Les traditions Jèrriaises d'la Séthée d'Guy Fawkes sont quâsiment oubliées au jour d'aniet: les procêssions, les mûsiques, la lanch'chie d'cracots, les vîsagiéthes et les costumes.

I' sembliéthait qu'des vielles couôteunmes d'Hivé (ou du but d'l'an) avaient r'mués au c'menchement du mais d'Novembre. Chein qu'nou peut r'mèrtchi est qu'la fête en Jèrri n'avaient rein d'anti-Catholique - et en êffet les gens n'avaient pon grande idée entouor l'histouaithe du Compliot ès Poudres. Guy Fawkes - ou coumme nou disait: Guy Faxe ou Guy Foxe - prannait la pliaiche dé tchique esprit symbolique d'la saîson.

En Dgèrnésy, nou l'appelle “lé boud'lot”, tch'est eune variâtion dé “bout dé l'an” - l'nom d'la chouque qu'nou soulait brûler à la fîn d'l'année qu'nou-s'a donné ach'teu au bouonhoumme qu'nou brûle lé chîn d'Novembre.

En liêsant les r'cits du festival dans les vielles gâzettes, nou r'mèrque qu'les gens disaient tréjous qu'la tradition mouothait - mais y'avait d's années quand la célébrâtion fut ravigotée. La Preunmié Dgèrre Mondiale avait supprînmé la tradition pouor un temps - et i' sembl'ye qu'la Deuxième la tuit.

I' nos reste chein qu'les gens du temps pâssé nos ont laîssi dans lus articl'yes et r'cits pouor pouver înmaginner coumme tchi qu'ou 'tait pouor ieux, la Séthée d'Guy Fawkes.