Trenton,
Michigan, USA.
Lé 22 d'avri, 1978.
Moussieu l'Rédacteu,
Dans la gâzette du neuf dé févri, qué j'veins d'èrchéver, j'vai un bieau portrait du Recteu d'St. Jean, lé Révérend Peter Manton, et v'la tchi m'a fait grand pliaîthi d'liéthe sén articl'ye entouôrre les changements tchi s'en vont êt' l'âffreux chef-d'oeuvre d'eune nouvelle Litourgie d'l'Eglyise Anglyicanne tch'est pour êt' publiée en 1980.
Lé langage dé la Saint Bibl'ye et d'la Litourgie qué j'avons connu toute eune vie - pus d'huiptante ans dans man cas - est r'connu comme étant supèrbe et d'eune bieauté încompathabl'ye. Pour mé, ch'est lé langage officiel dé l'Eglyise et il est sanctifié par l'ûsage et l'pâssage du temps, et ch'est un sacrilège dé l'changi. Mais v'la tchi n'pliaît pon au Sŷnnode et ès minnistres tch'ont l's idées êvangeliques et libérales. I' faut tch'i' s'sait machacré et rempliaichi par lé dgèrgon modèrne tch'i' veulent nouos faithe avaler. Et pourtchi? Pour attriotchi les jannes à l'églyise, nou m'dit, viyant tch'i' n'comprennent pon lé langage archaïque dé la Bibl'ye et d'La Litourgie!
A m'n idée, la vraie mannièthe d'attriotchi les jannes à l'églyise est d'aver lus pathents à l's y'emm'ner auve ieux dès lus p'tits jours. Mais j'ai r'mèrtchi qu' la grand' majorité d'gens veinnent auve lus p'tchiots à l'églyise pour les vaie r'chéver lé sacrément d'bâptême et pis auprès ch't êvènement solonnel lus visite au lieu d'tchulte est linmitée ès occasions d'mathiages et d'entèrrements. Nou n'mé f'tha janmais craithe qué l'changement du langage dé la Litourgie s'en va faithe les jannes aller à l'églyise. J'n'aime même pon lé langage dé la Nouvelle Bibl'ye.
J'sis absolûment d'l'idée du Révérend Manton qué ch'est honteux, j'dithais même un sacrilège, dé changi l'langage dé l'Oraison Dominicale (lé “Notre Père”) et d'appeler l'Bouan Dgieu “vous” auprès qu' j'avons ieu l'privilège dé l'appeler “Té” toute nouot' vie comme j'avons l'habitude d'appeler nouot' P'pèe ichîn bas étout. Mais ch'n'est pon seulement lé Notre Père tchi veulent changi. Ch'est l'sèrvice dé la Sainte Cène. Trais difféthentes vèrsions sont sus l'tapis, toutes difféthentes du rite dans la Litourgie actuelle. Des vièrs comme mé, accouôteunmès à l'ûsage dé chutte Litourgie, savent lé sèrvice dé la Communion par tchoeu, et ch'est troubliant d'aver à siéthe un nouvieau langage, sustout iun tchi dêpliaît.
Jé n'sis pon l'seul dans l'Eglyise tchi n'aime pon l'changement, mais les gens ont peux dé l'dithe. J'pense bein tch'il' ont peux d'offenser lus minnistres. Et j'sis êtonné tch'i' n's'est trouvé qu' un Recteu sus les douze à en pâler. I' n'a pon d'peux d'exprînmer sa pensée, ch'tî-là, et il a ieu l'couothage dé mett' eune annonce à l'entrée dé s'n églyise qué ch'est les vièrs sèrvices dé la Litourgie actuelle tchi sont faits sèrvi dans s'n églyise.
Ch'n'est pon seulement en Jèrri qu' les sèrvices dé l'Eglyise ont 'té bouleversés. La même chose s'arrive ès Etats-Unis et au Cannada étout, et y'a longtemps qué j'ai prophétîsé qué v'la tchi finnithait par fendre l'Eglyise en deux. Mafîngre, v'la tchi veint d'arriver. Chein tch'a avanchi l'affaithe et causé l'êvènement prédit 'tait la décision des sŷnnodes d'ordonner des femmes prêtres.
Es Etats-Unis, les congrégations d'l'Eglyise dé Ste. Mathie à Denver, Colorado, et eune vîngtaine ou pus d'aut' pâraisses ont forme un nouvieau diocèse et un êveque a 'té consacré pour êt' à la tête. Y'a tout pliein d'êveques en r'traite tchi peuvent consacrer les sembliabl'yes. Les congrégâtions d's églyises dé Lantana et de Deerfield Beach en Floride ont joint l'nouvieau diocèse. Et y'en a bein d'autres. I' sont tous à faithe sèrvi la vielle Litourgie et sont dêtèrminnés d'consèrver l'Eglyise comme dé vieillèche.
Au Cannada, lé Recteu d'ieune des églyises à Ottawa a c'menchi la révolte contre les înnovâtions et la prêtrîse dé femmes. Pour lé moment, i' s'est adjoint au nouvieau diocèse Améthitchain. Mais ch'n'est qu' eune affaithe dé pâssage du temps d'vant qu' un tas d'autres lus r'bînfrent contre les changements. Ches minnistres né sont pon des révoltés. I' sont dévoués à la tâche dé consèrver l'Eglyise dans s'n êtat consèrvateur. A m'n idée, ch'est les cheins tchi lus accordent au changement tchi sont les vrais révoltés.
Comme nouos l'dit la collecte du tchînzième Dînmanche après la Trinneté “O Seigneur nous Te supplions de protéger continuellement Ton Eglise,” nou créthait qué ch'est lé d'vé des sŷnnodes et des êveques et prêtres dé la garder întacte dans la fouai catholique et apostolique si bien explyitchie dans les sŷmboles des Apôtres dé St. Athanase et ordonné dans la Litourgie!
George d'La Forge
Viyiz étout: