Le Ménage ès Feuvres,
St. Ouën.
Lé 22 d'septembre, 1973.
Moussieu l'Rédacteu,
Ches jour tch'i' y'a tant d'pâlement oecuménique, j'trouve qué ch'est hardi întérêssant d'liéthe les “Tableaux Historiques” dé John Patriarche Ahier. J'sai bein qu' cèrtains auteurs dé nouos jours ont dêcliathé aver trouvé d's èrreurs dédans, et y'en à probabliément tchitch'eunes. Par exempl'ye, à la page 144, l'auteur nouor did qué “Jersey donna le jour à Robert Wace, le charmant poëte, en 1151. L'encyclopédie “Britannica” lé montre comme 1100?-1175? La Chronologie d'Jèrri, publiyée d'abord par Edmund Toulmin Nicolle et pus tard par Ralph Mollet, nouos dit qu' Wace publiyit l' “Roman du Brut” en 1155, ch'est en tchi nou peut supposer qué John Patriarche Ahier est en èrreur, car i' n'est pon raîsonnabl'ye d'craithe qué Wace éthait composé chu Roman là à l'âge dé quatre ans. Mais y'a-t-i' janmais ieu un livre publiyé tch'est parfait dans touos les dêtails?
Quant à mé, j'trouve les Tableaux divèrsément intérêssants, sustout au sujet oecuménique, comme jé l'disais pus haut, car l'auteur nouos donne un accompte d'un tas d'réligions. J'en ai apprîns pus entouorre les Druides qué j'n'en avais janmais seu. Et i' n'oublit pon les Catholiques Romains, Calvinnistes, Anglyicans, et mème les Mormons - tchi sont r'vénus populaithes assez pour vouler bâti eune églyise pour ieux-mèmes, en Jèrri. Mais ch'n'est pon d'aniet tch'il ont êprouvé à convèrti les Jèrriais à lus r'ligion. En faisant la généalogie d'nouot' fanmile, j'dêcouvris qu' ieune dé mes grand'tantes, née en 1851, s'en allit à La Nouvelle Zélande “auve les Mormons”. J'ai entré dans lus fanmeux Tabèrnacl'ye, tch'a l'appathence d'eune chapelle Méthodiste en d'dans, à Salt Lake City dans l'Êtat d'Utah, en Améthique, et j'ai veu lé d'houors dé lus mangnifique Templ'ye là étout, mais nou n'est pon pèrmins d'y'entrer. J'ai quand-mème entré dans l'Templ'ye des Mormons pas liain d'Londres, en Angliétèrre. Les gens 'taient invités à y'entrer dévant tch'i' fûsse consacré.
Parmi les raîsons mentionnées par l'auteur dans ses Tableaux Historiques comme ayant avanchi l'progrès du changement du Catholicisme au Calvinisme, i' mentionne des choses intérêssantes. I' pâle dé l'êpoque vèrs la fîn du dgiexième siècl'ye quand l'Europe 'tait, d'auprès li, empouaisonnée dé trop d'moines, des mendgiants opulents tch'ajouôtaient tréjous à la trésorerie comme s'il' 'taient à êprouver à remplyi un tchué sans fond. Ch'tait dans chu temps-là qu' Wiclef prêchait contre l's îndulgences et les pélérinnages comme étant d's înventions pour enrichi l'Pape et les prêtres.
I' pathaît qu' les nouvelles idées des souo-dîsants réformateurs comme Wiclef et Luther fûdrent èrchues favorabliément en Jèrri, viyant qu' la r'ligion d'chu temps-là 'tait dév'nue affaithe dé fathiboles et d'idolâtries. Par exempl'ye, l'Ascension du Christ 'tait r'présentée par un manniéthe de mannetchin d'paille enfliubé d'drap ou d'viope, tch'était haûlindgi au haut du cliochi d'l'églyise au cri des hourras d'la foule. La déscente du Saint Esprit, à La Pentecôte, 'tait r'présentée par des pouangnies d'êtoupe fliambantes laissies tchaie dé d'ssus l'lief dé l'églyise.
Lé Vendrédi Saint, un mannetchin, enfliubé d'viope étout, 'tait mînt dans un tombé fait dans l'églyise, et eune femme, èrprésentant La Sainte Madeleine, plieuthait, ou en faîsait la minne, à ses pids, et l'peupl'ye sé prostèrnait d'vant ches criatuthes là pour des heuthes dé temps. À Noué, y'avait pus d'divèrtissement. Il' am'naient un boeu et eune âne dans l'églyise, et v'la tchi la transformait en vraie êtabl'ye èrprésentant eune crèche. Les fidèles, appelés par la clioche, v'naient les saluer. I' pathaît (tréjous d'auprès John Patriarche Ahier) qué les anciens rituels dé Coutances avaient acouo, dans chu temps-là, un chant en Latîn tchi c'menchait par les mots “Salve Asine” (Bonjour âne!), et qu' après la Mêsse touos les pârouaissiens lus en allaient en chantant “Hi-han, Hi-han, Hi-han!” d'gannant la braithie d'l'âne autant qu' possibl'ye.
L's Êvêques né v'naient pon souvent en Jèrri, et comme lé peupl'ye aimait en vaie iun d'temps en temps, quand v'nait la célébration d'la fête du Jour des Innocents, les Jèrriais chouaîsissaient un mousse pour en èrprésenter iun. I' l'habillaient en Êvêque mitré, et l'faîsaient d'ganner les fonctions êpiscopales. Chutte farce-là 'tait connue comme lé Jeu d'La Nativité.
Nou pourrait penser qué tout chu tripot-là donnait quand-mème un cèrtain divèrtissement ès gens dans un temps tch'i' n'y avait pon fort d'aut' rêvillon, et i' pathaît tch'i' y'iut hardi d'résistance dé la part dé la populâtion quand les Calvinnistes lus mîndrent dans la tête dé l'aboli.
Ouaithe qué toutes ches fathiboles pathaissent quâsi incriyabl'yes, lé Sieur Ahier donne les Actes du Diocèse dé Coutances des années 1390 à 1470, les rapports dé visites pastorales dé l'Archidiacre des Îles, Etienne Delamare, en 1477, et Le Canu, comme souches dé ses r'chèrches, ch'est en tchi nou peut craithe tch'i' sont véthitabl'yes.
Il a pâssé hardi dg'ieau l'tou d'La Corbiéthe dépis chu temps-là!
George d'La Forge
Viyiz étout: