Trenton, Michigan,
U.S.A.
Lé 6 d'novembre, 1965.
Moussieu l'Rédacteu,
Quand j'tais en France dans l'mais d'août, j'pensis qu'j'ithais vaie si j'pouvais trouves des noms Jèrriais sus les tombieaux dans les chinm'tchiéthes à l'entou d'St. Malo. Devant la grand' dgèrre dé mil neu' chent quatorze y'avait un tas d'Angliais tch'avaient des villas à Dinard et à St. Servan et tch'y passaient les êtés. V'la tchi n'veurt pon dithe, sans doute, tch'il' y laissaient lus os, mais sachant l'incertitude de l'heure de la mort, comme nou-s êcrivait au c'menchement des testaments quand j'tais janne et commis d'êcrivain dans Hill Street, y'en avait tch'y trouvaient lé r'pos êtèrnel et tch'étaient entèrrès-là.
I' soulait y'aver eune belle églyise Anglyicane à St. Servan, et j'm'èrsouveins d'y aver 'té à des sèrvices au c'menchement d'mil neu' chent quatorze, mais l's Angliais, appauvris par la dgèrre, restaient siez ieux l'êté et l'églyise fut abandonee tchiques années pus tard. Y'a acouo eune églyise Anglicane à Dinard tch'est gardée en bouan' ordre et tch'est bein frequentée en êté. Ouaithe qué l's Angliais n'y d'meuthent pon tout l'êté, à Dinard, comme dévant les deux grand' dgèrres, i' y'en va tout pliein pour des courtes vacanches.
Y'a un p'tit chînm'tchiéthe drièthe l'Hopita du Rouais où-est qué j'trouvis un tombé inscrit : Ici repose le corps de Frèdèrie, Comte de Chateaubriand né à Jersey lé 11 novembre, 1799. I' dait y'aver un r'cord dé sa naîssance dans lé r'gistre en Jèrri. Il 'tait probabl'yement pathent au Vicomte François René de Chateaubriand, illustre êcrivain Français né à St. Malo en 1768. Lé Vicomte mouothit en 1848 et fut entèrré sus l'Grand Bey, eune pétite ile dans la grève dé St. Malo.
Dans l'mème chînm'tchièthe, y'a étout, un d'Auvergne entèrré. I' pathait qu'y avait eune fanmille dé chu nom-là ès alentours, mais comme en est l'cas en Jèrri, pethînmée à ch't heu.
Lé vièr chînm'tchièthe dé St. Servan, tout près d'l'Églyise Parouaîssiale, tchi n'a pon 'té fait sèrvi pour bein d's années, a un p'tit coin auprès d'sa grand' porte tch'était êvidemment rêsèrvé pour l's Angliais. Y'en a eune quantité d'dans, et j'mé sis tréjous d'mandé si lus d'scendants (s'i' y'en a?) en Angliétèrre savent tch'i' sont-là! Lus noms c'menchent à êt' êffachis dans bein des cas, preuve du passage du temps. Parmi les noms Angliais y'en a iun, nommé Charles Horlock, dé La Motte House en Jèrri, mort en mil huit chent chînquante-huit.
Dans l'chinm'tchièthe parouiscial d'à ch't heu, y'a un tombé en mémouaithe du Révérend Charles Pallot, Êvangeliste, d'La Trinneté, en Jèrri. Ch'tait un bieau tombé quand jé l'vis la preunmié fais y'a dgiex-neuv' ans, mais il est en d'lacre à ch't heu. Y'a d'la mouoillêtuthe dans chutte cârre-là du chinm'tchièthe et la sépultuthe a donné d'un côté et la crouaix est bas. Il est inmpossibl'ye dé lièthe les dates sus l'granit. À St. Servan, pas bein liain d'la cauchie d'St. Malo, y'a eune pétite églyise Protestante appelée l'Églyise Evangelique, et ch'tait probabl'yement là qué l'Révérend Charles Pallot 'tait l'Pasteur.
Dans eune aut partie du chinm'tchièthe y'a un tombé en mémouaithe dé Henriette, femme dé Lerrier Godfray, d'Jèrri, née l'preunmyi d'janvyi mil huit chent vîngt-trais et décédée lé vîngt-quatre septembre mil huit chent nénante-neuf. Ouaithe qué l'nom d'fanmile dé la défunte n'est pon donné, y'a lieu d'craithe qué ch'tait du Perrut, car un p'tit pus bas sus l'tombé y'a eune inscription à Henriette du Perrut, sa nièce. Madanme Godfray, sa tante, tch'avait nom Henriette étout, 'tait tout probabl'yément sa marraine.
Ieune des choses tchi vouos frappe quand nou s'promène en France touos l's ans, est qu'auve lé passage du temps les chinm'tchièthes pathaîssent tréjous rester d'la mème grandeu. Ch'n'est pon comme en Jèrri où-est qu'nou vait l'chinm'tchièthe dêborder ses vielles linmites et r'quémenchi dans l'clios à côté. V'la tchi m'pathaîssait drôle pour une volée, mais en fin d'compte j'dêcouvris tch'est qu'en 'tait la cause.
Quand nou-s acate eune sépultuthe en France, i' faut dêcliather si nou veurt chein tch'il' appellent eune concession perpétuelle. Autrément, la nue propriêté d'la sépultuthe qué nou-s acate appartcheint ès autorités du chinm'tchièthe et nou n'en à qu'la jouissance pour un nombre d'années, dîsons vingt-chînq à trente ans. La concession pérpétuelle couôte bein pus à l'êtchipolent qu'l'autre, car oulle appartcheint à l'acateux à pèrpétuité. Nou la r'connait tréjous en passant, car l's initiales C. P. sont gravées d'ssus.
À bein près touos les vingt-chînq ou trente ans, la pus vielle section du chinm'tchièthe est dêcliathée être en suspens pour renouvellement (ou tchiques mots tchi veulent dithe la mème chose). Toutes les pus vielles sépultuthes tchi n'sont pon concessions pèrpétuelles sont r'ouvèrtes et l's os sont transféthés dans un ossuaithe houors dé veue souos tèrre dans eune cârre du chinm'tchièthe et les fosses sont r'faites sèrvi. Ch'est pratique, et v'la tchi garde l'chinm'tchièthe de la mème grandeu. Sans doute, autcheune pèrsonne tch'a pathents ou anmîns dans chutte section-là peut racater la sépultuthe pour eune aut' période pour qu'ou' né s'sait pon dêrangie. Actuellement, l's autorités prannent toutes les précautions possibl'yes pour s'asseûther qu'les sépultuthes èrlévées n'avaient pus pèrsonne à en souangni, et y'en a tréjous un tas d'ches'là trente ans auprès înhumation.
George d'La Forge
Viyiz étout: