Les Pages Jèrriaises

How the Dear Child Never Did It!

Laisé en r'gagne tout l'temps! N'ya pour dithe pus d'enflieunme dans sa gambe, et, bouan sinne! ou s'est r'minse a fredounné des Cantiques a yi même pour se passé l'temps quand nous est oblyijis d'la laissi tchiq' temps toute seule.

Ch'est-tan-tchi après y'avé mins ch'qui lis fallait sus eunne tchaise a la tête de san liet - d'l'ieau pannée, eune souos-tassée d'riz d'avant hier, un couplye d'cartelles d'orange, et san Cantique - j'm'en fut, hier l'arlevée, proumné ma fille au Ested... Hitsed... Stedfo... enfin, au Show du Doyen.

Y'avait un peupye! Des femmes, des filles, des veuves! des chapiaux, des bonettes, des capottes! et oquo d'autres filles et d'femmes et d'veuves! Man péthe benin! je n'mé sentais pas a m'n'aise. Les tablyes 'taient couertes de brod'die, de scalleupes, de djodrins, de gouochets: y'avait d'la souée, du vlous, du coton, d'la telle, d'l'Irish, du flianet, du nanci-ouilci... et j'apperchu Nancy Ouitte qu'etait a admithé des poupettes habilyis a la mode du temps passé. Après avé fait deux fais l'tou d'la Salle ov Lonore a man bras, et rèspounnu "ou va sus l'mus" ès gens qui nos d'mandaient des nouvelles de d'siez nous, j'dit a Lonore: J'ai affaithe dehort pour un p'tit quart-d'heuthe; continue a t'proumné 'up an down' a r'gardé les portraits pendus a la pathé - j'nos entre r'trouv'thons dans l's'envithons d'la tabye a gâche.

Quand j'rentri, j'm'en fut drét a la gâche; et, 'sure enuff' Lonore 'tait la, ov un troupé d'femmes agroup'lées autou d'yi, a caq'té toutes ensembye en angliais coumme a eunne couotuthe! Je n'fut pas long, en m'aidjant des coudes a m'poussé un c'min a travers chu troupé d'femmes la! j'mins man bras atouore la talle a ma fille, qui plieuthait d'peux, la chiethe innocente, et je n'fut pas long a lus dithe m'n'avis la d'sus! Eunne Pain! eunne Piteur! atchusée d'avé accapathé (j'fais eunne grande difféthence entre accapathé et volé, compren-ous!) un fichu minzéthablye shucrin! Mais r'gardez la ma fille! Fouollyis la, fouollyis nous touos les deux! R'gardez dans sa bouoche - ouvre ta bouoche, ma fille, que j'dit a m'n'êsfant. Sentez me s'n'halleine! V'la tchi sent i' a chucrins? ch't'halleine la? I' convintes toutes que nennîn, et s'tchullites toutes lien d'nous; et mé, après avé j'lus dit: Quar'ous que j'passe! et j'nos en fumes en emportant eunne gâche que tchiq'un dounni a Lonore pour tachi d'la r'consolé. Pas mauvaise, la gâche!

Lonore avait quazi pensé compété pour le Chant. Mais ou n'avait pas pratichi pus d'très fais, que l'Bos ramonti li même nos dithe qu'il avait grand r'gret, mais qui' n'pouait Lonore de chanté au d'sus d'l'office. Il avait trouvé les clerques ov lus têtes hors les f'nêtres, a êscouté; l's'imprimeurs dans nos d'grès; et tous n'cessaient d'frédounné la chanson a Lonore, du matin au sé - l'travas en 'tait tout dèsrangi.

L'Preumié Prix d'Chant s'a don pour tchiq' autre - mais ous avez perdu un 'treat'! Dites que j'vos l'dit!

Piteur Pain

 

Viyiz étout:

 

Les Pages Jèrriaises