Ph'lip et les Baillis
La Bus de L'Etâ
à Portinfé,
Jeudi au sé
Moussieu l'Editeu
J'n'ai pas bésoin d'vos d'mander s'ous avez veu d'la né par siez vous agniet, car ch'est seux que y'en a yeu partout. Ichin, j'en avons yeu une vraie couoche, et i'n'y a autchun signe d'amendement pour tchique temps.
Un p'tit accident a arrivé à la Merrienne à la matin, car en allant pour sa p'tite prom'nade au bas du gardin (notre salle de bain étant ocquo hors de commission), ou s'est êtrav'lée tout san long dans la né. Pour tchiques instants je n'savais pas tchi faithe, car, avec toute la bouonne volonté du monde, je n'pouvais pas me l'ver d'ma tchaise pour aller à s'n aide. Heutheusement, à travers la f'nêtre, j'l'ai veu se r'lever et continuer à sa destinâtion. Quant oulle a rentré un mio pûs tard, ou m'a joint dans un vérre caud et s'est r'trouvée tout a fait ravigottée. Mais, la pouôre garce n'est pas heutheuse, car touos les jours ou prend l'deu pour ses flieurs, tchi sont à ch'teu, après aver souffert par les vents d'est, endormies souos la né. Comme ou s'fait, ch'est minséthe sûs minséthe!
J'ai 'té bein content d'vaie sûs la gàzette à ces sé que Moussieu l'Bailli, tch'est à l'Hôpita, s'trouve un mio mûs et j'espèthe que dans p'tit d'temps nou le r'vêrra dans l's Etats et la Cour Royale. I'n'ont pas tous yeu trop d'chance, nos Chefs Magistrats. J'me r'souveins de Messire George Clément Bertram, tchi connaissait touos les partitchuliers d'la Louai, mais tchi 'tait maladif et souvent absent. Après li, vint l'célèbre Moussieu Vernon, tchi 'tait fort comme un ch'va et otchupit l'poste pour trente-deux ans. I'fut succedé par Moussieu Malet d'Carteret, mais ch't'ichin n'y fut pas bein longtemps. Bein difféthent, Moussieu Coutanche, tch'est à ch'teu parmi la noblyesse en Angliétêrre et membre d'la Haute Chambre du Parlement. Le Sieur Harrison, comme tout l'monde sait, fut attachi par une mauvaise maladie, et toute l'Ile r'grettit hardi quand vint la nouvelle d'sa mort.
I n'est pas v'nu d'bus par siez-nous agniet et quand Merriene en a fait la r'merque j'li ai d'mandé s'ou se r'souvenait d'la vielle bus tch'allait de l'Etâ en ville touos les samedis. Ou m'a dit qu'nennin et don j'ai rapp'lé à mémouaithe lé bouonhomme tchi sortait de l'Etâ avec sa bus à deux ch'vaux touos les samedis à neuf heuthes et r'venait pûs ou mains quand i'pouvait. I'li prenait bétôt deux heuthes à faithe la distance et nou payait douze sous pour aller et douze sous pour r'vénin. Les patchets et le p'tit baggage allaient sûs l'haut. A r'vénin jamais nou n'pouvait s'faithe seux de chein tchi s'en allait arriver, car le bouonhomme avait trouvé trop d'amins en Ville et, n'y'viyant pas cliait, houtchait les fossés, les muthâlles et les pierres de heches. Une bordée un bouon St Ouennais fut bein près d'être un St Pièrrais car sa mèthe n'éthait pas deu être là du tout et arrivit siez-li justement en temps. Sans doute, s'ou n'avait pas sorti d'la bus au bas d'Bieaumount pour aidgi à la pousser jusqu'au haut, la naissance éthait 'té un mio prolongie.
Nou-s-entend hardi, chais jours, de chein tchi s'appèle le Marchi Commun. Eh bein, Moussieu, chein qu'ch'est chu Marchi Commun j'n'y connais rein, mais si je n'me trompe pas, chenna voudra dithe dé pûs hauts prix pour tout chein que nou voudra accater et j'souffrons dêjà de chutte maladie-là. I'pathait que le Sieur de Gaulle n'en veur rein et chenna n'me surprend pas, mais quand i'voudrait s'pather l'Europe de l'Améthique, i'pâsle comme un imbécile, et bétôt i'l'vêrra.
Par les chiffres qu'ont pathu sûs la gâzette, i'pathait que nos visiteurs l'année passée dépensitent une ênorme somme dans l'Ile et nou s'attend que y'en étha ocquo pûs ch't année. Tout ch'que j'ai à dithe là-d'sûs ch'est que rein de chais millions ne vintes à Portinfé, chein tchi fait qu'la Merrienne et mé, je n'sommes pas intérrêssis. J'avons cachi sans l'aide des visiteurs toute notre vie et j'pouvons ocquo l'faithe avec l'aide d'la Providence.
I'faut féliciter le Sieur Gaudin et san Comité des Louogements pour aver démontré au Connétablye d'la Ville, au Député Jeune et deus-trais autres tch'éthaient voulu mettre le Comité à la porte, que ch'n'est pas si facile comme tout chenna. Sans autchune doute le Comité, comme touos l's autres tch'avaient 'té à d'vant yeux, ont fait des bêtises. Mais la grande mâjorité des membres d'la Chambre sont bein lyien d'être satisfaits que l's hommes tchi voudraient lûs djobbe f'thaient mûs, ou même aussi bein. I'veulent aller trop vite, chais mêssieux-là et ch'n'est pas d'même que nou réussi dans la politique en Jérri. Ils apprendront lûs léçon tôt ou tard.
Il a 'té annoncé que y'eut une perte de pûs de trais chents louis l'année passée sûs l'Eisteddfod. Le fait est, Moussieu, qu'les gens en sont engniés, comme ils avaient fait y'a d's années, dans l'temps de Doyen Falle. Il est vrais que la Séthée Jérriaise va ocquo, mais même-la, j'n'avons pas les caractéthes comme la Missis Trachy et l'George de Cart'ret. Quant à la danse ch'est, et ch'a tréjous 'té, pour le bénéfice des maitresses de danse, mais l'Eisteddfod lûs donne trop d'temps, et le monde ont qu'menchi à lûs en lâsser. Avec toutes chais clâsses i'y'a trop d'dêpenses et le Comité Général étha a trouver tchique moyen d'les réduithe.
Nou dit, Moussieu, que les compagnies d'asseuthance s'en vont à payi pour hardi du ma tch'a 'té fait par la g'lée. Chenna n'me gêne pas, car j'ai payi pour un grand nombre d'années et j'n'ai jamais yeu un sou d'l'asseuthance.
Merrienne crie pour sa méd'cine et une goutte ne me f'tha pas d'ma ni'n'tout.
A bétôt
Ph'lip
Viyiz étout: