Lé Ménage ès Feuvres, St. Ouën.
Lé 13 d'août, 1966.
Moussieu l'Rédacteu,
Aniet, l'neuf d'août, jour du Thée d'l'Églyise, i' tchait d'la plyie! Ch'n'est rein d'nouvé! Quand j'tais mousse à la Forge ès Landes y'a eune septantaine d'années, ch'tait la même fichue boutique! Quant v'nait l'jour du Thée - dans chu temps-là ch'tait l'Thée des Trais Pâraisses - il 'tait seux d'tchaie d'la plyie!
J'm'en r'souveins si bein, d'ches temps-là. Comme mousses, les cheins tchi n'taient pon d'fanmiles à sou - et j'tais d'chu rang-là - n'viyaient pon souvent d'gâche sus la tabl'ye, et comme nou 'tait seux d'en mangi au Thée d'l'Églyise, la pensée d'en aver vouos faîsait l'ieau v'nîn dans la bouoche des mais d'vant l'arrivée du grand jour. Et quand j'en pâlais à Manman, ou'm'dîsait tréjous: "Eh bein, man p'tit. I' faut tréjous êt' èrconnaîssants quand nou-s a du pain à mangi, s'en pâler d'la gâche, et quand tu s'sas à tabl'ye dans la grand' tente i' n'faut pon ét' gourmand. Tu pouorras en prandre un morcé à corinthe, et iun sans corinthe, mais n'met pon les deux sus t'n assiette en mème temps. I'faut en prandre un morcé à la fais, et pis s'i' y'en a un tas d'restant sus la tabl'ye, et qu'tan maître d'Êcole du Dînmanche est d'amain, tu pouorras lî d'mander s'tu peux en aver acouo iun!"
Nou contait les jours en attendant. Les trais grand' fêtes 'taient l'jour dé Noué, l'Dînmanche des Prix à l'Êcole du Dînmanche et l'Thée des Trais Pâraisses, St. Ouën, Ste. Mathie et St. Pièrre. Ché n'tait pon seulement l'idée d'mangi d'la gâche lé jour du Thée. Ch'tait, étout, la pronm'nade dans la vainne, assis sus des couossièrs. Dé nouos jours, les mousses ne comprannent pon l'pliaîsi qu'eune pronm'nade dé mème pouvait nouos donner, ieux tchi sont poupotés et traînés partout en moto!
Auprès eune longue attente pour chu grand jour dé fête, quand nou sé l'vait l'matîn nou viyait tch'i' tchiyait d'la plyie! Et i' faisait si bieau temps hièr! Nou s'mâtait près d'la f'nêtre à r'garder la plyie tchaie, l'tchoeu gros, et à m'suthe qué l's heuthes s'êcoulaient et qu'ou' continnuait à tchaie, nou-s en éthait plieuthé! Combein d'fais qué j'disais à Manman: "Crai-tu qu'la plyie s'en va tchitter?" "P't êt' qué oui - sus l'coup d'méjeu, man p'tit," ou' m'dîsait.
Si l'temps n'sé clièrgissait pon, nou n'savait pon tchi faithe. Nou-s avait peux d'mett' ses habits du Dînmanche et l's aver trempés. Dans chu temps-là, l's habits du Dînmanche (nou l's appelait étout les "bouans" habits) 'taient des fas d'bliue sarge. La teunique avait un révèrs comme lé chein des naviguants d'la Marine Rouoyale auve trais rangs dé p'tite cordé dorée couôsus à l'entou, et nou m'ttait eune blianche dgaîne emb'sée en d'ssus du révèrs. Tout ch'la éthait 'té avrôné par la plyie, et nou n'avait pon deux fas d'habits d'mème! Enfîn: Si la plyie n'tait pon trop avèrse nou pranait p't êt' eune chance, et nou s'trouvait à l'églyise à l'heuthe ordonnée pouor monter dans la vainne. J'mé r'souveins qu'eune fais les vainnes dé St. George allîdrent jusqu'à l'êcole dé l'églyise au Haut du Mathais pour jouaindre les cheinnes d'la Grand' Églyise. Arrivés-là, i' n'pathaîssait pon y'aver autcheune espéthance qué l'temps s'amend'dait, et i' fut décidé d'èrmett' l'affaithe au lendemain. En r'broussant c'mîn pour St. George, j'avions à r'passer par l'Êcole Wesleyenne où-est qu'un tas d'nous allaient à l'êcole, et en passant l'êcole eune demié-douzaine lus mîndrent à chanter "Pas d'êcole démain!" à tue-tête! I' s'adonnait qué Moussieu Harry James Carter, l'maître d'l'êcole, 'tait à r'garder par la f'nêtre, et i' nouos vit et nouos ouit étout! Lé Thée eut lieu l'préchain jour, mais quand jé r'allînmes à l'Êcole Wesleyenne lé préchain jour du Thée, touos les cheins tch'étaient dans la vainne eûdrent l'astique viyant qué pèrsonne né voulait nommer les cheins tch'avaient chanté "Pas d'êcole démain!"
Si l'temps s'clièrgissait à méjeu, comme l'avait prédit Manman, tout allait bein, et la jouaie rempliaichait l'appréhension du matîn. Les vainnées d'mousses sé rêunissaient à l'églyise dé Ste. Mathie si ch'tait pour aver l'Thée au Gardîn d'Olivet ou d'tchiqu'aut' bord dans l'Est, ou à St. Pièrre si ch'tait pour aller à la Baie d'St. Ouën ou d'St. Aubîn. J'vouos ai raconté d'vant comment qu'nou s'régalait atout des finnes beurrées d'beurre et d'la gâche souos eune grand'tente. Et pis nou-s avait des courses, arrangies par les maîtres et maitrêsses d'Êcoles du Dînmanche, et les gangnants avaient des prix. Y'avait des courses ordinaithes et y'en avait à couorre auve les gambes dans eune pouque, et y'en avait à trais pids. La cheinne à trais pids 'tait risibl'ye. Lé pid drouait d'iun 'tait amathé au pid gauche dé l'autre et pis fallait couorre dé même, les bras d'iun l'tou d'la taille à l'autre. Au c'menchement d'la course la maîntchi d'ieux tchulbutaient et avaient d'la peine à s'dêmêler et sé r'mett' à couorre!
Pour eune fête dé même i' faut du bieau temps. Est-che ravissant qu'nou-s avait l'tchoeu gros quand l'jour 'tait à la plyie? Jé n'sai si l'temps s'en va s'clièrgi à méjeu aniet?
George d'La Forge
Viyiz étout: