Moussieu l'Redacteu,
"Tch'est qu' est la difféthence entre les sèrmons dans l'églyise et les sèrmons dans la chapelle?", jé d'mandis à Papa eune séthée auprès l'thée y'a eune huiptantaine d'années. "Mess Le Boutilyi, Wesley, disait dans la forge à matin tch'il attend fête pour lé Dînmanche des Sèrmons dans la neuve chapelle. J'ai trouvé ch'là drôle, mé, car Moussieu Pépîn ou Moussieu Bichery, ou Moussieu Barascud nouos en donnent iun touos les Dînmanches. Pourtchi tch'il' en ont rein qu' un té Dînmanche par an dans la chapelle?"
"Eh bein, man garçon," Papa m'dît, "j'sommes des gens d'Eglyise, et je n'pouorrais pon t'explyitchi trop bein l'ordre dé lus sèrvices, mais i' sont dévots et il' ont des fanmeux prédicateurs et i' pathait qué l'sèrmon est d'grande importance dans lus sèrvices touos les Dînmanches.
"Eune fais par an, quand l'hivé appréche, il' ont un Dînmanche spécial. Nou pouôrrait quâsi dithe qué ch'est comme lé Dînmanche dés Prix dans l'églyise, car à ch't' occâsion i' donnent les prix d'lus Êcole du Dînmanche à lus êfants. Il' appellent l'occâsion le Dînmanche des Sèrmons ou le Dînmanche dé l'Examen, probabliément viyant qué les mousses ont à subithe un examen entouôrre l'înstruction r'ligieuse tch'il' ont ieu dans lus Êcole du Dînmanche duthant l'année. Lé tèrme Dînmanche des Sèrmons est probabliément viyant tch'il ont des prédicateurs ou minnistres Wesleyens dé r'nommée spéciale pour faithe les sèrmons chu jour-là et duthant la s'maine. La belle grand' neuve chapelle est généralement plieine pour l'occâsion, et ch'est là qu' nouos vaîsîns L'Cornu, dé "North West View", vont,"
 L'églyise dé St. George |
"Mais pourtchi aller si liain quand l'Églyise dé St George est si près?", j'dis à Papa.
"Tch'est tchi t'ditha?", i' m'dît, "Châtchun à san goût, en r'ligion comme en aut's choses.
"Mais pour èrvénîn à l'affaithe des sèrmons. Eune chose tchi n'pathaît pon êt' connue, même par des gens d'Églyise ieux-mêmes, est tch'i' n'y'a qué dans un sèrvice dé l'Églyise - lé pus împortant d'tous, lé sèrvice dé la Sainte Cène (nou dit étout la Sainte Commeunion) - qu' un sèrmon est ordonné dans la Litourgie. Chu sèrvice quémenche à la page 146 d'La Litourgie, et à la page 148, auprès la fin du Symbole dé Nicée, i' nouos est dit: 'Alors suivra le Sermon ou l'une des Homélies'. Né v'là pourtchi qué, dans l's églyises où'est les minnistres lus habil'yent comme i' faut pour célébrer la Sainte Cène, s'i' prêchent un sèrmon dans l'couothant d'un aut' sèrvice, i' mettent l"'étole" (l'étole étant iun des vêtements ordonnés pour célébrer la Communion) par dessus la p'lisse pour montrer qué l'sèrmon est rêellement partie du sèrvice dé la Sainte Cène.
"Ch'est probabl'ye qué la grand' partie des gens n'ont janmais r'mèrtchi qué l's ornéments d'l'Églyise et d'ses minnistres daivent rester comme il' 'taient duthant la deuxième année du règne d'Edouard Six, rouai dé 1547 à 1553, comme il en est ordonné au bas d'la page 33 (en fache du sèrvice des Priéthes du Matîn) d'La Litourgie. Acouo eune preuve qué Henri VIII (rouai dé 1509 à 1541) n'avait pon fondé eune neuve Églyise.
"La raîson qu' les minnistres prêchent un sèrmon ès Priéthes du Matîn et Sé, ouaithe tch'i' n'est pon ordonné dans La Litourgie, est probabliément viyant qu' ch'est eune opporteunité d'înstruithe les gens. Malheutheusement, à la pliaiche dé nouos donner d'l'înstruction biblyique ou historique, il est si long, et souvent eune répétition d'tchique êvènement r'ligieux, tch'i' vouos endort à l'êcouter."
"Oh mais George," sé fît Manman, "comment qu'tu peux dithe d'ité à un êcolyi d'l'École du Dînmanchel Tu sai bein qu' les minnistrës font d'lus mus."
"Eh bein." s'fit Papa, "quand ch'est Moussieu Bichery, ch'est mangnifique. Il a à peine dit 'Mes très chérs frères' d'eune forte vouaix qu' nou peut ouï comme i' faut, qué nou peut s'attendre à ouï tchiquechose tchi vaut la peine pour eune dgiexaine dé minnutes, et pis il annonce lé drein cantique. Né v'là chein qu' nou peut dithe un bouan sèrmon. Moussieu Pépîn n'est pon trop enn'yant, ma fîngre, mais j'pouôrrais féther un coupl'ye d'j'vaux quandi qu' Moussiëu Barascud fait l'sien, et j'ai hoûté bein dès fais en êprouvant à l'êcouter."
"J'sai bein, Papa." j'lî dis. "J'ai d'la peine à m'garder rêvilyi duthant l'sèrmon à l'Êcole du Dînmanche. Et quand j'avons La Litanie et tch'i' faut rêpondre à 'Qu'il Te plaise' tant d'fais, i' m'sembl'ye qué nou n'en finnitha janmais. J'aime bein quand ch'est Moussieu Bichery, et j'aime bein à ouï les cantiques êt' chantés, et jé s'sai bein content quand jé s'sai grand assez pour êt' dans l'chant si ma vouaix est bouanne assez. Mais jé n'pouôrrai janmais chanter si bein comme Moussieu Ph'lippe, et Moussieu Charles L'Cornu d'Vînchelez, et Mait' Walter Pèrrée. Il'ont d'mangnifiques vouaix!"
Viyiz étout: