Le Ménage ès Feuvres,
St. Ouën.
Lé 16 août, 1969.
Moussieu l'Rédacteu,
J'veins d'èrpasser eune dgiêxaine dé jours en France. Y'a tchique temps j'tais en Nouormandie, mais chutte fais j'tais en Brétangne - pas quand mème bein liain d'La Nouormandie, mais liain assez pour trouver eune difféthence. La vie est bein pus mouvementée dans l's envithons d'St. Malo, et les gens d'là n'ont pon l'calme des Nouormands. I' sont bein pus annimés, et il' ont bein pus d'becque!
Ieune des choses tch'est tréjous ravissante pour mé est qu'les gens l'tou d'St. Malo (St. Malo, St. Servan et Paramé veinnent d'êt' rêunies en eune seule ville affaithe d'administration, et ch'est l' Maire dé St. Malo tch'est l'chef de trais villes à ch't heu) pâlent tréjous à tue-tête, dans les rues comme siez ieux, et tch'i' traitent tout au sérieux comme si lus vie en dêpendait! Il' aiment lé brit, étout, et nou ouait l'klaxon d'lus motos partout, car i' cachent comme des fos dans les villes comme dans la campangne, et i' faut s'dêcârrer dêliêment pour sé garder sus ses pids d'drièthe. Et l'nombre d'motos a grandi un tas ches dreines années.
S'nou d'mande à tchitchun à tchille heuthe qué la beusse passe par l'Hôtel dé Ville, ch'est r'mèrquabl'ye combein d'tîntamârre qu'eune sîmpl'ye tchestchion d'mème s'en va dêclientchi: Dans deux minutes!, tchitchun ditha.
Mais non, un aut' ditha, elle vient de passer, celle-là! La prochaine quitte La Lorette à treize heures!
Mais c'est bien celle-là qui vient dans dix minutes!, le preunmié dit.
Tu'es fou!, un aut' ditha, celle de treize heures va à La Gare de St. Malo!.
Mais c'est toi, qui est fou!, l'aut' ditha, elle passe par l'Hôtel de Ville d'abord!. Par chu temps-là il en veint ieune, eune beusse, et nou monte à bord quandi tch'i' sont acouo à ardgumenter!
Eune chose tch'est r'mèrquabl'ye, étout, est l'nombre d' pourboires qué l'monde donnent. Ch'n'est pon seulement eune affaithe d'en donner iun quand nou-s-ordonne un vèrre dé biéthe dans l'aubèrge ou café, mais i' pathaît qu'un tas d'fonctionnaithes y'ont drouait. Quand l'porteux d'lettres apporte un mandat ou des sou (ch'est d'habitude par la poste qué les pinnetchinneurs èrchévent lus pinnetchinnes), i' faut lî donner l'pourboire. Si l'mousse dé la boutique d'livre tchiquechose à la maison, il en a iun étout. S'ou-s-allez au cinnéma et qu'eune hardelle vouos montre ioù vouos assiéthe, i' faut li en donner iun! Quand nou va à l'églyise i' faut payi pour s'assièthe. Et i' font la collecte quand mème. Et quand nou va dans cèrtaines toilettes y'a des chances qué nou-s-y trouvetha eune femme (ouaithe qué ch'en est ieune pour hommes!) tchi s'en va collecter tchiquechose. Et i' pathaît qué si nou n'lé donne pon, l'pourboire, v'la tchi veurt dithe qué nou n'sait pon vivre! Et dans l's hôtels et restaurants i' faut s'faithe seux quand nou r'garde l'ménu si dgix ou douze pour chent est additionné pour lé sèrvice, ou si les prix sont service non-inclu.
Et pis, i' faut êt' connaisseurs des vîns pour saver comment apprécier un bouan r'pas. I' faut baithe lé blianc ou l'rouoge auve cèrtains plats, et i' faut baithe ou mangi chennechîn ou chen'na pour aîdgi la digestion! J'ai bieau lus dithe, mé, qué j'digéthe autcheune chose sans baithe du vîn, ou mème rein n'baithe en mangeant, i' craient qu'ch'la n'est pon pôssibl'ye et il' ont pitchi d'mé!
Y'a sans doute eune grand' majorité des gens en France tchi sont au ras d's êvènements tchi s'pâssent dans l'monde, mais j'ai 'té surprîns d'dêcouvri qu'un tas des cheins qu'nou rencontre dans la rue n'y sont pon. Un homme mé dîsait l'aut' jour qué l's Améthitchains dév'thaient donner lus sou au monde tchi sont dans l'bésoin à la pliaiche dé les dêpenser pour aller à la leune. Eh bein, j'lî dis, ou-s-avez p't êt' raison, mais i' n'faut pon oublier qu'nou n'peut pon enrichi un publyi, et qu'si touos les sou en Améthique 'taient chârés en êgales portions par touos l's individus au monde, y'en éthait tchi r'séthaient sans l'sou au but d'eune sémaine ou deux! Mais si touos les pays tchi daivent des sou à l'Améthique la payaient, ou pouôrrait soulagi touos les pauvres et aller à la leune en mème temps!
Eh bein, p't êt' bein, i' m'dît, heutheusement qu'la France a remboursé ses dettes à l'Améthique y'a longtemps! Appathemment i' n'savait pon l'contraithe, et jé n'lî dis pon car ch'n'est pon seulement La France tch'est à sa dette, à l'Améthique. En 1966 les sou tchi lî'étaient deus par d'aut' pays pour les dêpens d'la dgèrre dé 1914-1918 dêpassaient la somme dé vîngt-iun billions d'dollars, et ch'est seux qu'chutte somme-là a grandit d'pis.
Mais n'criyiz pon, bouannes gens, qu'j'ai rein contre La France et les Français. J'ai d'bouans anmîns en France, et jé m'pliais bein siez ieux. I' sont av'nants et d'bouan tchoeu, et quand nou-s-a un anmîn en France nou peut s'fier sus li. Et dites-mé ioù qu'nou mange mus qu'en France?
George d'La Forge
Viyiz étout: