Trenton, Michigan,
U.S.A.
Lé 22 d'novembre, 1975.
Moussieu l'Rédacteu,
J'tais à liéthe un coupl'ye d'pages trilyies dé d'dans un Pilot dé novembre, 1972, l'aut' jour, et j'tais intérêssi d'vaie tch'i' y'avait dêjà pâlement d'la décadence dé la disciplinne dans l'Églyise dans chu temps-là et tch'i' n'y avait (d'après des chiffres donnés par un working party) qué quatre pour chent d'la populâtion dé 26,000 pèrsonnes en ville tch'allaient ès Églyises Anglyicannes.
Ch'est assez r'mèrquabl'ye qué dans l' Pilot d'chu mais d'novembre, 1975, lé Révérend Peter Manton nouos dit qué la lectuthe par lé nouvieau Recteu d'eune pâraisse, dans s'n églyise, lé preunmié Dînmanche auprès s'n înstallâtion, des 39 Articl'yes dé R'ligion (qu' ou pouvez liéthe à la page 330 dé vouot' Litourgie en Français) n'est pus obligatouaithe, chutte lectuthe ayant 'té abolie par lé Sŷnode Général. Né v'la eune aut' preuve dé la décadence dé la disciplinne dans nouot' Églyise, et j'sis êtonné qué parmi touos les Minnistres en Jèrri i' n'y a qu' Moussieu Manton tch'a l'couothage dé protester contre touos ches changements tchi s'pâssent dans l'gouvérnément d'l'Églyise.
Y'a trais ans l' Pilot nouos disait qué ouaithe tch'i' n'y avait qué quat' pour chent des villais tch'allaient au tchulte Anglyican, i' y'avait 4,000 pèrsonnes tch'allaient ès deux Églyises Romaines - St. Thomas et Ste. Mathie et St. Pièrre - touos les Dînmanches. Y'avait acouo d'la disciplinne dans ch't' Églyise-là dans l'temps, mais aussitôt qu' chutte disciplinne fut amollie par Rome, ou s'est trouvée en embarras. La preuve en est qué quand j'tais en France ch't êté un tas d'églyises 'taient freunmées viyant tch'i' n'y avait qu' un Prêtre pour dêssèrvi chînq ou siex églyises. Et un tas de séminaires sont freunmés manque dé postulants pour la prêtrise.
V'la tchi dévthait nouos apprendre eune leçon, mais si l's autorités ecclésiastiques tchi gouvèrnent l'Églyise d'Angliétèrre continnuent à dêtruithe san Catholicisme et la livrer ès Libre penseurs ché s'sa sa fîn comme ieune des branques dé l'Églyise Catholique et Apostolique dans tchi la Litourgie nouos dit tch'i' faut craithe pour êt' sauvés - comme ou vèrrez en liêsant lé Sŷmbole dé St. Athanase, pages 45 et 46 dé vouot' Litourgie en Français. J'ai tréjous gardé la meinne. Ou m'fut donnée à L'Êcole du Dînmanche à St. George lé 13 dé novembre, 1898, et ou m'est précieuse. Ch'tait Moussieu John Pépîn tch'était Recteu dans chu temps-là, et touos les sèrvices étaient en Français.
Pus tard, quand l'Sieur Philip John Le Feuvre (fréthe du défunt Juge Francis Vibert Le Feuvre), 'tait Connêtabl'ye d'St. Ouën, il' taient grands anmîns, li et Moussieu Pépîn. J'm'èrsouveins d'aver ouï l'Sieur Le Feuvre dithe tch'il avait dit au Recteu un jour qué sa dgène n'était pon trop propre, et qu' Moussieu Pépin pathaîssait offensé car ch'en 'tait eune nette tch'il avait mîns chutte matinnée-là. Mais quand i' s'appèrchut qué ch'tait eune bliuette, i' s'mîndrent à rithe touos les deux - la bliuette étant qu' eune dgène, ou mème autcheune aut chose, né peut être trop propre!
En pâlant d'rithie, j'avais tréjous pensé qué l'Révérend G. R. Balleine, dé mémouaithe respectée, 'tait un homme sévéthe. Ch'est p't-êt' viyant qué jé n'l'avais janmais veu rithe. Mais dans lé mio du Pilot dé novembre, 1972, qué j'ai mentionné pus haut, y'a un articl'ye dans tchi tch'i' nouos donne d's histouaithes amûsantes du temps tch'il 'tait Minnistre à Bermondsey en Angliétèrre, tchi montre tch'il avait un fanmeux sens d'humour. Là, il avait mathié pus qu' quatre mille coupl'yes, et un aut' mille dans l's églyises d'alentou. Fidèle ès règl'yes d'l'Églyise, i' fallait prononcer l's annonces dé mathiage trais fais dans la Tchaîthe, eune sémaine entre châque.
Eune fais, un homme empêchit ses propres annoncés. Il 'tait dans l'chant d'l'églyise et faisait la carre à ieune des femmes tch'étaient dans l'chant étout. À sa grand' surprînse i' ouït Moussieu Balleine c'menchi à annoncer lus întention d'mathiage. Quand i' ouït les mots S'il y a quelqu'un de vous qui sache quelque cause ou juste empêchement pourquoi ces deux personnes ne puissent pas être conjoints en saint mariage, vous devez la déclarer, i' dit à Moussieu Balleine, entre haut et bas, mais bas assez pour empêchi la femme dé l'ouï, Oui, y'a empêchement, car j'n'ai autcheune intention d'la mathier! I' s'adonnait qu'la femme avait pensé, en d'mandant au Minnistre dé faithe l'annonce, qué v'la tchi f'thait probabliément l'homme accepter la situation et la mathier, mais l'affaithe êchouit.
Eune aut' fais, quand Moussieu Balleine 'tait à annoncer eune racachie d'annonces dé mathiages, un îndividu sé l'vit dans la congrégâtion et dit: J'dis tch'i' y'a empêchement dans touos les cas, mé!
Pour tchi raison?, Moussieu Balleine lî d'mandit.
Pour les sauver d'l'enfé! i' rêponnit. Car la vie mathiée est un enfé! Et i' tchittit san banc et sortit d'l'églyise!
George d'La Forge
Viyiz étout: