, comme lé vieau tchi s'êtrangl'ye! Quant ès habits, ch'est difféthent. Nou n'peut pon mettre grand'chose dé côté, parmi les provisions tchi sont absolument essentielles, mais l's habits - eh bein, j 'vouos garantis qu' j'ai emplyi mes titheurs, et touos les cros d'mes armouaithes sont otchupés! Ous êtes p't-êt' tchuthieurs dé saver tch'est qu' j'ai mîns d'côté. Eh bein, n'en v'chîn deux'trais, d's articl'yes. S'ou n'avez pon fait la même chose, j'vouos pliains bein, car ou r'séthez p't-êt' longtemps d'vant en r'vaie la couleu, dé tout ch'la. J'ai eune douzaine dé pathes dé cotillons, démié-douzaine en trème et démié-douzaine dé rouoge flianné - car jé sis acouo du vièr temps, mé, sans doute - j'ai fait faithe six or sept châles et neuf ou dgiex bédgônes et eune pile dé d'vantchieaux d'bêlînge, et j'ai acaté sept douzaines dé c'mînses et trente-chînq c'mînsoles, deux bîndgies d'cauches, seize ou dgiex-sept cors et douze douzaines dé baleines d'extra, et vîngt-chînq pathes dé drâses ouvèrtes, brodées! Et bein d'aut's choses... Si j'meurs dévant man temps et d'vant pouver user tout chenna, j'ai donné m's ordres - dé m'enfoui habilyie dans tout man "trousseau". Ch'est mé tch'a payi pouor et j'veurs l'emporter auve mé!

J'n'ai pon grand aut' chose à vouos dithe, à mains qu' ch'né s'sait qu'les gens d'par siez nous sont à tchithier d'l'êpu et qu' nou sent ch'la au pliein du nez né v'là, eune sémaine, et qué nouot' Chent'nyi s'est fait raser et coper les g'veux à la fîn - en avait-i' eune touaîson! - et qué la belle-fil'ye du couôthin à Laïesse Lé Doux en attend un autre bein vite. Né v'là tout. À la préchaine!


Marie la Pie
 

Viyiz étout:

 

Les Pages Jèrriaises