Guy Fawkes 1909

Le Samedi au sé devant l'jour du carnaval, tch'avait 'tait fixèt pour Guy Fawkes Day, dans chutte pâraisse tchi n'y-a pas encuo d'parish-all et qu'les râts sont à quatorze sous l'quartchi, unne p'tite touannée fut faite, parce que n'y-aurait pas ieu temps d'allé partout Guy Fawkes Day.

Enfin i' fallait réunithe à sept hèuthes au pus tard à unne longue p'tite maison tchi n'est pas bein haute.

Devant stèrté, le “big drummer” qu'est pas bein haout, mais qui bat d's'ailes numétho iun, s'mint à dithe: Aussi bein d'pratitchi daous-trais tunes ach'teu, Allons garçons, altogether, “There's no luk about the 'ouse”.

Après avé joué un autre “partie de musique,” qui fut si appréciée par les spectateurs, i' tait temps d'sorti parce qu l'hèuthe avançhait, le Président dit Fall in et tous sortes de dans l'bel, la banner allé l'avant, avec l'inscription: In aid of the poor, et pis la band (in full strength!) et les dèsgisés.

La procession fit route par Les Crouaix, tout drèt par la Chapelle et entri dans l'bel des lanchouneurs.

La band jouait tout l'temps et ma fé les v'là qui ouvre la grand'porte de drièthe de la wing. Ah! mais s'ou z'éthaites veu coumme i' 'taient contents d'avé l'honneur d'avé unne telle band à joué siés y'eux, car chèst du monde tant portée pour la musique.

Après qu'il avaient laissi tchès un pièche d'argent dans la boëte, le Président cryit Three cheers for Mr --------- tandis que la band jouait la pièche de musique: For he's a jolly good fellow.

La procession se r'formit dans la route et s'en fut par sus les pliatons jusqu'en Egypte.

À la préchaine fais le deuxième châpitre.

Pour continué m'histouèthe d'la s'maine passée de la bordée du carnaval, le Samedi au sé, après avé sorti de sus la propiriétèt des lanchouneurs, fermièrs, commis d'office, organistes, musiciens, etc., etc., la procession s'en fut par les Pliatons et arrêtirent pour collecter à unne maison et ma fé ne v'là toutes les filles qui dèshalent pour vais tchu carnaval. La Beena tait là mais pas san galant, Mess le Grèslèt, Fred, du moulin qui n'touonne pas, tchi tait collecteux eut la chance parce qui l'y mèrent des sous dans sa boëte.

J'y ouï dithe qui y-a tait d'pis et lus aide à patchi l'linge quand y-a prêsse.

De là, j'cachîmes tout drèt pour le châté d'Esgypte, et après, avé traversèt la mé rouoge à pit sèt, j'arrivîmes et j'vos assèuthe que j'fumes erchus à bras ou'ert par le roué et la raînne de tchu pays-là.

Il invitirent tous à entré mais trais ou quatre restirent à èspié à la f'nêtre tchi tait ou'erte.

Des chansons fûtent donnée par Jack, qu'avait passèt ses bâtons à travers le tambour par accident, Nic, etc., et iun chanti la chanson de Nicolas.

Unne fais à bèthe fut servie, et pis le Président ermerci le Monsieu du Châté et èttou au sien tchi tait assis dans la f'nêtre tchi tait ou'erte, et en fut tchitte d'unne bein mauvaise suée de frait,

La préchaine maison qui ieut halte ch'tait à la préchaine porte de La Porte.

Après avé joué deaux ou trais tunes, le Patron d'la maison, tchi trébuque un mio l'jerriais en l'pâlant, passe unne fais à béthe et dit : Ou pouvèz entré garçons.

Tous taient contents et j'vos dit que ch'tait un réel concert. Des chansons et pis la band. Ch'tait manifique.

Le fis du Patron tait bein enbarrasèt avec sa canne à traithe à servi l'bèthe.

La Missis fit passé un monièthe de mousse dans l'appartement à côté pour se cauffer au pid du feu parce qu'i disait qu'il avait frait.

Mais le temps veint qu'il l'tait temps d'sorti. Pour fini bein l'concert, la band joui le "King", et tout l'monde sortirent sauf les siens qui restirent en d'dans.

Le Président sors le preumi, mais à sa grande surprise, la banner n'avait pas peut resté d'but toute seule, et tait bas dans l'puté, et s'mint à dithe : Ergardèz la banner, on peut pas se t'nait d'but.

La pus bé du fanne, ch'tait en d'cendant la route. Philip, qu'avait fait l'carnaval ! voulait occuo qu'la fameuse bande jouise, mais Fred ne voulait pas. Philip lis dit, Marche tan sièz tèt, valet ; chés mé qu'a fait l'carnaval et tèt tu fais l'bruit.

Mais tchiqu'uns prirent Philip et i' fut porté sus l'zespaules à deaux tchi taient un mio fàyïs sus lus gambes.

I' pathai que John, qu'est sortit d'unne grand co'munne, fut rèsviyi par le combat des coups d'points en d'vant d'sa maison.

Le carnaval a tait organisèt par Filip, pour gardé la Trin'tèt à haout, et méthite d'êtes félicités.