Il a héthitè ch'la, peut-être,
De yun de ses illustres anchêtres ;
Car ch'tait san grand-pèthe de Quetteville,
L'année que Wesley vint dans l'île,
A lus services qu'entonnait l'chant.
De ch'la ya dêjà bain longtemps,
Mais ch'la n'fait d'rain, le don du vyi'
Dans not'e Djonnie s'est réproduit.

Longtemps d'vant qui tchitîsse le bèr,
Fallait qu'san pouore péthe, touos les sièrs,
Le portîsse pour deux heuthes de temps ;
Le mousse heurlait! Mes pouores bouannes gens,
Jamais j'n'ai ouï patheil potin ;
Tout ordgilleux d'san marmottin,
La pèthe disait : "Criyous, garçons,
Qu'chu mâtin-là a d'bouans poumons?"

Ch'tait quand ses dents vinrent à pèrchi,
Qui fusse craûlé, qui fusse bèrchi ;
Rain n'y faisait, le p'tit laidûze,
J'y éthais bain fliantchi une cliamûze!
J'tais raique son onclye, il en 'tait bain,
Car j'vos asseuthe si ch'eut 'tait l'main,
Que j'me s'rais prins d'un sens ou d'l'autre,
Pour cliore la béque d'un tel apôtre.

Des fais sans nombre j'dis à sa méthe,
"Tâche donc de faithe chu mousse-là s'taithe!"
Mais yi, ou s'mârrissait, et pis
Y v'nait à y-aver des gros d'vis ;
Ou m'disait : "S'ou n'êtes pas content
Né v'là la porte, fichiz-mé l'camp,
Insupportable vièr garçon,
Avec votre humeur d'héthisson!"

Avec le temps le mousse grandit,
Faut dithe qu'il amendit un p'tît;
Y n'heurlit pas justement tant.
Ch'tait pus, comme tchi dithai, du chant,
Si bain que sa maîtresse d'êcole
(La grande des filles à Clem Nicolle)
Nouos dit un jour : "Faut en souogni,
Ch'est un chanteux que vot'e Djonnie !"

Sa pouore méthe, toute êmervillyie,
S'en fut tout drét siez Mess McKee.
Ou lus dit: "Quick, I want some song,
To learn to sing to my boy John!"
Oulle en chouaisit sept ou bain huit,
Et r'vint à la maison bain vite.
J'lis dit: "Chest qui l'y servithont
Dévant qu'chu mousse ait des léçons!"

Enfinn, il apprint la musique,
Siez Miss Warble, à la boutique,
Et dans l'couothant de djais huit mais,
Le garçon fit autant d'progrès,
Qu'sa méthe voulit l'vie sus la strade,
Et oulle l'entrit pour l'Eisteddfod,
En nouos disant que selon s'n'avis,
Djonnie gagn'nit le prumié prix.

Y pratitchit, et pratitchit,
Et v'là quand l'grand jour arrivit,
San péthe, sa méthe, touos les vaizins,
Ses tantes, et mé, et ses couôsins,
Et not'e grand' soeu', qu'est sa mârainne.
Nouos v'là touos montés dans la vainne ;
Les villais furent touos êbahis,
Y criy'aient qu'j'allions ês bênis.

Pour n'être pas parmi la ràcâlle,
J'étions d'bouanne heuthe ès portes du "Hall."
J'montîmes les d'grés comme des vraies fiaiches,
Et j'chouaisîmes toutes les miyeu pliaiches.
La prumiéthe des compétitions
'Tait bain enniante, ch'tait les violons.
La deuxième, dja, nouos animi,
Ch'tait dans chette-là qu'était Djonnie.

Nou z-avait prinn soin d'enfrumer
Touos les siens qu'étaient pour chanter;
Yun à yun nou les faisait v'nin,
Comme quand nou passe d'vant l'Juge Vaudin.
Un homme criyait les numéthos,
La clioche sonnait, et "Off you go."
Et tàchait, chaque compétiteur,
De pliaithe à l'Adjudicateur.

Sus l'programme, Djonnie 'tait l'dernyi,
Y en avait quatorze l'avant li.
Sa méthe me dit : "Au meins j'espèthe
Qu'ils ont du feu là, en driéthe.
Chu pouore garçon! Que j'ai bain fait
D'li mettre san pus êpais corsèt!
Si chest qu'par chance il y prend fraid,
Jamais je n'le r'lais'sait chanter.

Opprès qu'j'en eûmes ouï une douzaine,
Je m'touânni à ma soeu' Mêrienne ;
Ou m'dit : "Faudrait en ouï bein d'autres,
Pour craithe qui s'en vont battre le nôtre."
Quand vint un temps, "Numétho Tchînze!"
V'là sus ses nerfs qu'sa méthe fut prinse;
Ou dit: "Oh! j'm'en vais m'èvanni !
Baille me mes salts!" L'evchin Djonnie.

Djonnie s'en vint avec apliomb,
Il t'ait dèterminé, l'garçon!
Et d'vant qu'la pianiste fusse assise,
Ou même que la p'tite clioche sonnisse,
Y starreti avec sa chanson.
Je vis bein qui n'l'arrèt'taient pon,
Y chante avec une ênergie,
Que rain au monde peut dêrangi.

Quand l'Adjudicateur se l'vi,
Et comme un fo sa clioche sonni,
Jamais n'avez ouï brit patheil,
Les gens se bouchaient les ouotheilles,
Tappaient du pid, faisaient des grignes ;
Mé, au garçon, j'faisais des signes.
Deux hommes le gaffent en l'entrainant,
Mais Djonni, li, chantait tout l'temps.

Y fallait qu'y eusse yeu tchique mêprinse,
Car Djonnie, à not'e grand surprinse,
Ne vint pas seulement dans les prix.
J'en fùmes diversement ravis,
Car dans toute la compétition,
Ch'tait li qui fit l'pus d'sensation.
J'nos en r'vinmes comme des tchans fouôtés,
Et touos compliètement dêgouôté:

J'en avons pâlé au Recteur,
A touos les membres du quiyeur,
Au Connaîtable, ès Surveillants,
Tous d's hommes qui n'sont pas d's inouothants.
Y nouos ont dit sans exception,
De d'mander une compensation,
Et même des dommages-intéthêts,
Car Djonnie n'a pas yeu faire-plyaie!

MONTE CRISTO.