Tchinze jours devant Noué Maît'e Cliément d'Caen se trouvi en ville et eut l'occasion de rencontrer un amin qui li d'mandi d'allèr baithe une feis dans une certaine hôtel.
Jamais l'bouonhomme n'a r'fusé patheille invitation, et i' n'hésiti pas pour un moment.
L'attention d'Maît'e Cliem fut attithée à une magnifique coupe en argent qu'était dans un “show case” dans la barre, et il en fut prins d'envie.
I' d'mandi au maître d'l'hôtel combain qu'i' d'mandait pour chute piéche-là, car l'idée li était v'nue qu'on f'thait un biau présent d'neuches pour sa nièche qu'est sus l'point de s'mathier.
“Ou n'est pas à vendre, Maît'e Cliem,” l'autre li raîponni, mais, avec un mio d'chance ou pouorretchiez p't-être l'aver en entrant pour la compétition et chenna n'vos couôte'ta que douze sous.
Le bouonhomme vint tout d'suite bain interêssi quand il apprins qu'une telle jolie piéche d'argent'tie pouvait s'glienner à si bouan marchi, et i' d'mandi au maître d'l'hôtel, “Tchi compétiton? J'nai jamais joué au billard mé! Man bouonhomme de péthe m'avait tréjous d'fendu de touchi à ches jeux-là car ch'tait des inventions du Satan, et ainsi d'suite et pis quand même je n'ai pas -
“Mais ou pouvez jouer ès dominos, Maît'e Cliém.”
“Eh bain, j'y jouais un mio l'temps passé, dans l'temps des grand'tchéthues, mais j'ai quâsi roublié l'jeu.”
“Bah, bah, v'là qui s'r'apprend bain vite!
Ergardez, bailliz mé douze sous et je m'en vais mettre vot'e nom bas sus la liste. Chenna ne m'êton'nait pas du tout de vos vais gâgni la coupe, et r'gardez tchille honneur que che s'sait pour vous de vaie vot'e nom sus la gâzette comme le champion des dominos! I'y a un certain Chantn'yi du côté d'St. Jean qu'en mourrait de jalousie.”
A forche d'embêter le bouonhomme i' réussithent à l'persuader et opprès aver touâné san douze sous d'bord deustrais feis, i'mins san nom bas pour la compétiton.
Tchiques jours opprès i's'trouvi sus l'champ d'bataille pour jouer la prumié gamme.
Les numéthos avaient 'té hallés, et il 'tait pour jouer treis gammes avec Amice Bianpartout, les conditions étant que l'gagnant de deux gammes sus treis était l'vaintcheur et était raccoupliée avec un autre pour la deuxième ronde.
Bianpartout gâgni la prumié gamme.
Maît'e Cliém arrivi à nonante-six mais i'n'pu pas aller pus loin.
S'n adversaithe était septante-quatre et bouchi l'jeu pour un “comptons” et couothi hors avec un trente-deux.
Le bouonhomme quémenchi à juther et à faithe du tintamarre mais le propriêtaithe l'arrêti tout court en li disant qu'i' n'tait pas à une grand' tchéthue, mais dans une hôtel respectablye, et qu'il 'tait d'mêtchi de s'contrôler un mio.
La deuxième gamme fut gâgni par Mess de Caen avec une grande majorité, chein qui l'rêjoui si bain qu'il insisti de payi une ronde à toute la maison en disant que v'là tchi li portethai bouanne chance pour gâgni la traisième.
Et tel en fut. I couothi hors en quatre jeux, et san nom fut enregistré pour la deuxième ronde et nou li termi l'heuthe et l'jour qu'i' d'vant ervenin.
Mais quand l'jour vint s'n adversaithe ne s'y trouvi pas.
Nou li telephôni mais ch'tait sa femme qui raîponni et ou dit qu'il avait une suée d'fraid et qu'ou s'en allait pas le laissi sorti.
Le maître d'l'hôtel dit à Maît'e Cliém que par les règlyes i' pouvait r'cliâmer la gamme, chein que l'bouonhomme fit sans autchune hésitation.
Pour la traisième ronde Maît'e Cliém a 'té hallé pour jouer contre Joe, qu'est li-même un expert de prumié classe quant au jeu des dominos et qu'à, dans san temps, gâgni pus d'gammes qu'i' n'y a d'lettres dans ch't articlye ichin.
Ch'est ch'tte arlevée à quatre heuthes que les deux combattants lus rencontrent et i' pathait qu'i' s'en va y aver un peuplye pour vaie la lutte, qu'est seûthe d'être iunne des pus acharnées.
Nou sait bain que Joe se comporthetha comme un Moussieu, et perde ou gâgni, ne s'emportetha pas, mais Maît'e Cliément d'Caen a 'té mins sus ses gardes qu'i' faut qu'i tâche de modéther ses expressions en cas qu'i' vaindrait à être battu.
Le Caouain souhaite tout succès au vaintcheur, que che sait iun ou l'autre.
Au pus fort la pouque!
Caouain
1929
Viyiz étout: