Y’a quat’ chents ans, y’eut un compliot
Pouor soûfflier l’Parlément;
Ach’teu y’a des fouées et cracots
Et tout pliein d’excitement.
J’faîthons des bouanhoummes pouor tcheûter
Des pénîns ès pâssants.
Not’ “Guy” stoffé, lié et cliutté
Fut du travas lâssant!
Auve mitaines, torches et vîsagiéthes,
J’soummes touos prêts à fêter:
Les veues lithent auve des couleurs cliaithes
Coumme des flieurs en Êté,
Les cracots craquent, les fîsées tchaient -
Et j’soummes, les bouoches ouvèrtes,
Êmèrvîlyis auve tant à vaie.
Tchi jouaiyeuse dêcouvèrte
Qué fut chu nièr compliot, ma fé!
J’sis seu, qu’y’a quat’ chents ans,
Pèrsonne n’éthait janmais d’viné
Qu’j’éthions un si bouan temps!
Geraint Jennings
5/11/2001
