San Antonio, Texas, U.S.A.
Lé 28 janvyi, 1967.
Moussieu l'Rédacteu,
À la fîn des fîns! J'veins d'èrchéver - un mais en r'tard - la gâzette tch'annonce lé rêsultat d's êlections pour Député! Y'a longtemps qu'j'attendais fête dé vaie chu rêsultat-là, viyant qu'iun d'mes grands anmîns, Moussieu Philip Mauger de Veulle, 'tait candidat à St. Cliément. Heutheusement, il est iun des gangnants, et j'lé félicite! Et j'félicite les St. Cliémentais, étout, pour aver ieu l'avis et l'bouan sens d'l'êlithe pour les r'présenter dans L's Êtats. Jé n'connais pon un autre homme dans tout Jèrri tch'est pus dîngne d'êt' membre dé la Chambre Législative dé l'Île et ieune des choses qué j'admithe en li est qué, quand y'avait tchestchion dé l'mett' sus les rangs pour Sénateu, il 'tait d'avis tch'i' fallait c'menchi au bas d'l'étchelle - comme Député - devant aspither au pus haut grade dé Sénateu!
Eune chose tchi m'avait amusé en liêsant les lettres au Rédacteu dans la gâzettes dé d'avant, 'tait qu'un correspondant li'en voulait, au Sieur de Veulle, viyant tch'i' n'l'avait pon arrêté d'court dans san discours quand il avait dit tch'il 'tait Jèrriais. Ch'tait viyant tch'i' fut né en Angliéterre! N'en v'la-t-i' du niolîn! Si un Chinouais est né en Jèrri - d'pathents chinouais - i' n'est don pon Chinouais quand-mème? Et touos les Jèrriais nés en mé quand les cap'taines avaient lus femmes auve ieux à bord des navithes à vailes dans l'temps passé, dans l's océans d'l'Atlantique, du Pacifique, des Îndes ou ofûche dé La Chine, n'étaient don pon Jèrriais? Y'a eune chose tch'est bein cèrtaine: Ouaithe qué l'destîn m'a enm'né en Améthique gangni ma vie et qué j'sis dév'nu citouoyen d's Êtats-Unis, j'mé crai acouo Jèrriais dans l'âme. Et l'Sieur de Veulle, né à Londres, n'en est pon mains Jèrriais!
Les nouvelles dans la gâzette du 22 d'dézembre - j'n'ai pon 'couo r'chu la cheinne du 15 dé chu mais-là m'ont fait grand pliaîsi à liéthe. À c'menchi, l'êlection d'Moussieu de Veulle et d'Moussieu John E. Gaudin comme Députés, et pis la ré-êlection d'Mad'mouaiselle Enid Le Feuvre (j'sommes couôsîns d'liain). Ch'est acouo eune plieunme dans l'chapé des St. Cliémentais tch'il' ont ieu l'avis dé renv'yer l'ex-Sénateu Gaudin ès Êtats pour continuer san bouan travas. J'm'èrsouveins qué quand i' prînt chèrge du conmité pour bâti des maisons, y'en avait tchi criyaient tch'il en f'thait eune maie, mais il a prouvé, du tout c'menchement et avaû l's années, tch'il est l'homme tch'i' faut pour chutte tâche-là. I' li'a fallu du couothage et d'l'apliomb pour combattre les critiques des membres des Êtats tchi n'accordent pon auve li, mais i's'en est atchitté mangnifiquement!
Eune aut' pliaîsante nouvelle est l'mathiage dé Kenneth Vibert et d'Beryl de Gruchy, deux charmants jannes St. Ouënnais qué j'connais d'pis bein d's'années et qué j'vai à l'églyise dé St. George (où-est qué j'fus bâptisi y'a 75 ans!) touos les dînmanche quand j'sis en Jèrri. J'lus souhaite jouaie, et eune longue vie ensembl'yes plieine dé bonheu, d'bouanne santé et d'prospéthité.
J'tais content d'vaie, étout, l'portrait du Màjeur-Général Neville Godfray Hind dans la gâzette, un vrai moussieu Jèrriais tch'est charmant et tchi vait tout l'monde. Ch'est bein seux tch'i' méthite bein l'honneu accordé par l'Ordre d'St. Jean d'Jérusalem. J'mé d'mande combein tch'i' y'a d'pèrsonnes en Jèrri tchi savent qué l'Général Hind 'tait iun des grands officièrs tchi c'mandaient l's armées Angliaîches (souos Lord Wavell) tchi chassîdrent l's Allemands d'l'Êgypte dans la deuxième grand' dgèrre?
À ch't heu, j'm'en vais mentionner la nouvelle tchi n'est p't êt' pon trop bouanne pour Jèrri - l'êlection d'un Communiste comme Député. En mème temps, i' faut avouer qué la fîn du temps f'tha tout vaie, et i' n'faut pon l'condamner d'vant vaie tch'est qu'en s'sa eune fais dans l's Êtats. J'connaissais san papa, au Sieur Lé Bro - un homme întégre et d'bouanne condite, et san p'tit-fis dait aver héthité tchiquechose dé bouan d'li. J'espéthe qué l'opinion exprînmée dans l'articl'ye d'fond d'la gâzette - qué san Communisme n'est pon l'chein d'Moscou - es'sa prouvé en véthité par sa condite dans la Chambre d's Êtats. Tch'est tchi sait? Auve li et l'Sénateu J. J. L'Mèrquand (qué j'félicite étout sus s'n êlection), tchi n'est cèrtainement pon partisan du Communisme, i' y'étha p't êt' du rêvillon dans les séances! Quant à la r'cliâme du Sieur Lé Bro tch'il est lé r'présentant des travailleurs, i' m'sembl'ye qu'un Député est supposé d'présenter tout l'monde dans san district êlectoral. Et pis, étout, s'i' faut qu'les travailleurs lé paient pour les r'présenter, j'mé d'mande tch'est tchi'i' peuvent y gangni quand i faut tch'i' paient dêjà des taxes à la Sécurité Sociale et à lus syndicats. Ché s'sait iun d'pus à payi! Et i' m'sembl'ye qué l's Êtats ont tréjous prînt la part du travailleux dans lus délibéthâtions. Tch'est tch'i' peuvent faithe dé pus? Lé fait en est qué châque fais qu'les gages sont hauchis il en compte ch'là d'pus pour produithe les bésouains d'la vie et pèrsonne n'y gangne. Lé commerçant et l'boutitchi n'y pèrdent janmais ieux. Quand il' ont à payi pus pour l'articl'ye tch'i' vendent i' hauchissent lé prix à l'acateux!
George d'La Forge
Viyiz étout: