Jeudi matin j'nos trouvîmes, Laïesse Ernon, Cliément d'Caen et mai, dans l's'envithons des marchièrs, devièrs neuf heuthes et d'mie.
Cliément v'nait d'aller porter une chèrge d'geon pour tchaffer au “New Paragon,” Laïesse v'nait d'porter deux p'tits lards siez la bouanne femme Rochefort et mai, je m'trouvais là, par chance, en passant.
J'nos étions rencontrés au but d'la rue ès Français, Laïesse et mai, quand j'aperchûmes l'êtchipage à Cliément - vielle quédolle cassèe, vielle van toute d'sêtchillebouêtchie, vielle graie rapiéchie - qui dêtouannait la carre aupi d'la boutique à Le Riche.
- Ergarde-le bein, fit Laïesse, en adoptant un air sérieux: Un Principa d'paraisse, ex-membre de Comité d'Taxation, ex-Protchuleux du Bein Publ'yic, propriétaithe de deux bouans mênages, une tête-de-parti, un houmme qu'a droit à toutes les assemblièes d'pâraisse, qu'avait pensè, un moment, d'entrer dans l's'Etats coumme Député (pour empêchi un autre homme d'y v'nin), qu'a des chents quartchièrs de rente, qu'est pouorri d'sous; mais du coumme un Juî, avare, vièr garçon, grounneux, têtouangne coumme une mule et attintè coumme un boustre d'êpeuthâ! Ergarde-le!
Et, en effet, la description n'tait pas mauvaise. Cliément d'Caen, en temps ordinaithe, ch'est un type! Quand i' s'otchupe d'affaithes publiques, faut l'dithe, ch'est un type ètou, mais d'une espèce bein difféthente.
Laïesse, qui l'counnait coumme sa paute, me fit ermèrtchi, tout surprins, que l'vieux n'avait pas l'air si agroufflè ni si grounneux que d'amor. Ch'est d'même qu'i' pathaît, s'fit-i', quand il a fait un bouan bardghin ou qui s'est asseuthè d'une vouaix pour une êlection! Faut tâchi d'savair de tch'est qu'i' s'agit...
- Haï, Cliément! qu'i' criyi, coumme le vieux passait, une minute...
Et quand le bouan houmme fut arrêtè: Veins t'en ov mai et une bouochi à mangi. Man mousse ergardétha sus tan ch'va. J'n'avons pon déjeunè trop bein d'vant sorti.
Et nos v'la touos les trais, attabliès au Café, ov Mess Journieaux à nos d'mander avec toute la politesse possibl'ye “tch'est qu'ches Messieurs-là s'en allaient avair?
- Tu m'as l'air tout content, s'fit Laîesse, en rêmouant san café. Veinnent-i' de t'offrir lus maie d'conré pour douze sous la chèrge, ou as-tu accatè un autre ch'va pour trente chelins?
- Pas tant d'gniolin, lis fit le vi, en mordant à même une beurrèe. Tu'en as tréjous entouor mai, mais chutte fait y'a réellement de tchi faithe pliaisi ès fermièrs. As-tu veu la gazette de hier? Haï, Mess Journieaux! Apportèz-mai le gazette.
Et une fais qu'il eut la “Nouvelle” devant li, Cliément d'Caen se mins, entre les bouochies, à nos lièthe des parties du rapport de la séance des Etats de Mardi passè, en faisant de temps en temps des r'mèrques de san cru, coumme i' n'y'a qu'li qui piesse en faithe.
Quand il eut mins la gazette de côté, à la fin, et que Laïesse l'y'eut fait mangi un coupl'ye d'sandwich, le bouan homme, tout content, nos prins dans sa confiance.
- Je l'savais bein, nos dit-i', que les Etats essaient raidde pour le fèrmi. Ov des noms coumme Perrèe, Hâcou, Luce, Arthu, Du Feu, L'Rossigno sans pâler des Pallots et d'John Godeaux, tous bouans juges de bêtes, n'y' a pas à dithe; i' faut qu'l'affaithe touanne du bord du fèrmi. J'vos l'avais déjà dit, vouos en rapp'l'ous? le jour que je r'vinmes des élections dans un automobile.
Là d'sus, Laîesse me fut un cl'yin qui voulait dithe: Tch'est qu'éthait jamais pensè qu'i' s'en s'sait rapp'lè, quand il 'tait si souard qu'il avait d'la peine à marchi?
Mais Cliément continuait à d'viser: Av'ous ermèrtchi coumment qu'le Comité d'la D'fense est décidè à nos bailli un coup d'main? A bas l'travas qui n'sert de rein. Dounnez des d'vantiaux d'pouque ès filles et envièz les soigni les bêtes - dans les fermes y'où qu'nou veurt bein les empliyer - mai, j'n'en veurs pas mais ch'la n'dit rein! Allez dithe ès causeurs de serrer lus truelle; ès machons de pendre lus ouaisè sus les rouais; ès tchèrpentchièrs de tchitter l'rabot pour prendre la bêque; ès peintres de mettre lus pincieaux de côté pour aller ouvrir des raies! V'la chein qu'i' veurt, le Comité d'la D'fense, et il a grand'ment raison. L'agritchulture avant tout; sé-m'n'âge!
- Une bouanne chose que tan neu sol'yi essai tout plianchi et qu'ta tcherquéthie essait quâsi couverte, lis fit Laîesse.
- Vaithe, erprint le vieux, et ach'teu que j'vai' chein qui s'en va arriver j'vos garantis que l'affaithe s'en va bouogi et que dans mains d'tchinze jours tout ersétha bein clios et cliottiche. Et oprès chounna, veinje tchi voudra: la tchéthue avant tout.
Malheutheusement, j'n'ai pas l'esprit aussi vif coumme je voudrais et je n'viyais pas occouo chein qui faisait le vi si joyeux. Autant j'l'y'en dis, en lis d'mandant tch'est qu'le Comité d'la D'fense avait à faithe avec li!
- Eh bein, se-m'n'âge! me fit-i' en êtruellant la saliéthe sans s'en aperchevair, faut-i' être bête! Mais tout chu monde là s'en vont être env'yés travaill'yi dans les fèrmes, bouan-gré mau-gré; service national; ordre d'l'autorité; production de vivres exécra, exécra! Pas d'autres accords de défouissage à des deux ou trais louis la vrégie: Un bouan prix pour nos patates, le transport asseuthè et d'la main-d'oeuvre tant qu'il en faudra!
- Mais, que j'fis, ou n'vos imaginèz pas que nou s'en va vos dounner des causeurs, des cordonniers, des maîtres d'école et des clercs d'notaithe à travaill'yi dans vos clios sans qu'ous ayez à les payi!
- Je f'thai mus que ch'la, s'fit-i' en prenant une pinchie de s'no. Ch'n'est pas des gens d'vocation que j'm'en vais empliyer. Ch'est des Allemands, des prisonniers, - des fermièrs et des fils d'fermièrs Allemands des Blianches Banques. Et ch'est mai qui verra qu'i' travaillent, les gas!
- Eche qu'ou' voudraites avair chu peltas-là dans vos clios, s'fit Mess Journieaux, par dessus san compt'eux?
- Du peltas qui travaille! lis rêponnit Cliément. Tout l'monde sait que les Allemands n'sont pas des imbéciles. I' savent travaill'yi la terre aussi bein coumme nous et dame! quand nou peut les avair à si bouan marchi, faudrait être fo' pour erfuser sa chance.
Et là d'sus le v'la à nos dithe san plian...
Che n'tait pas li qui s'en allait empliyer des Bretons à des huit ou neu' ch'lins par jour. Moussieu Perrèe avait dit dans les Etats - et Moussieu Perrèe n'est pas le prumié v'nu - qu'i' faudrait bein que les prisonniers Allemands travaillissent dans les clios et que nou dev'thait les avair pour huit, djiès ou douze sous par jour. Et Cliément s'n'allait apply'yitchi pour en avair une squade.
- Y'en a parmi yeux, continui le vi, qui sont bein accouôtumès au travas et j'ai ouï dithe qu'en Allemagne i' craissent des masses de patates. Ch'est là les ouêsiaux pour mai! Ch'est là les prix qui m'conveinnent.
Mais ou n'en éthèz pas d'peux, don, s'fit Mess Journieaux.
Peux? lis cliâtchi Cliément, peux de tchi? I' s'sont bein gardès, n'ayiz crainte! Le Gouvernement est seux d'env'yer un soudard ou deux avec chaque squade et même si nou les laissait touos seurs, y'a m'n'arme dans l'ch'lyi, sé-m'n'âge! Dès qu'j'aithai fixè une bajonnette - y'en a de s'conde main dans une boutique dans Union Street - au bu du canon et que les deux canons es'sont chèrgis ov du pliomb à canard, je voudrais vais l'Allemand qu'i' n'faudrait! J'la doun'nai à Joseph, man domestique, - ou l'connaissiz, Joseph Le Boutill'yi? - et i' s'mettra du bord de la brèque du clios avec.
L'idèe d'vaie Joseph Le Boutill'yi' avec une arme à deux coups et une vielle bajonnette amathèe au bu, à marchi de long en large et de large en long, - en d'vant d'la brèque d'une cliosèe d'patates à la ferme à Cliément d'Caen, me fit quâsi m'engouer, mais i' n's'en aperchut pas.
I' continui à nos expl'yitchi qu'il en prendrait des siens de douze sous par jour, de peux que les siens de huit ne fussent des mauvais sujets ou des estropiès, et qu'au bu' du compte i' valait mus payi quatre sous d'extra en n'avair pas san travas rein qu'à maintchi fait.
- J'm'en vais en avair pour la pliant'tie, nos dit-i', et p't'être même y'un ou deux pour rabattre les raies! J'en r'tcheindrai ètou pour grappiner, mais chès-là, j'îthai les chouaisi. Nou m'a dit qu'i' y'en a qu'ont des pids coumme des pelles à fou, qu'êcrâs'saient mes patates au lieu de piler bein dans l'mitan du rang. J'm'en vais tâchi ètou d'en avair une squade pour d'sèrter un côti que je n'pouvions pas entreprendre entre mai et Joe. - Mais pour la dêfouithie, l'affaithe en vaudra la peine! Des hoummes à dêfoui et à êlopper à douze sous par jour... des hoummes qui sont obl'yigis d'paître là y'où qu'i'sont fitchis, qui n'peuvent pas s'mettre en grève, et sus tchi que nou pouorra pointer une arme à deux coups si n'font pas à votr' goût. Et avair la satisfaction de penser que ch'est la not' grand' d'vair, à nous, les vièrs, de craître des patates pour les exporter (à bouan prix), pour nourrir les soudards qui sont à assoummer les Boches!
Si l'affaithe touanne bein, fit-i' en se l'vant pour s'en aller, je n'dit pas que je n'doun'nai pon tchic chose pour le Dispensaithe, le Samedi qu'y'étha une collecte en ville. Faut montrer que nou-z'est r'counnaissant quand nou z'y'est.
Elie.
1917
Viyiz étout: