Si l'affaithe continue, nou finitha par vaie Cliément d'Caen à l'Asile. Le vieux s'pliaint d'pus en pus de toutes sortes d'choses et s'il 'tait mathiè, faudrait admettre que sa femme essait pus digne de pitchi qu'd'envie, malgrè l'bieau tchièrs qu lis lais'sait s'il 'tait l'prumi à patchi ses telles.
Toutes les fais que nou l'rencontre, en effet, il a une nouvelle raison pour se lamenter et la fache l'y'allouagne de pus en pus à m'suthe qu'i' vieillî.
Je l'vi, Samedi, dans la faithe, à vendre des p'tits animaux. Il en avait onze dans sa van. “Hè, bein! Maitr' Cliément,” que j'lis fis, “vos v'la don à vendre des p'tits animaux.”
“Vaithe,” i' rêponnit, en mâchant un bu d'êtrain qu'i' v'nait d'haller de d'sus la boëte à couochons. - “Vaithe, me v'la à les vendre, pis qui n'y a pon moyen d'les garder tous pour les engraissi.”
Quand j'lis d'mandi combein qu'ils allaient, i' m'dit que, coumme le Samedi de d'vant, ch'tait trais louis et d'mi la piéche.
Je m'mins bein innocemment à l'féliciter sus l'bieau p'tit montant que sa fourcèe s'en allait lis rapporter quand i' m'interrompit en sautant pus d'un pi' d'haut pour me dithe que che n'tait pas une fourcèe mais deux qu'il avait dans sa van; que rein qu'chinq du lot étaient à li et que les autres appartenaient à un Français qui lis d'vait les sous pour san louage et qu'avait voulu prétendre qui n'pouvait pas l'payi à cause que tout était si chi.
“Et quand j'pense,” i' continui, “que chu grand ladre-là a 'tè dêfoui des patates toute la saison à passant trais louis la vrégie, mes patates, à mai, que j'tais à vendre à des vingt-sept et vingt-huit sous, quand j'éthais peu en faithe autant de ch'lins si j'm'étais mins à les défoui en même temps qu'mes vaisins...”
J'lis dis que ch'la n'tait probabliément pas la faute à san tâch'yi et que si personne n'avait vendu d'patates à bas prix, les gens éthait yeu hardi à enhanner.
Mais Cliément d'Caen n'est pas l'ouaisé pour ouï de ch't'ouothelle-là. I' m'rappeli bein rupêment que les gens avaient yeu des patates à un prix bein pus bas que chein qui coûtaient et que tandis que d'autres fermièrs s'étaient pus ou mains rattrappès sus chein qui vendaient au Gouvernement, ses vaisins avaient profitè d'li pour l'y'en accater à bas prix à seule fin d'les vendre en pouques oprès avair clièrgi les leurs à des prix coumme jamais nou n'avait veu...
“Mais pour en r'venin es couochons,” i continu', “quand j'vai qu'i' faut maintinin une bête tout l'hiver sus des raves accatèes et du bran à vingt-chinq ch'lins l'chent et pis avair chinq faillis animaux coumme chonna - de tchi, entre nous, qu'y'en a deux fouognots parmi d'lot...”
Pour lis changi l'idèe, j'lis pâli un mio d'politique, car il est pus ou mains fort en politique, Cliément d'Caen, et n'y'a pas par-dévant li pour caltchuler à deux vouaix près tch'est qu'en s'sa d'une êlection dans sa pâraisse.
Mais j'avais mal adounnè occouo une fais.
“Des êlections dans des temps coumme chonnechin,” qu'i' m'dit, “ch'est d'la bêtise. Ne v'la que j'soummes réduits à supplier les ouvriers de v'nin travaill'yi dans les fermes; faut êcouter tout lus gniolin; lus baill'yi des gages inouïs; dithe ouï et âmen à tout chein qu'il d'mandent, chiner sai-même nièt et jour pour en finir et occouo ne v'la des ga's qui sont en train de nos pousser à faithe des êlections! Perdre du temps à couorre le canton; faithe des pliaisièrs à toutes sortes d'monde; avair des distchussions. Bêtot faudra dépenser des sous, qu'il ajouoti, en soupithant...”
(Pouv'ous m'dithe par tchi prodige est qu'il existe des hoummes coumme Cliément d'Caen, qui sont stègrins et avares par natuthe et par habitude et qui, pourtant, mettent tréjous la main à la pouchette quand i' s'agit d'faithe de la politique de parti? Ch'est un problième que jamais nou n'a occouo peu m'expl'yitchi...)
“Vaithe, dêpenser des sous,” erprint l'vi, en prenant un autre brin d'êtrain d'entre les barres de la casse, "et pour tchi? Pour rester d'en par là y'où qu'nou z'en est. Sans avair la moindre chance de faithe de bouan travas. Quand nou sait bein que les siens sus tchi que nou compte p'têtre le pus vos f'thont des bieaux-bieaux tant qu'ou voudrez, mais n'vos servithont dghéthe quand veindra l'moment..."
La d'sus, Laïesse Ernon s'montri à une perque d'nous.
“Contre-parti,” m'fit Cliément entre haut et bas, et pis, tout haut pour que Laïesse pusse ouï: “Vaithe, coumme j'te l'disais: Oprès qu'j'avais payi man rât, avec huit quartchèrs de pus au mobil'yi, ètou! oprès la faillie annèe qu'j'ai fait; oprès qu'il a fallu payi extra sus l'contrat pour l'acquêt du p'tit mênage à Tom Bigthé, rapport à l'extinction des droits seigneuriaux, ou des décrets ou d'tchic' autre espèce de d'mangesou d'chutte sorte-là; oprès tout chonna, ne v'la t-i' pas qu'il a fallu dêbourser vingt-chinq ch'lins pour lus boustre de rât d'otchupants!”
“Vaithe, et occouo bein chanceux d'en êcapper d'même,” s'mint à dithe Laïesse, en arrivant à nous. “Mai, parce que j'sis à ferme dans une bouanne maison et que j'otchupe des offices qui fudrent bâties à neu' n'y'a que quatre ans, j'ai 'tè obl'yigi de payi trais louis tout rond. Ma belle-mèthe a san meubl'ye dans deux appartements pour tchi qu'ou n'm'a jamais offert un sou d'louage - ou' n'éthait pas l'moyen d'en payi - et entre nos huit mousses et la servante ils otchupent quatre chambres - car je n'sis pon pour envier des servantes à couochi dans des p'tits racoins en d'sus des boulangu'thies, ni dans des carres de gal'tas y'où qu'i' fait une fraid d'tchan... Et d'même, j'en ai yeu pour mes trais louis, mai, tandis que man propriêtaithe, qui reste en pension siez sa soeur, ne paie rein du tout, li, et que Moussieu Cliément d'Caen (qu'il ajouoti ov' un salut) qu'a trais fais pus grand d'terre que mai et qui trouve moyen d'accater des mênages, même quand il est à plièdji pouorr'tè, s'en r'halle avec vingt-chinq ch'lins."
“Dame,” erpl'yitchi l'vi, “quand nou veurt des maisons avec tout plien d'run, faut se r'souv'nin que ch'n'est pas la cage qui nouorris l'ouaisé...”
“Mais quand veindra l'rât général,” qu'il ajouoti, ov un grand soupi, “j'éthai man tou, allez, avec tout man fonci expertisè par des hoummes qui prétendent en savair pus longs sur la valeu' d'la terre que les propriêtaithes yeux-mêmes!”
“J'propose un café,” s'fit Laïesse, “pour nos changi l's'idèes. Voul'ous?”
Je s'condîmes d'un temps, Cliément d'Caen et mai (les siens qui proposent paient) et nou' s'y'en fut sus l'coup.
En suppant notr' tassèe (deux lopins d'chucre et demi, pas pus) Laïesse nos conti pour sa faith'raisse qu'a un p'tit louage de huit louis et qui s'criyait hors de la contribution mais qu'à 'té bel et bein happèe pour une douzaine de ch'lins à cause qu'ou condis un commerce dans ses appartements. A chu compte-là," il ajouôti à Cliément, "ou' n'dev'thiez pas trop vos pliaindre, vous, qui n'avez pas, comme chutte pourre corpe là, de vieille mèthe infièrme à maint'nin sus l'gang' de vos deux mains.”
“Heuh! ch'n'est pas l'yi qui faut pliaindre, ch'est nous,” s'fit l'vi, “j'vai l'moment qu'la bouanne femme s'sa à la chèrge d'la pâraisse, si n'y sont pas toutes les deux...”
Et coumme i' sortait l'prumi, i' n's'aperchut pas qu'en mettant un ch'lin sus l'compteux, Laïesse disait à Moussieu Ordinaithe: “Deux cigares, s'i' vous pliaît...!”
“Pique l'y'en dans ta gazette, au vier finaill'yi,” me fit Laïesse quand j'étions à allumer. “V'là qui n'est jamais content...”
Elie.
1917
Viyiz étout: