Moussieu l'Rédacteu,
J'félicite lé Sieur F B. Murfin pour sa mangnifique lettre du 17 dé févri entouôrre l'Églyise d'Angliétèrre, tchi pathut dans la "Jersey Evening Post" du 23 d'févri, 1983. En la liêsant, j'm'apèrchus tout d'suite tch'i' connaît san sujet à fond et tch'il est un bein miyeu historien qu' mé.
J'sis d'accord auve tout ch'tch'i' nouos dit, mais l'preunmié paragraphe dé sa lettre montre tch'il a mal comprîns l'objet d'la meinne - tch'était d'êprouver à convaincre les gens qué l'Eglyise d'Angliétèrre a tréjous 'té l'Églyise d'Angliétèrre dès sa naîssance, et qué Henri VIIl né fondit pon eune nouvelle Églyise quand il eut sa dispute auve lé Pape dé Rome. I' n'fît qué d'changi cèrtaines dé ses couôteunmes, bouannes ou mauvaises, san langage du Latîn à l'Angliais, et voler probabliément autant qu' possibl'ye dé san trésor. Mais i' n'changit pon san caractéthe catholique, et la Succession Apostolique dé sa prêtrise fut présèrvée.
Lé nom d'l'Églyise a tréjous 'té l'Églyise d' Angliétèrre, qu' ou fûsse assujettie à la juridiction des Papes dé Rome ou des rouais ou reines d'Angliétèrre, et j'n'ai janmais veu autcheune écrituthe tchi prouve lé contraithe, et Henri VIII ni Élizabeth né l'changîdrent pon V'là tchi m'nâvre quand j'ouai des gens dithe qu'ou fut fondée par Henri VIll quand oulle est réputée d'aver déjà 'té en existence quand St Augustîn otchupit l'siège épiscopal dé Cantorbéry y'a treize chents ans ou pus.
J'vai dans la gâzette qué Madame Winnie Macready a tchitté comme Ségrétaithe dé La Société Jersiaise. Eune charmante danme si janmais y'en a leu ieune, Madanme Macready, et j'sis seux qu' oulle est aimée et respectée par touos les membres dé la Sociêté. J'li souhaite jouaie et bouanne santé. J'sis bein content d'vaie qué ch'est l'Canon Lawrence Hibbs, tchi s'est r'tithé comme Recteu d'Grouville, tchi s'en va la rempliaichi comme Ségrétaithe dé La Société Jersiaise. J'lé rencontris quand il 'tait Recteu d'la pâraisse dé La Trinneté. Dans chu temps-là j'tais à faithe la généalogie d'la fanmil'ye Giffard, ma méthe en étant ieune, et à un moment donné y'en avait gentiment dans chutte pâraisselà. Moussieu Hibbs mé fut bein agriabl'ye et courtouais, et m'donnit pèrmission d'faithe des r'chèrches dans les r'gistres.
J'ai tréjous ieu eune bouanne impression des gens nommés Hibbs qué j'ai connu. Quand j'tais sèrvant dans l'sanctuaithe dé l'Églyise dé St. Simon, iun d'mes "confrères" 'tait Gordon Hibbs. Un bieau grand janne homme. Il allit au collège dé la Society of the Sacred Mission à Kelham, en Angliétèrre, et fut éventuellement ordonné prétre dans l'Églyise d'Angliétèrre. l' m'sembl'ye qué j'lé vai acouo dans l'habit qué l's êtudiants dé chutte société là m'ttaient. J'ai eune cèrtaine idée qué lé Révérend Gordon Hibbs (décédé v'a tchiques années, à ch'qué j'ai ouï) et l'Canon Lawrence Hibbs 'taient appathentés.
Et j'connais un nommé George Hibbs, tchi travâle à l'Aéroport à St. Pièrre. I' n'est pon minnistre - ouaithe qu'à m'n idée il a des qualités bouans assez pour y'être. Un raide bouan garçon tchi m'a rendu bein des sèrvices et tch'est tréjous prêt à aidgi ès anciens.
Un aut' minnistre èrtithé dé tchi qu' j'ai veu san portrait dans la gâzette à ches drein est lé Révérend Raymond Hornby, tch'a 'té prêtre dans l'Églyise Anglicanne pour souoxante ans. J'tions ensembl'ye dans l'sanctuaithe dé l'Églyise dé St. Simon étout dans les vièrs temps. Un vraie Moussieu, lé Sieur Hornby, et il a un mangnifique sens d'humour. J'tais surprins d'liéthe tch'il avait 'té ordonné prêtre par l'Évêque dé Tchubec. Jé n'savais pon tch'il avait 'té au Cannada. J'l'avais absolûment pèrdu d'veue dépis qué j'tchittis Jèrri pour aller à la dgèrre dé 1914-18 mais j'eus l'pliaisi dé l'vaie à l'Églyise dé St. Jean y'a deux-s'trais ans à eune entèrrement (j'crai que ch'tait la cheinne du Sieur Le Boutilyi). J'li souhaite eune bouanne santé, bouan pid, bouan yi, bouanne dent et l'Paradis à la fîn d'ses jours. Et piêsse-t-i' vaie chent ans!
Acouo un aut' minnistre dé tchi j'ai veu l'portrait dans la gâzette dreinement est lé Révérend Michael Halliwell, Recteu d'St Brélade, et j'lé félicite d'aver ieu tant d'succès dans l'dêveloppement du "Communicare" ès Tchennevais. Ieune des choses tchi met l'Révérend Hallliwell à part des aut' Recteurs en Jèrri est tch'i' célèbre la Sainte Cène en langue Française dans s'n égly ise dé St. Brélade, et tchiquefais dans la Chapelle ès Pêtcheurs, et i' fait sèrvi nouot' bouanne vielle Litourgie pour l'occâsion. Né v'là eune mangnifique couôteunme tchi garde chutte précieuse Litourgie en vie et en allant!