Lé Ph'lip Desclios 'tait dans s'n appentie à gratter des raves car, ou viyiez, il est à la vieille mode, et i' dounne des raves à ses vaques, pas coumme les fèrmiérs d'achteu, qu'acatent siez les marchands eun tas d'saloprie dans des pouques pour dounner à lus bêtes. '
I'n' tait pas trop d'bouanne humeur car ch'tait lé siez d'novembre et i'n'avait pas bein dormi, viyant qu'lé sé du chînque les veisîns avaient fait dêtounner des pétards toute la niet pour célébrer l'annivérsaithe dé Guy Fawkes. 'Dgâtre sait', i's'fit, 'toute la niet nou'n'entendait qu'chu sabbat et nou'n'pouvait pas dormi. Pourtchi,dis-mé, qu'les gens fount d'ité?'
'Mais, mon Ph'lip', j'lis dis, 'tu dévrais bein saver pourtchi! Chest viyant qu'chu sé là, y'a bein d's'années, eun pèrrot du noum d'Guy Fawkes tâchi d'faithe sauter la Chambre ès Commeunes à Loundres mais i'n-'réussit pas, i'fut happé et fut mint à mort'.
'Bein seux, bein seux', s'fit l'Ph'lip, 'jé n'sis pas si bête qué dé n'n'pas saver ch'na. Mais chein qu'jé m'd'mande chest pourtchi il'mett' à mort? Estch'qu'i n'avait pas béin raisoun dé vouler faithe sauter touas ches voyous là, les politiciens? J'voudrais qu'y'eusse tchique buoan Jérriais qu'en frait autant, ès Etâts! Tu pâles qué j'en s'rais countent si tchiqu'eun mînt eune boumbe souas ieux! Et jé n'voudrais pas lé vaie pendu, j'voudrais pustôt li bâti eun monument, coumme lé sien au buoan'houmme Ph'lip Le Vescounte ès Crouaix, et touas l's'ans, à l'annivérsaithe dé chein qu'il avait fait pour not' bénéfice, j'éthaimes eun raid' buoan rêvillioun, pour célébrer son succès, pas son manque dé succès coumme les gens d'achteu fount pour Guy Fawkes'.
'Mais absolûment, mon Ph'lip,' jé m'ris, tu n'vas pas m'dithe qué tu voudrais faithe sauter l's Etâts? V'là tchi frai hardi d'dégâts! Jé n'pense pas ès membrés d's Etâts: y'en a bein des pièches qué, si tu les gav'lais, nou's'rait bein countents d'en être tchitte, et pis, bah, y'en a bein d'autres à les rempliaichi, des gens qui veulent à toute forche dév'ner membres pour aver l'moyen d'bailli d'lus goule et d'vaie lus noum dans la gazette. Nounfait, quand j'pâle dé dégâts j'veut dithe dégâts au bâtisse, qu'après tout a dl'apparence et qui nos couât'rait des sou à r'bàti. Et pis, y'a parmi les membres tchiques buoans Jèrriais et buoannes Jèrriaises dé tchi qu'nou'n voudrait quandmême pas s'dêfaithe. Nânnin mon Ph'lip, jé n'crai pas qué d'mett'eune boumbe souas l's Etâts s'rait tout'à fait eune bouanne idée.
'En êffet,' s'fit L'Ph'lip, 'Y'en a tchiques membres dé tchi qu'nous éthait pitchi et qu'nou'voudrait êpaigni, mais coumme nou' dit, nou'n'peut pas faithe eune om'lette sans câsser d's oeux. Mais les siens qu'nou voudrait êpaigni, nou' pourrait arrangi d'sorte qu'i' s'en fûssent passer eun couplyé d'jours en Dgèrnésy. Y'en a parmi ieux tchiques euns qui sount si bachouards qu'il'aim'raient mus aller en Dgèrnesy qué d'sé faithe sauter'.
Eh bien, buoannes gens, lé v'là, ma tâche ch'est qué d'vos racounter chein qui s'passe dans la tête à Ph'lip Desclios. Mais à m'n idée, i'n'faut pas l'prendre trop au serieux, surtout quand i' n'a pas bein dormi. Et, après tout, les membres dé s'Etâts ount acquo eun an dévant qu'la saisoun d'Guy Fawkes n'érveinne. Dans l'entrétemps i' peuvent tâchi dé s'ramoder et d'faithe lus mus pour lé beinêtre des Jèrriais. Mais jé n'm'envais pas vos garanti qué, dans eun an quand la saisoun d'pétards érveint, lé Ph'lip né s'ra pas en acquo pus mauvaise humeur qu'i'n'est achteu.
Et d'même, membres d'sEtâts, érgardez à vous. Quand ou' vos buttez dans la Chambre à vos vanter d'vos bêtises n'oubliez pas qué l'jour pouarrait bein v'ner ouestqu'ous éthaites eun hardi sale chouaix à faithe - d'aller vos plianter en Dgèrnèsy ou d'vos faithe sauter dans l'sEtâts. Et né mé d'mandez pas chein qu'ou' dév'rez faithe, car dans mon temps j'ai bein apprins dé n'jamais dounner d'avis ès seins qui m'en d'mandent. Tout ch'qué j'ai à vos dithe chest qué, n'importe si ou' décidez d'aller vos réfugi en Dgèrnésy ou d'vos faithe sauter dans l's Etâts, j'éspèthe qué l'Buoan Dgieu vos bénisse. Dans autcheun cas, ou's en éthez grand besoign.
Quant à mé, j'ai fait mon d've, j'vos ai dgèrnis. Et achteu i' faut qu'j'aille vaie si, après toute chutte plyie qué j'v'nons d'aver, la terre est en êtat d'travailli, car i' faut qu' jé m'mett' à foui. La saisoun tchi veint j'm'en vais faithe bein pus d'patates qué d'amors - deux pèrques à la pliaiche dé ieune. Mais j'sis p'têt' achocre dé faithe saver d'ité ès Etàts, car i' paraît qué chest countre la louai dé faithe pus d'patates qué nou' n'faisait d'vant sans la pérmission du Coumité Agricole. I's'peut bein qu'la préchaine fais qu'ous entendrez pâler d'mé jé s'rai à La Mouaie, à m'érgaler des pliaisis qu'i' vos fount là-bas. Et d'même ou' viyiez bein, buoannes gens, qué les membres éd s'Etâts né sount pas tout'à fait si vilains qu'nou fait à craithe. Ché s'rait acquo pustôt dommage d'les faithe sauter.
Viyiz étout: