Ah! Fait-i' caud auprès du feu dé jouaie!
Lé chîn d'Novembre: du fanne, d's anmîns et mé!
Dans l'clios, eune vaque veurt saver: tch'est qu'i'y a?
Eune fûsée! Ouêche! La vaque n'aime pon chenna!
Vite, ou s'en itha, mais j'sommes bein heutheux.
Les faches des mousses èrlisent rouoges d'vant lé feu.
Enchorchelés dé fliambes et caude feunmée,
J'sommes-t'i' dans l'Paradis ou dans l'Enfé?
Des 'bangeurs' cassent la niet auve coups d'tonnèrre.
Du brit! Un êcliat! D'la magie en l'air!
Lé rouoge, lé vèrt, l'argent: i' montent et tchaient.
Alleunme lé bliu papyi et êcart'-té!
Les êtînchelles comme des pétits faîtchiaux
S'êcappent au feu et couorrent entou les clios!
Les vièrs et jannes aiment les feux d'artifice.
Mousses et adultes s'êcrient à maintes fais "Bis!"
La niet èrsembl'ye au bal de bels et belles!
Jé pouorrais danser souotre les êtînchelles
Tchi dansent, gavottant, au d'sus des clios.
Tchi bonheu est v'nu d'chu fanmeux compliot!
Geraint Jennings
Novembre 1997
|
