Le Ménage ès Feuvres,
St. Ouën.
Lé 4 d'octobre, 1975.
Moussieu l'Rédacteu,
J'n'ai pâssé qu'chînq ou siex jours en Jèrri dans l'mais d'septembre et j'sis bein content d'm'y r'trouver pour trais s'maines dévant l'èrtou en Améthique pour l'hivé.
Où'est qu'tu' as 'té t'èrnarder chutte fais, don?, un anmîn mé d'mandait l'aut' jour.
Eh bein, j'lî dis, j'fus trais s'maines dans l'départément d'Charente, en France, et tchiques jours à St. Malo-St. Sèrvan, dans l'départément d'l'Ille-et-Vilaine.
Et où'est qu' tu t'pliaîsais l'mus? i' mé d'mandit.
Quant à ch'la, j'lî dis, jé m'pliais autcheune bord. Mais les trais s'maines en Charente 'taient siez un vieil anmîn viageux, l'Docteu Pièrre Juge, tch'était man compangnon d'viage en Tèrre Sainte en 1951, et en Grèce, Turtchie et l's Iles Dodécanèses en 1952. Et ch'est tréjous un pliaîsi pour mé d'êt' siez li et gâté par sa charmante danme et ses filles. Un raide bouan docteu, l'Docteu Juge. Consciencieux à san sèrment, Hippocratique, il est prîncipalement întérêssi dans l'bein-être des anciens et i' fait sa ronde dans la campangne deux fais par jour.
L'temps pâssé, la campangne ès alentours dé la ville d'Aigre, en Charente, où'est qu'lé docteu d'meuthe, 'tait l'pays du vèrjus. À ch't heu, nou-s-y vait un tas d'grain d'Espangne, et des vrégies dé tournésols. I' pathaît qu' la raison qué la tchultuthe du vèrjus n'a pon continnué en si grande quantité comme dévant est qu' la vîngne a bésoin d'un tas d'soin et qu'la main d'oeuvre couôte trop. L'temps pâssé, l'probléme n'existait pon viyant qu'les jannes restaient sus la fèrme d'lus pathents et 'taient contents d'lus sorts. Dé nouos jours, i' veulent lus mathier, acater lus meubl'ye, un moto, eune télévision, machinne à laver, etc., tout en mème temps. Comme i' n'peuvent pon gângni assez sus la fèrme d'lus pathents pour y subithe, i' s'en vont dans les villes et l's anciens restent à faithe dé lus mus touos seurs. Lé rêsultat est tch'i' n'peuvent pon continnuer à tchultiver lus tèrres, et i' les louent en grand' partie. I' n'vaient pon fort dé visiteurs, et les visites du docteu sont tréjous beinv'nues. Il est appelé l'anmîn des vieillards car i' prend bouan soin d'ieux.
Eune chose qué j'ai r'mèrtchi en France généralement est tch'i' sont à bâti des maîsons - comme ichîn - à tare-larigot. Dans les faubourgs ch'est des bâtisses à un tas d'êtages. Et nou-s-en vait tant en train d'construction qué nou sé d'mande où'est tch'i' s'en vont trouver assez d'monde pour l's otchuper. I' faut penser tch'i' y'a tout pliein d'prospéthité par les c'mîns, car lé nombre d'motos a grandi hardi ches dreines années.
Mes dreins jours en France pâssés à St. Malo et St. Sérvan, à ch't heu rêunis en eune seule municipalité, m'ont montré l'mème progrès. Les grands bâtiments ont fait lus appathence du côté dé La Montangne St. Joseph et tout l'tou du champ d'course dé Marville et i' m'sembl'ye qué St. Malo - outre-murs - a r'doublié en grandeu ches dreines années.
J'sis content d'êt' èrvénu en Jèrri, et j'm'en vais y rester jusqu'au jour d'èrtou en Améthique dans eune tchînzaine dé jours. J'ai r'gret qué j'né s'sai pon en Jèrri pour vaie l's êlections, car i' s'en va y'aver un tas d'candidats. I' m'sembl'ye qué nouos Êtats dév'thaient pâsser eune louai ordonnant tch'i' faudrait êt' Député d'vant pouver s'mett' sus les rangs pour Sénateu, car j'n'aime pon vaie des candidats tchi n'ont pon ieu d'éxpéthience dans la Chambre Législative vouler êt' Sénateurs. À m'n idée, les Sénateurs dév'thaient êt' des gens tch'ont siégi longtemps dans L's Êtats et tchi peuvent agi comme un frein pour adouochi, ou mème arrêter, un mio l'ambition des c'menchants et des membres tchi veulent faithe un tas d'dêpenses pour lus mett' en bouan rapport auve des groupes partchulièrs dans lus district electoral, ou pour gângni des vouaix dans l's êlections.
V'la tchi m'fait grand pliaîsi d'vaie qué, grâce au fanmeux discours qué l'Député P. M. de Veulle fit dans L's Êtats l'aut' jour, et la généthôsité et l'bouan sens d'La Chambre, l's autorités s'en vont prêsèrver la côtchiéthe dé la vielle prison. Dans un mangnifique articl'ye dans la gâzette du trais d'octobre, lé Sieur Robin S. Cox nouos dit tch'il est dit qué l's armeûthies Rouoyales en d'ssus d'la date 1812 sus lé d'vant d'la côtchiéthe avaient 'té faites par lé Guichetier Giffard. Eh bein, i' n'y a pon d'doute au sujet. Y'a tchiques années, Moussieu Moon, lé Gouvèrneux d'la prison, m'dit qu' iun d'ses empliyés avait mînt eune êtchelle en pliaiche et tch'il avait examinée l's armeûthies d'près, et qu' la sîngnatuthe du Sieur Giffard 'tait d'ssus, et la date dé l'année étout.
John Philippe Giffard, pus tard Cap'taine Giffard, 'tait man grand-péthe matèrnel. Il 'tait un fanmeux stchulpteux, et ch'tait li tch'avait fait toutes les stchulptuthes dans les caves dé Champion, mênommées The Troglodyte Caves à La Crouaix d'Bouais, à St. Sauveux. Et ch'tait li tch'avait fait l'estatue de Citiwayo, Chef des Zoulous, tch'était là étout.
George d'La Forge
Viyiz étout: