En v'la une surprinse, n'est-ce pon?
En v'la une surprinse, n'est-ce pon? Car d'pis l'temps que j'n'ai pon bailly de ma becque dans chutte gazette il y en a hardi qui criyaient que chutte pouorre Marie Hibou d'vait être dans tchiques grande maison d'ou nous n'sort pon couomme nous veut. Olle tait p't'être à l'hopita ou dans une autre grande batisse du vaisiné!
Nennin, ch'n'est pon chunna et si m'arrive tchique accident couomme il a deux ou trais s'maines quand j'mantchi une broque de l'êtchelle et m'n'alli tchès le nez d'vant sus une casse à patates, quand tchique chose d'même m'arrive ch'n'est pon l'hopita mais le décompteux pouor mé.
Pouor dithe la vérithèt, d'pis tchique temps l'Sieur Caouain et mé sommes en horchin. Oprès touot si j'sis sa Missis pouor man grand malheu, j'n'veur pon être sa domestique et faithe son travas tandis qu'ly est tréjous à couorrir iou qu'il n'voudrait pon m'vais.
J'en ai yeu assez de ses sornettes et de ses menteries. Foi de Marie Hibou, ch'est le pus fier menteux que je connaisse. I mentirait à travers un us de fé.
Oh! bé seur I vos promettra tout ch'qu'ou voudrais, mais che n'sra que des meluques.
Ch'est éttouot un pièrcheux qui est né fatigué.
Mais touot chunna n'vous intéresse pon fort mais n'v'la pourtchi que j'ai envièth le vièrr Caouain à s'faithe quatorze quand y vint trais ou quatre fais d'écrithe mon gnollin pouor la gazette et faithe plaisi au boss, qui était si marri qui paslait d'aller trouver Moussieu Joe pouor nos mettre hors de notre mansard.
* * *
N'v'chein une histouèthe qu'est la pure, pleine et entièthe vérithèt.
Un Moussieu qui vous connaissez fort bein, avait un biau cat qu'il aimait bein. Mais ch'tait un male-cat et un beau jour y n'rentri pon d'sa proumenade. Nous attendi des s'maines, des mais et du cat nous n'vit même pon la coue.
Les mousses voulait aver un autre cat pouor lus amuser et l'fliatter. L'buanhomme n'voulit en entendre mot, disant que l'cat erviendrait bétot.
Mais notre houomme vit ervenir les souothies tant en tant qu'il fallut bein aver un autre cat.
Deux ou trais jours oprès ieun des mousses apportit bé content un touot p'tit cat, qui d'vint grand... et catte.
Touot l'monde était content excepté les souothies bé seur quand un biau matin s'présenti un vièrr cat qui se jutchi sus la hêche du gardin. Le missis en viyant chutte vilaine bête happi un boutchêt et arrosi notre visiteur à quatre pattes. Rein n'y fit en nous eut beau l'chasser d'un bord y r'v'nait de l'autre.
Notre Moussieu s'deshalli à son touor pouor cacher hors du gardin chu tétouanne de visiteur à quatre pattes, mais touot à coup y s'fit. Mais ch'est Tommy!
Et en effet ch'tait Tommy qui vint faire la fête au boss et qui avait disparu d'pis deux ans et chinq mais. Chunna ch'est la vérithèt et si Tommy n'avait que la pé et l's'os y n'tardi pon à s'n'aller iou qu'nous avait l'habitude de l'y mettre san mangi.
Achteu n'v'la nos gens bein embarrassés, car il y avait la catte qu'nous aimait bein éttouot et nous n'voulait pon chasser l'vièrr cat.
Touot s'arrangi d'charme, car la jeune catte n'fit pon cas du vièrr Tommy, qui ly n'ergardi guère la catte, chacun s'n'allant de son bord.
L'affaithe resti d'même pendant deux ou trais mais, quand un matin l'vièrr cat fut trouvé mort par d'la poison.
Achteu il n'y a pas de male cat dans chutte maison, mais il y a une catte... et des p'tits...!
* * *
J'connais une Missis en Jerri qui est fort marrie viyant que s'n'homme erfusi la prumièthe poste officielle qu'il y ait jamais été offerte dans sa paraisse.
Ch'tait quand nous nommi l'Inspecteurs Honorifiques pouor le Colorado Beetle. Notre homme fut appréchi par son vaisin qu'est grand amin du Connétable et qui ly dit que s'il voulait y l'proposerait à l'assemblée de paraisse, mais Phlip erfusi.
Couomme vous viyez ch'n'est pon dans la paraisse de St. Jean qu'nos gens ont lus mesnage d'pis que dans chutte paraisse quasiment touos les fermiers sont Inspecteurs.
Quand sa Missis apprins chunna Phlip en entendi d'pus d'une sorte. Ch'est que la Missis est un miot ordgilleuse de sa sorte et voudrait que s'n'homme se déshalle un p'tit pus viyant qu'il aurait p't'être chance d'ichin p'tit temps d'être chantgni d'pis que personne n'veur la poste dans chutte paraisse.
Phlip est au rât de principa dans sa paraisse mais y n'veur pon aller ès assembliais s'faisant qu'il aime mus ouir son wireless et fumer trantchillement sa pipe que de s'otchuper de politique qui pour ly est un tas de gnollin.
Pouor vos dithe l'vrai, chutte Missis voudrait un miot pus, car couomme oulle porte les braies dans l'ménage, oulle n'vais pas pourtchi que s'n'homme n'porterait pon la robe... rouge!! Pouor créatuthe, va!
Marie Hibou
1933
Viyiz étout: