"Gaï Faxe,
Tondre-Baxe!
I' s'en va,
ha... ha... ha...
Sus un j'va,
là... là... là..."
Auprès les dêtchèrques d'l'Êté, l'temps va sus l'piéthe, les séthées sont néthes, et pouor s'rêjoui j'avons des fêtes traditionnelles. Y'en a tchi sont contre la Tcheût'tie d'Halloween et dithent qué ch'est du niolîn d'hors Jèrri. Mais nou soulait tcheûter ichîn étout s'lon la saîson. Les mousses soulaient tcheûter des sou pouor acater des fîsées et des cracots pouor la Séthée d'Guy Fawkes (ouaithe qué les Connêtabl'yes eûssent tâchi d'bârrer la vendue d'ches produits-là ès mousses, et chenna d'pis eune bouonne pause). Mais au temps pâssé, les mousses soulaient tcheûter l'Jour d'l'An en chantant "Ma hodgîngnole! Ma hodgîngnole, holà! Du pain d'Noué s'i' y'en a!" Ou autrément, nou-s'allait crier san Noué: nou-s'allait par les vaîthîns en criant "Noué! Noué! Man Noué, man Noué, s'i' vos pliaît! Un morcé d'gâche sus l'bord d'l'ais!"
Les couôteunmes d'la Séthée d'Guy Fawkes sembl'yent aver 'té împortées du Rouoyaume Unni d'vièrs lé c'menchement du dgiêx-neuvième siècl'ye. Les Jèrriais du mitan du siècl'ye 'taient entchéthinnés pouor la fête, mais n'sembliaient pon saver grand' chose entouor l'originne du bouonhoumme. Les célébrâtions 'taient meutinnes: înmaginnez l'Vièr Marchi où'est qu'nou flianque des cracots et y boule des bathis fliambants. Nou brûlait des bathis au Bridge et sus la grève d'la Ville. Y'avait du hèrtchîn entré la Police d'la Ville (les troubl'ye-fêtes) et les cheins d'la fête. En 1877 eune dgaîngue dé 500 jannes gens assiégîdrent la Salle Pârouaîssiale. Et en 1863 des mat'lots du NSM Speedy, en vîsagiéthes et armés atout un bâton, tcheûtaient dans les c'mîns d'la Ville auve des m'niches si les pâssants et les boutitchièrs né contribuaient pon à la Tcheût'tie.
Ah, les bouôns vièrs temps sont hors!
Geraint Jennings
Viyiz étout: