Les Pages Jèrriaises

Le domino edgethé

Siez lus amins intimes - que je n'nomme pas,
Une famille St. Ouennaise fut passer la séthée;
Ch'tait à St. Pierre, Vingtaine de St. Nicolas,
Et ils 'taient quatre, Pepée, deux mousses, et la memée.

Ou savez bain qu' en patheilles occasions,
I'n'y a autchune diffitchulté quant ès vieilles gens.
Mais quand des mousses sont pliains d'animation,
I'faut trouver l'moyen de l's amuser sus tchique sens.

Le maître d'la maison sondi l'problème,
I'su tchi faithe pour diverti les bambinos,
Se rappelant bain d'aver 'té mousse li-même,
I'lus baîlli tout-d'suite une bouaîtée d'dominos.

Ah ! v'là tchi fit justement lus affaithe.
Le grand, un p'tit grivouais, s'en empathi sus l'coup.
Il êtraveli toute la bouaîtée dans l'aithe
Et prins san pliaisi à l's êparpillyi partout.

Que ch'fusse le doublye six ou l'doublye trais,
Ch'tait la même chose pour li, i'n's'en otchupait dgéthe,
Les picots n'étaient d'autchun intethêt,
Un chatchun joue ès dominos de sa maniéthe.

A neuf heuthes i'y eut un divertissement,
La porte du parleux fut ouverte d'un embront;
Et tch'est qu'entri sans l'moindre avertissement,
Sinon l'Caouain qui v'nait pour les nouvelles du front.

Nou dit qu'tant duthe le temps, tant duthe la fête,
Et l'moment arrivi d's'en raller à St. Ou,
I's'agissait de r'mettre dans la bouaîte,
Les dominos êparpillyis partout.

Pour les trouver, fallait s'mettre à quatre pattes,
Et grapiner comme des crapauds d'une carre et d'l'autre;
Y en avait souos l'tapis et souos les nattes,
I'l's avait bain muchis, lé p'tit apôtre.

Jusqu'à la p'tite memée qui s'mins à l'oeuvre,
Et s'fliantchant sus l'tapis à ventrillons,
Se faufili en d'sous des meublyes comme une tchiyeuvre,
Sans s'otchuper s'oulle exposait ses cotillons.

Je vos asseuthe qu'i' prinrent bain d'l'embarras
Et s' donnithent même la peine de délouogi l'piano.
Mais chose êtrange, i' ne r'pathidrent pas
De pouver mettre la main sus l'dernié domino.

I vint un temps que l'Caouain fut prins d'peux,
S'aperchevant qu'la chose s'en allait s'embrouôllyi,
Et d'crainte qu'i' l'soupçonnissent d'être le voléux,
I'dit. "Devant sorti, j'insiste d'êtré fouôllyi."

Ch'tait raique l'êqualifias d'un pouore vier fo
A tchi que ses amins né prinrent autchun avis.
Tch'est don qu'il aithait fait d'un domino?
Avous ouï rain de pus absurde? Je vos en prie!

Che fut l'lendemain que s'êcliergi l'mystéthe,
Le mousse l'avait muchi ouest qu'i' n'pouvaient l'trouver;
Il 'tait fouorré dans la couochette de san p'tit fréthe,
Et comme ch'la l'domino fut jusqu'à Portinfer.

 

Viyiz étout:

 

Les Pages Jèrriaises