| lé pion | pawn | |
| lé châté | castle | |
| lé c'valyi | knight | |
| l'êvêque | bishop | |
| la danme | queen | |
| lé rouai | king | |
| un êché | check | |
| lé dêmâtage | checkmate | |
| dêmâter (l'rouai) | to checkmate | |
| encât'ler | to castle | |
| l'encâtellement | castling | |
| happer | to take | |
| l'êchitchi | chessboard |
La gamme d'écheés est joué sus eune plianche tch'a nom l'êchitchi. Ch'est eune gamme dé stratégie comme eune batâle entre deux armées.
Sus l'êchitchi, y'a souaixante-quat' cârrieaux en nièr et blianc. Les pièches d'échecs/d'écheés sont rangies des deux bords - les blianches contre les néthes.
Driéthe eune rangie d'pions, les pièches sont pliaichies auve les châtchieaux dans les carres, et à côté les c'valièrs et pis l's êvêques. Au mitan, y'a la danme et l'rouai - mais la danme dait êt' sus sa couleu: autrément dit, la néthe danme sus un nièr cârré, et la blianche danme sus un blianc cârré. Les deux danmes et les deux rouais don sont fache à fache.
Comme tchi qu'i' lus r'muent, les pièches? Les pions avanchent eune rangie à la fais - mais i' peuvent avanchi deux rangies en c'menchant.
L's êvêques vont d'couain' en carre, et les châtchieaux filent horizontalement ou vèrticalement.
Les c'valièrs font eune manniéthe dé danse - deux pas en avant et pis iun à gauche ou à drouaite, ou un pas en avant et pis deux à un bord ou à l'aut', ou d'même en autcheune direction. I' sont les seuls à pouver sauter par d'ssus eune aut' pièche.
Les rouais prannent un pas en autcheune direction, mais les danmes peuvent lus fliantchi dans autcheune direction jusqu'ès bords d'l'êchitchi, s'i' veulent.
Eune pièche happe eune pièche opposante quand oulle arrive sus l'même cârré. Si eune pièche veint m'nich la happ'thie du rouai opposant, ch'est un êché et l'joueux d'tchi l'rouai est en êché a à r'muer san rouai en sauv'té. Si un joueux n'peut pon r'muer sans rouai hors d'êché, l'rouai est dêmâté et né v'là la fîn d'la gamme.
Viyiz étout: