Le Ménage ès Feuvres
St Ouën
Le 30 dé Juilet, 1977.
Moussieu l'Rédacteu
"Ou'est qu'tu-as ouï ch'lá?", Papa d'mandit à Manman quand j'tions au pid du feu eune séthée y'a eune huiptantaine d'années à La Forge, ès Landes.
"Ch'tait quand j'tais à faithe la leinsive l'aut' matin au dou à laver ès Fontaines Martîn," ou lî dit.
"Eh bein, ma femme," Papa lî dit, "i" n'faut pon s'fier trop sus chein qu' nou ouait les femmes dithe quand i'sont au dou. I' lus pliaîsent bein à varvoter là!"
"Si tu viyais l'grand lavage qué hardi d'ches femmes là, tch'ont d'grand' fanmil'yes, ont à faithe, tu n'pál'lais pon d'varvoter" s'fit Manman.
"Mais comme tu l'sai bein, Anne," Papa lî dit, "dépis qu'à rithe et à badinner nou n'sé câsse pas les dents, nou peut dithe qu'à varvoter nou n's'ûse pon les pids!"
"Tch'est qu'ch'la veurt dithe varvoter?", jé d'mandis à Papa.
"Eh bein, man garçon," i' m'dit, "i' n's'applyique pon rêellemment au dou à laver, mais nou l'fait sèrvi d'temps en temps viyant qu'nou-s-appelle tchique-fais l'dou un 'varvot', et comme les femmes, à l'exeption d'ta Manman, sans doute, aiment hardi à pâler quand i' sont ensembl'ye, nou dit, en riant, tch'i' sont à varvoter.
"Actuellement, du varvot est eune atchumulâtion ou taque dé pité, et quand nou vait les mousses à patouaûgi dans les p'tites mathes lé long des rues quand i' tchait d'la plyie, nou peut dithe tch'i' sont à varvoter dans l'ieau ètout. Et le cannards aiment bein varvoter au bord du vivyi ou dans l'ieau ètout. Et les cannards aiment bein varvoter au bord du vivyi ou dans l'canné ou dans l'pité."
"Ch'est assez drôle," continnuit Papa, "qué les deux-s'trais généthâtions d'mousses, filles et garçons, qu' j'ai veu dans ma vie, ont aimé à marchi dans l'ieau dans les rues, et à travèrs des p'tites mathes, quand il a tchée d'la plyie. Et ch'est seux qu' un tas d'ieux ont ieu lus pids et cauches mouoillis par lé temps tch' il' arrivaient à l'êcole. Et ch'est drôle tch'i' n'en attrapaient pon l'fraid d'la mort. Mais v'la tchi n'fait pon d'bien à bottes et souliers, et ch'est ès frais des pathents et au profit d'Mait' Elie Maugi, ouaithe qué comme mé, i' n'mouôrra pon riche car un tas d'fèrmièrs tchi n'paient qu'eune fais par an quand la saîson est bouanne, né peuvent pon payi quand oulle est mauvaise, et nou n'veurt pon lus faithe dé peine, lus vie étant duthe assez comme ch'est."
"Mais quand j'allis siez Mârraine d'Aubèrt à La Mouaie à St. Brélade," j'dis à Papa, "oulle avait eune femme à faithe san lavage, et ou n'allit pon à un dou à laver. Ou restit dans un p'tit bâtisse dans l'bel en driéthe dé la maîson, et lyi et Mâraine fîdrent lé lavage ensembl'ye dé but côte à côte lé long d'eune manniéthe dé longue bouaîte comme un tro à pêtri, montée sus l'haut d'deux bathis, qué Mârraine appelle un 'traie'".
"Véthe, "Papa m'dit, "ch'est d'tchi nouvé. I' n'faut pon oublier qué nouos v'la quâsi à la fîn du dgiex-huitième siécl'ye, et qu' les temps ont changi. Penses, dans deux-s'trais ans d'ichîn jé s'sons à l'année mil neu chents! Les femmes c'menchent à aver la vie pus aîsie à ch't heu. Les gens bâtissent un p'tit bâtiment exprès pour faithe lé lavage tch'il' appellent 'la lavethie' et mettent eune grand' ronde chaudgiéthe dans eune cârre, appelée 'un cappeur', auve un feu d'ssous, pour bouoilli l'lînge dédans, et pis i' l'lavent dans l'traie comme tu-as veu siez ta Mârraine.
"Comme j'té l'disais," Papa continnuit, "tout change auve lé pâssage du temps. J'pathie qué dans tchique temps à l'av'nîn, quand j'éthons pâssé l'pas, ta Manman et mé, il éthont înventé des machinnes tchi lav'-thont l'lînge sans qu'nou-s-y met' la main!"
"Mais ché s'sait împossibl'ye, Papa!", j'lî dis.
"Ah!", s'fit Papa, "comme nouos l'dit la 'devise' sus l'êtchusson du Juge Alfred Meservy, iun d'nouos grands savants sus l'Banc d'Justice dans la Cour Rouoyale, 'Au valeureux coeur, rien impossible!' Les Saintes Ecrituthes nouos disent qu' à l'av'nîn j'vèrrons un tas d'changements, et il' ont dêjà c'menchi à faithe lus appathence. Né v'la dêjà eune dgiexaine d'années qu' j'avons la cârrosse tchi va sans j'vaux sus un c'mîn d'fé d'la ville à La Corbiéthe."
"J'voudrai bein la vaie, mé, chutte cârrosse-là," j'dis à Papa. "J'ai ouï un mousse à l'êcole dithe qu'ou fait un brit abominnabl'ye et qu'ou feunme comme eune cheunm'née et qu'ou fait peux quand oulle appréche!"
"Eh bein," Papa m'dit, "si tu-es un bouan garçon, j'îthons vaie ta Mârraine à La Mouaie tchique sanm'di qué jé n'sis pon trop embarrassé dans la forge, et tu la vèrras car ou pâsse par là en c'mîn pour La Corbiéthe."
George d'La Forge
Viyiz étout: