Châque année la Fête Nouormande rassembl'ye les cheins tchi pâlent acouo nos vielles langues Nouormandes – dé Jèrri, dé Dgèrnésy et d'la Grand'-Tèrre. Au mais d'Juilet 2004 ch'fut à Bayeux qu'nou viagit, pus qu'deux cârrossées d'Jèrriais, pouor présenter des r'citâtions, des chansons, des danses et d's histouaithes. Et onze dé nos mousses Jèrriais y fîtent eune èrcitâtion en tchoeu et deux chansons sus la strade – et v'là tchi fut mouontré à la télévision régionale étout.
Ch't' année la strade fut êtablyie dans la chapelle des bâtisses du mûsée d'la Tapiss'sie d'Bayeux – et en mèrtchant les huit chents ans d'la s'pathâtion d'la Nouormandie ch'tait mangnifique dé pouver pâler la langue dé Dgilliaume lé Contchéthant siez chutte vielle sornette en portraits tchi dêcrit coumme tchi qu'lé Rouoyaume d'Angliétèrre et l'Duché d'Nouormandie fûtent unnis. Mais achteu les seules bastaudes 'taient entre les c'valièrs habilyis en Mouoyen Âge à pratitchi sus la bliête.
Les Jèrriais 'taient l's învités spéciaux d'la ville dé Bayeux pouor lus Fêtes Médiévales, et les sonneurs Êcossais d'Jèrri et les Helier Morris Men 'taient là à soûfflier lus pouques à vent et à châtchi lus mouochieaux à toutes les carres. Et ch'tait sustout un pliaîsi d'ouï la belle mûsique Êcossaise dans la Cathédrale duthant l'sèrvice médiéval en Latîn.
Y'avait du bieau solé parmi l's achies, mais j'pouvons vos asseûther étout qu'les costeunmes d'y'a huit chents ans vos gardent assez sés souos la plyie, sénon les soulièrs – nou faîthait l'beurre dans les bottes en pathadant par les c'mîns d'Bayeux. Nou sé d'mande si les soudards à Dgilliaume 'taient vengis d'même en mil souaixante-six?
En tout cas, la Fête Nouormande èrveindra en Jèrri en 2005, quand j'allons espéther du solé mus qu'médiéval au mais d'Mai à La Trinneté siez la Sociêté Rouoyale Agricole. Coumme nos anchêtres Nouormands éthaient crie avant la batâle: Diex Aïe!
Geraint Jennings
Viyiz étout: